يبدو ان العيد قادم ومعه الفرج، حيث أنه من المتوقع أن تحدث انفراجه في أسعار الدواجن والبيض، ولكن ما هي أسباب تراجع الأسعار وهل ممكن تعود أسعار زمان مرة أخرى؟ تابعونا لمعرفة التفاصيل:
لو زعلانين إن أسعار الفراخ والبيض بقالها فترة في الطالع وحاسين إن الميزانية بتبوظ منكم أحب أفرحكم وأقولكم ما تزعلوش
وده اللي أكده حازم المنوفي رئيس شعبة المواد الغذائية والبقالة و العطارة بغرفة الإسكندرية التجارية، وقال في تصريحات لـ “الوطن” إن الفترة الحالية هتشهد استقرار ملحوظ في أسعار البيض في الأسواق المصرية.
خصوصًا إن الفترة دي كان في اقبال متزايد على الشراء عشان الناس بتشتري حاجتها قبل أيام من عيد الفطر المبارك.
«المنوفي» قال كمان إنه من بداية شهر رمضان المبارك و مبيعات البيض في الأسواق ارتفعت وزادت بشكل كبير وده لأن البيض بيستخدم في كتير من مخبوزات العيد أهمها مثلا عمايل الكعك والبسكوت.
عشان كده في توقعات كتيرة بتأكد انخفاض أسعار البيض في ختام أيام شهر رمضان وهتستمر معانا في عيد الفطر المبارك.
كمان قال رئيس شعبة المواد الغذائية والبقالة والعطارة بغرفة الاسكندرية التجارية، أن سعر البيض الأبيض النهاردة وصل في المزرعة 107 جنيهات وبكده بتوصل الكرتونة للمستهلك بسعر 120 جنيه وده نفس السعر للبيض الأحمر كمان
أما سعر البيض البلدي في المزرعة فسجل 98 جنيه وعشان كده كان بيتراوح سعر الكرتونة ما بين 110 و120 جنيه.
وده نفس الكلام اللي قاله سامح السيد رئيس شعبة الثروة الداجنة في الجيزة
وقال إن النهاردة تراجعت أسعار الدواجن 2 جنيه وسجل كيلو الفراخ البيضاء في المزرعة 68 جنيه، والساسو بسعر يتراوح ما بين 100 و105 جنيه، وكان شايف إن أسعار البيض مستقر جدا الفترة دي .
أما أسعار الكتاكيت فقال إنها حققت تراجع جديد، وهبط سعر الأبيض والساسو حوالي 6 جنيهات، والهجين 4 والبلدي 3 جنيه، ودي تعتبر مستويات قياسية من التراجع، وده اللي خلى رئيس الشعبة متفائل جدا بالايام الجاية.
وتراجعت أسعار الكتاكيت 75% من قيمتها من بداية شهر مارس اللي فات، وعشان كده تراجع السعر من مستوى 25 جنيه لـ 6 جنيه النهاردة
وده طبعا اللي بيبشر المصريين بإننا داخلين على تراجع كبير في أسعار الدواجن خاصة إن تكلفة الإنتاج الدورات الحالية والمقبلة هتكون أقل.
ولو بتسأل عن أسعار الأعلاف في مصر فسجل سعر الذرة الصفراء البرازيلي والأرجنتيني النهاردة 18800 جنيه، والذرة الصفراء الأوكراني بسعر 18300 جنيه، والسعر للصويا 46% بقيمة 41 ألف جنيه، و40 ألف جنيه للصويا 40%.
ولو انتوا فاكرين فـ الحكومة كانت تعاقدت على استيراد 25 ألف طن لحوم برازيلية مستوردة، بسعر 65 جنيه للكيلو، وده طبعا ساعد كتير على تراجع أٍسعار الدواجن الحية من 90 لـ مستوى 70 جنيه تقريبا.
انتوا بقى ايه رايكم في الأسعار اللي أعلنتها شعبة الدواجن وهل دي الأسعار اللي بتشتروا بيها فعلا؟
