قرار الحكومة بإعفاء واردات الذهب من الجمارك أكيد قرار غير عادي، ولذلك كل الناس تنتظر لمعرفة تأثير هذا القرار على أسعار الذهب ياترى سترتفع أم أنه من الممكن أن نرى استقرار الفترة القادمة؟
والأهم من كل ده هل القرار ده هيقلل الطلب على الدولار في السوق السوداء وياترى هنشوف تراجع في سعر الأخضر قريب؟
دلوقتي المصريين بالخارج هيقدروا يدخلوا دهب بكل سهولة وكمان هيبقى معفي من الضريبة الجمركية لكن هيدفعوا قيمة مضافة على كل جرام وده لمدة 6 شهور.
طيب تفتكروا القرار ده ممكن يأثر على سعر الدولار في السوق السوداء ؟
خبراء الاقتصاد اتقسموا نصين نص كان شايف إن قرار إعفاء واردات الذهب من الجمارك، هيساهم في خفض الطلب على الدولار في السوق السوداء وبكده سعره هينخفض.
والنص التاني كان شايف إن العكس هيحصل وده لأن زيادة الطلب على الدهب المستورد هيرفع الطلب على الدولار في السوق السوق الموازي ويرفع سعره
ولو انت مش عارف فـ سعر الدولار في السوق السوداء بيتراوح بين 38 جنيه لـ 40 جنيه مقابل 30.95 جنيه في البنوك، والأسعار دي وفقًا لـ مراقبين اتكلم معاهم موقع مصراوي.
محمد عبد العال، الخبير المصرفي، حذر في تصريحات لـ موقع مصراوي من نتائح قرار السماح للقادمين من الخارج بدخول الذهب بحوزتهم دون جمارك
وقال إن ده ممكن يقلل حصيلة تدفقات النقد الأجنبي من المصريين العاملين بالخارج على البلاد، وكمان ممكن يساعد في تغذية السوق السوداء ويقصد هنا زيادة الطلب على الدولار فـ السوق الموازي.
وكان شايف إن المصريين ممكن يعملوا كده عشان يشتروا بالدولارات دي دهب بسعر ارخص من برة مصر.
وقال إن الاقتصاد مش هتستفيد من القرار في تحسن ميزان المدفوعات أو حتى وفرة العملة أو تعزيز الاحتياطي النقدي لكن كل اللي هيحصل إنه هيزود الطلب على العملة الصعبة في السوق السوداء.
وسأل عبد العال وقال يا ترى المواطن المصري اللي موجود في مصر وعايز يشتري دهب من الخارج هيجيب الدولارات منين ؟
وعشان كده كان شايف إن القرار ده محتاج إعادة نظر عشان ميأثرش على السوق السوداء
سواء بقا من المواطنين أو تجار الدهب
أما سهر الدماطي، الخبيرة المصرفية فكان عندها رأي مختلف وشافت إن قرار السماح بدخول الدهب الوارد من المصريين بالخارج هيساعد في وفرة المعروض وده هينعكس على استقرار أسعار الذهب المبالغ فيه.
وقالت في تصريحات لـ مصراوي إن القرار ده هيساعد في حل أزمة موجودة بالفعل وهيعمل توازن بين العرض والطلب في السوق وده هيأثر بشكل إيجابي على الأسعار.
ده غير إنه هيهدي السوق السوداء وهيقلل الطلب على الدولار خاصة وإن السبب في زيادة الطلب على الأخضر هو إن تجار الدهب بيشتروا الدولار عشان يستوردوا دهب يغطي احتياجات المواطنين خاصة وإن الطلب عليه مرتفع جدا.
ومن بداية 2023، الدهب في مصر كان بيسجل أسعار قياسية لدرجة انه بقى أعلى من السعر العالمي وشعبة الدهب قالت إن السبب هو نقص المعروض في مقابل الطلب الكبير من المصريين على شراء الدهب باعتباره ملاذ آمن للحفاظ على قيمة مدخراتهم.
ومن هنا جت فكرة إعفاء دهب بصحبة المسافرين من الخارج عشان تزيد الكمية المعروضة في السوق وتنخفض الأسعار.
.إنتوا بقا شايفين إن القرار هيأثر بالسلب ولا الإيجاب على أسعار الدولار؟
