كل سنة وانت طيبين العيد يقترب ، لكن هل سألت نفسك وانت تشاهد مسلسلات رمضان هذا العام عن أجور الفنانين مقابل طلتهم علينا طوال شهر رمضان؟
وياتري مين صاحب أعلى أجر في السباق الرمضاني ؟ محمد رمضان لسة نمبر وان برره ولا حد لطش اللقب منه؟
كلنا بنستنى رمضان من السنه للسنه والممثلين في الحكاية دي بالذات ليهم وضع خاص لان ده الموسم بتاعهم، والواحد منهم ممكن يقعد يشتغل طول السنة عشان مسلسله ينزلك في رمضان.
وهنا بقى الشركات بتسابق بعض عشان تفوز بالمسلسل اللي هيجيب أعلى مشاهدات ويحقق أعلى الأرباح، فيعملوا ايه:
يدوروا على النجم اللي هيعلم مع الجمهور وده بيضرب أجور الممثلين في السما واللي حصل السنه دي اكبر دليل.
تقارير كتير حاولت تعرف نجوم مسلسلات رمضان 2023 قبضوا كام، والبدايه كانت من محمد رمضان اللي انت مسحول معاه وهو بيدور على ابنه سيف.
محمد رمضان واخد في مسلسل جعفر العمدة 45 مليون جنيه، وده كان نفس أجره في مسلسل موسى ومسلسل المشوار. يعني لو قولنا المسلسل 30 حلقة يبقى الحلقة واقفة بمليون و500 ألف جنيه.
وفي المركز التاني بييجي خالد النبوي اللي قدملنا مسلسله المثير للجدل رساله الإمام، وعشان يطلع بدور الامام الشافعي قبض 35 مليون جنيه.
اما المركز التالت فكان من من نصيب امير كراره في مسلسل سوق الكانتو، وأجره وصل إلى 33 مليون جنيه مقارنة ب28 مليون جنيه في مسلسل العائدون رمضان 2022.
وبعد كده ييجي مين؟
مصطفى شعبان اللي قبض 30 مليون جنيه عن دوره في مسلسل “بابا المجال”، وده أعلى من أجره السنة اللي فاتت في مسسل “دايما عامر” واللي كان قيمته 22 مليون جنيه بس.
وفي المركز الرابع حمادة هلال في الموسم الجديد من مسلسل المداح، عشان يوصل أجره إلى 26 مليون جنيه.
وبعدهم أحمد مكي في المركز الخامس عن دوره في “الكبير أوي 7″، لأن أجره 25 مليون جنيه، وهو أعلى من اللي خده في مسلسل “الكبير أوي 6″، بقيمة 18 مليون.
وفي المركز السادس، الفنان ياسر جلال في بطولة مسلسل “علاقة مشروعة”، وصل إلى 20 مليون جنيه.
وأخيرا حصلت الفنانة منة شلبي على 17 مليون عن دورها في مسلسل “تغيير جو”.
وطبعا أجور الفنانين مش في المسلسلات بس، انت ناسي الإعلانات؟ دي قصة تانية خالص وانت شايف أكبر الشركات معتمدة على الممثلين في اعلاناتها.
فقولنا بقى انت ايه رايك في أجور الممثلين؟ وهل الأرقام دي طبيعية خصوصا يعني لو قارنها بأجور الممثلين بره. ولادي أرقام كبيرة ملهاش داعي؟
