منذ سنوات عرض الموسم الأول من مسلسل رمضان كريم، والذي حقق نجاح جماهيري كبير، خصوصا إنه من نوعية الأعمال الدرامية الاجتماعية ، التي تشعر المشاهد إنه يجلس وسط ناسه وأهله.
سنة 2017 شهد موسم رمضان مسلسل حلو ولطيف وع الهادي اسمه «رمضان كريم» واللي بيحكي أجواء الحارة المصرية في رمضان وسط الزينة، والفطار والونس والحكايات، مع شوية أيفيهات، ومشاكل بسيطة مش أزمات وجودية بنشوفها في أعمال تاني.
المسلسل اللطيف ده كان من إخراج سامح عبدالعزيز، وتأليف أحمد عبدالله، وبطولة عدد كبير من النجوم زي سيد رجب ومحمد محمود وريهام عبدالغفور، وروبي، ومحمود الجندي، وشريف سلامة، وسلوى عثمان، ومحمد لطفي، وسهر الصايغ، وصبري فواز، وغيرهم.
الناس بعد ما اتبسطوا من الموسم الأول، طالبوا بإنتاج موسم تاني من العمل، واللي اتأخر سنين كتير، عشان يظهر في موسم رمضان الحالي 2023، ولكن صناع العمل واجهتهم مشكلة، وهي غياب عدد كبير من نجوم الموسم الأول عن الموسم الجديد، وده نظرا لانشغالهم.
كان الاتجاه بعد غياب النجوم لحل من اتنين، وهو إما إن الشخصيات تفضل موجودة مع الاستعانة بنجوم جدد عشان يلعبوها، أو إنه يتم تعديل السياق الدرامي، وخصوصا إنها أحداث متنوعة بتدور في حارة مش قصة قايمة على حد بعينه، وفي النهاية الاختيار كان للفكرة التانية بتعديل الخطوط الدرامية، وإضافة شخصيات جديدة.
مؤلف العمل أحمد عبدالله، قال إن المشاهد مش هيحس بأي غياب للنجوم عن العمل، أو وجود شيء مش مظبوط، لأن القماشة بتاعة المسلسل تسمح بالتعديل وإضافة شخصيات جديدة.
وبين النجوم المعتذرين عندنا روبى، وشريف سلامة، وريهام عبدالغفور، وسهر الصايغ، ومحمد محمود، إلى جانب غياب الفنان محمود الجندي، والفنانة أحلام الجريتلي، نظرا للوفاة.
منتج العمل أحمد السبكي كشف إن الفنانين دول اعتذروا لأنهم بقوا شايفين نفسهم نجوم وإن مبقاش ينفع يشتغلوا في أعمال بطولة جماعية، وقال «جبنا ناس أحسن منهم».
بينضم للموسم الجديد من مسلسل رمضان كريم، عدد كبير من الممثلين منهم بيومي فؤاد وسلوي خطاب وتامر فرج وسامي مغاوري وبدرية طلبة وويزو وعبد الله مشرف وإسماعيل فرغلي وراندا عبد السلام وعبير الشاعر ووائل الفشني ومحمود الليثي.
استمرار تحقيق المسلسل لنجاح كبير، مرهون بالتعامل مع المتغيرات اللي طرأت على صناع العمل، وكمان القدرة على تقديم نفس الحالة اللي حبها الجمهور، من خلال مشاكل اجتماعية بسيطة بيمر بيها أهل الحارة، وواضح إن كمان في تواجد مكثف لنجوم قادرين على لعب الكوميديا، واللي هيقدر يخلي الموضوع قريب للناس، طالما مفيش ابتذال.
الجمهور في انتظار مشاهدة الحلقات الأولى للعمل، عشان يقدر يحكم عليه، ولكن في النهاية هو عمل جاي بقاعدة جماهيرية مسبقة.
