مصرية قالت في حق السعوديين كل خير واتهمها واحد من أبناء بلدها بالتطبيل لهم، كل هذا لانها قالت كلام جيد في حق السعودية، لكن الرد السعودى كان قوي.
إيه اللي قاله المصري في حق بنت بلده واتهامها بالتطبيل؟ وإيه كان رد السعوديين عليه؟ .. كل ده وأكتر هنعرفه مع بعض في التقرير التالي:
خلال الساعات اللى فاتت انتشر فيديوهات على السوشيال ميديا لسيدة مصرية في السعودية، الفيديوهات دى عملت جدل كبير جدا، بسبب الكلام اللى قالته الست المصرية في حق السعوديين، كرمهم وشطارتهم في خدمة معتمري بيت الله الحرام اللي هي كانت واحدة منهم، السيدة وبكل بساطة كانت في الحرم بتؤدى فريضة العمرة الفترة دى، خلال شهر رمضان يعنى، وصادف وهي في الحرم موعد السحور، فا زيها زي أي حد تانى موجود راحت تاخد من السحور اللى بتوزعه الحكومة السعودية على المعتمرين في الحرم المكي.
وهى بتاخد السحور ده شافت تنظيم وشكل حلو للي بيقدموا السحور، وكمان شافت الأعداد الكبيرة للوجبات اللى بيقدموها، فاهى وبكل ود خالص صورت فيديو للى حصل ده ونشرته على صفحاتها على السوشيال ميديا، وقالت فيه أنها بتشكر السعودية، وكل أهل السعودية فرض فرض على اللى بيعملوه ده، وختمت كلامها بأن السعودية على رأسها من فوق وهى أفضل بلد في العالم، وده الجزء اللى علق عليه واحد مصري، واتهمها بالتطبيل للملكة العربية السعودية، علق وقالها:” حتى في العمرة بتطبلى”.
وطبعا التعليق اللى قاله الشخص المصرى دى ضايق جدا الست المصرية، وخلاها تنشر فيديو تانى توضح فيه وجه نظرها وترد غيبتها، قالت في الفيديو الجديد:” انا واحده في العمرة، والعمرة دى في رمضان، فا مالهوش معنى يعنى للكلام اللى بيتقال ده، انا مش هضيع عمرتى وصيامى وقيامى عشان أكذب وأقول كلام على بلد انا مابحبهاش” ببساطة كده بتقول انها مابتطبلش وبتحب السعودية قوى وكل شعب السعودية فرض فرض.
وبعد كلامها اللى قالته ده، الدنيا انقلبت على السوشيال ميديا، بقى فيه فريقين كل واحد ليه رأي في قصتها، السعودين طبعا وزى ما هو متوقع وقفوا في صفها، نشروا الفيديوهات بتاعتها وعلقوا عليها باحلى كلام ممكن يتقال، أنها سيدة طيبه وبنت أصول ومابتنكرش الواجب وبتحب السعودية والسعوديين كمان بيحبوها ويتمنوا ليها كل الخير، ومنهم اللى قال أن السعودية لا تحتاج لتطبيل ولا مدح ولا شكر ولا ثناء من أحد، وأن كل شيء بيعملوه بيكون لوجه الله تعالى فقط، وكل الوجبات سواء وجبات الإفطار والسحور في الحرم المكي هي تبرع من السعوديين بغرض عمل الخير، مش بغرض أن حد يطبلهم ولا يقول في حقهم أي حاجه.
أما الرأي التانى بقى، فا فيه عدد مش قليل من الناس شايفه ان اللى عملته الست المصرية ده ماكنش ليه لزوم خالص، كان ممكن تاخد السحور الموجود من غير ماتنشر فيديو يعنى، زيها زى غيرها من الموجودين، وكمان مكنش ليه لزمة خالص أنها تقول أن السعودية على راسها وهى أفضل بلد في العالم، كانت سكتت يعنى وعملت عمرتها من سكات، أنتم رأيكم مع مين بالظبط.
