معظمنا الآن في حالة صدمة مثل الصدمة التي شعرنا بها عندما توفى الفنان هيثم أحمد زكي، وكأنه مكتوب علينا كل سنتين تلاتة نتصدم بوفاة فنان شاب ننتظر منه يقدم كتير في مشواره.
والفنان مصطفى درويش اللي ودع دنيتنا النهاردة ليه مواقف كتير انتصر فيها لمبادئه زي إنه رفض يشتغل مع الكاتب إبراهيم عيسى مثلًا، وفي الفيديو اللي معانا ده هنقولكم السبب اللي خلاه يعمل كده وكمان اللي حصل بعدها واللي مكانش حد يتوقع إنه هيحصل، خليكوا معانا لآخر الفيديو.
ليه رفض يشتغل مع إبراهيم عيسى؟
الفنان مصطفى درويش من حوالي سنة كان بدأ يشتغل في فيلم من تأليف الكاتب المثير للجدل دايمًا إبراهيم عيسى، بس إبراهيم عمل حتة إثارة كده من اللي بيعملها لحاجة بقى في نفس يعقوب ولا إيه حكايته الله أعلم، المهم اللي عمله إبراهيم معجبتش مصطفى اللي انتصر لمبادئه وقتي ورفض يشتغل في الفيلم واعتذر عنه، كل ده عشان إبراهيم عيسى أنكر حادث الإسراء والمعراج، وكان موقف إبراهيم مش ولابد بردوا أصله وصفه بإنه “نكرة” كإنه كده حد مش معروف ولا ليه لازمة يعني، وده اللي حكاه بالظبط قاله الناقد محمد طاهر على صفحته، لكن كان إيه بقى رد الفعل في العموم؟.
توقعات محصلتش
ومحمد طاهر كمل كلامه بيقول إن في توقعات من صناع دراما كتير قالوا فيها إن مصطفى درويش سوقه هيوقف ومش هيشتغل تاني لأن قرار انسحابه من فيلم لإبراهيم عيسى حاجة كبيرة بردوا، لكنه سوقه ولا وقف ولا حاجة ومصطفى السنة دي في دراما 2023 كان في قمة نجاحه، واعتبر طاهر إن موقف زي ده هو اللي باقي لمصطفى وهيفضل في سيرته أكتر من أعماله كلها بعد رحيله، ويتحسب ليه إنه انتصر لمبادئه وعقائده على حساب شغله، وده بيدل على إنه كان حد محترم وأصيل وابن بلد الله يرحمه.
مصطفى درويش في دراما 2023
وفعلًا دراما رمضان 2023 كانت علامة في تاريخ مصطفى درويش اللي ودع جمهور بالمشاركة في 4 أعمال دفعة واحدة هما مشاركة مع محمد سعد في “الحاج إكسلانس” ومع غادة عبدالراق في “تلت التلاتة”، ومع حسين فهمي وأحمد فهمي في “سره الباتع”، ومع دينا الشربيني وشريف رمزي في “كامل العدد”.
مسيرة فنية قصيرة
والفنان مصطفى درويش قدم مسيرة فنية قصيرة والقدر كان أسرع من أي حاجة في إن مشواره يطول عن كده والمسيرة دي بدأت سنة 2012 بدور صغير في الجزء التاني من مسلسل “كيد النسا”، وهوب ظهر مع عادل إمام سنة 2014 في مسلسل “صاحب السعادة” وساب علامة فارقة في مشواره سنة 2020 لما ظهر بشخصية فتحي مدرب كمال الأجسام في مسلسل “بـ100 وش” مع نيللي كريم وآسر ياسين واللي لفت ليه الأنظار بقوة بعد ما انضم للعصابة اللي بتقوم بأعمال النصب اللي كلنا تابعناها.
والفنان مصطفى درويش رحل عن عالمنا ظهر الإثنين 1 مايو عن عمر 43 سنة بعد ما حصل توقف مفاجئ لعضلة القلب، والكل تسابق عشان يشارك في النعي وتشييع جثمانه وسط دعوات كل اللي يعرفوه وبيحبوه.
