حياة الفنانين الجمهور يعتبرها حاجة مهمة ويتمنوا يشاهدوا سيرتهم الذاتية في عمل فني، لكن تقريبًا السير الذاتية لم تظل في اهتمامات البعض يمكن لأنها لا بتنجح مع الجمهور وتحتاج طريقة معينة لكي يتم تنفيذها وتكون جواز السفر من الفنان للجمهور.
لكن الجديد بقى الفترة دي إن في فنانين لسه بيعاصروا حياتنا وقرروا يعملوا أفلام وثائقية عن حياتهم من وهما في الطفولة لحد ما كبرو وتقريبًا ده بقى ممر شيق لقلوب الجمهور والشغف من الناس طبعًا بيرفع سهم التنفيذ وأكون أو لا أكون.
والفنانة شيرين عبدالوهاب أعلنت من كام يوم إنها قررت خلاص تعمل فيلم وثائقي عن حياتها مع منصة نتفليكس، بس الجديد إن من ساعات فنانة شهيرة جدًا قالت إن الجمهور عارف غلطاتها ومعندهاش مانع تعمل حياتها في فيلم وثقائي عن حياتها، وفي الفيديو ده هنعرف مين الفنانة دي وإيه اللي قالته بالضبط وكمان هنقولكم مين الفنانيين اللي خدوا نفس الخطوة دي.
خرج ولم يعد
تقريبًا كده يا جماعة السير الذاتية رفعت شعار ذهب ولم يعد على رأي فيلم يحيى الفخراني اللي كلنا عارفينه، وكمان هي مش بتاكل مع الجمهور بالبلدي كده وحاليًا الجمهور بقى بيحب يشوف الفيديو القصير اللي ميزهقش منه وفيه المعلومة المفيدة وخلاص على كده، وده اللي بعض الفنانين اللي عاوزين يوثقوا حياتهم خدوا بالهم منه واشتغلوا عليه.
شيرين عبدالوهاب هتستعين بطفلة
الفنانة شيرين عبدالوهاب، عملت حفلة من كام يوم في دبي والضجة طبعًا كانت الرفيق ليها في الحفل ده عشان وقعت من على المسرح وكانت ليلة الحقيقة.
لكن شيرين وهي بتعمل مؤتمر صحفي عن الحفل ده قالت إن في فيلم وثائقي عن حياتها بتحضرله الفترة دي وده بقى مش هيكون شائعة ولا حاجة وهشتغل عليه بالتعاون مع منصة نتفيلكس وجوه الفيلم فيه بنت هتقوم بدوري وأنا صغيرة.
وأكدت إن اللي هتقوم بدورها وهي صغيرة مش بنتها عشان محدش يقول حاجة والسلام، وكمان بناتها دلوقتي كبروا وبقوا أطول منها في الحقيقة، طيب اللي قالته شيرين مين بقى اللي عملت ضجة من كام ساعة.
الجمهور عارف غلطاتي
الفنانة دي قالت إنها معندهاش أي اعتراض إنها تقدم سيرتها الذاتية في عمل فني، وممكن تقدم فيلم وثائقي عن حياتها كمان وتستعرض فيه كل جوانب حياتها وشافت إنها شخصيًا حياتها كتاب مفتوح للناس كلها والناس عرفت كل حاجة عنها وعن بنتها وأحفادها وغلطاتها كمان.
والفنانة دي هي غادة عبدالرازق اللي تصريحاتها الناس ممكن تفهمها غلط بس عادي بالنسبة لها الموضوع لأن زمان كانت بتضايق من تدخل الناس في حياتها، بس دلوقتي بقت بتعرف ترد وتقول لأي حد انت مالك خليك في حالك، ودول بقى أحدث اتنين اتكلموا عن موضوع الفيلم الوثائقي بس في فنانين سبقوهم لكده ونفذوا بالفعل.
إليسا ومحطات فارقة
حياة الفنانة إليسا مليانة بالعديد من المحطات الفارقة وفيها كتير من المواقف الصعبة، زي مرضها الصعب اللي كلنا بنتمنى يبعد عننا وعن حبايبنا وانتصارها عليه، وهي فعلًا قررت تنقل جانبًا من حياتها وتكشف جزء خفي من أسرارها في فيلم وثائقي وهيتم التصوير قريب بين لبنان وفرنسا وبردوا هتتعاون فيه مع منصة نتفيلكس.
جورج وسوف الطفل المعجزة
والنجم جورج وسوف المعروف بـ”الطفل المعجزة” كلقب ليه واللي اتولد سنة 1961، بيتمتع بصوت ملوش مثيل في الوطن العربي ده معروف من وهو عنده 13 سنة وبيقدم الطرب الأصيل والمواويل ببراعة وكوّن فرقة وغني “الهوى سلطان” واتعرف بـ”سلطان الطرب” كمان، وقدّم أكتر من 20 ألبوم في مشواره الفني، ده غير الأغاني المنفردة والكليبات، مش هيعمل فيلم عن نفسه ولو هو مش هيعمل مين هيعمل.
والسلطان وثق رحلته فعلًا في مسلسل اسمه “مسيرتي” وظهر فيه وهو بيحكي مشوار حياته من الطفولة، مع مشاهد درامية لكل اللي بيحكيه عن حياته وحقق المسلسل أصداء واسعة جدًا وده كمان خص جمهوره بأسرار اتكشف عنها لأول مرة وكان اللقاء في الحقيقة صادق جدًا وكان جورج بيجسّد شخصيته من مرحلة الطفولة لحد الشباب والمرحلة الحالية وظهر معاه فنانين بيجسدوا الشخصية في المراحل دي زي الطفل سليم حايك، والممثل عامر فياض، وفريد توفيق.
ميريام فارس والمعاملة القاسية
وقدرت الفنانة اللبنانية ميريام فارس اللي اتولدت في مايو سنة 1983 في قرية بجنوب لبنان توثق لنا فترة حملها وغنائها في منزلها، خلال فترة الحجر وتجربتها مع عيلتها في فيلم وثائقي اسمه “غدارة يا دنيا” وطرحته على منصة إلكترونية سنة 2021، واتكلمت في الفيلم لأول مرة عن فترة صعبة في حياتها وفقدها لطفل كان لسه جنين في بطنها وعن معاملة والدها القاسية معها.
ودلوقتي ممكن نقولكم إن في فنانين كتير من الناس القديمة اتعمل عنها أفلام وثائقية بتظهر جانب من حياتهم الشخصية زي نجيب الريحاني وآمال فريد وعمر الشريف وغيرهم، ومستنين بقى في التعليقات تقولولنا مين الفنانين اللي حابين يعملوا أفلام وثائقية عن حياتهم وشايفينهم يستحقوا ده.
