حالة من الجدل حدثت على مواقع التواصل الإجتماعي وخصوصا فيسبوك خلال الساعات القليلة اللي فاتو، وده بعد ما انتشرت صورة لعملة بلاستيكية من فئة الـ 1000 جنيه واللي اتقال إنها هتنزل الفترة الجاية .
وطبعا الكلام ده قلب الدنيا، بس تفتكروا الكلام ده حقيقي ولا دي إشاعة ؟، خليكوا معانا واحنا نقولكم إيه حقيقية إصدار ورقة بـ 1000 جنيه :
مصدر بالبنك المركزي المصري، طلع واتكلم مع موقع القاهرة 24 ونفى إصدار عملة ورقية جديدة من فئة الـ 1000 جنيه، أو حتى البدء في طباعتها خلال الفترة الجاية .
وقال إن البنك المركزي مش ناوي يطرح أي عملات جديدة خلال الفترة الجاية، ما عدا العملة البلاستيكية من فئة الـ 20 جنيها، واللي مقرر طرحها بالأسواق مع حلول عيد الأضحى.
وحسب بيانات البنك المركزي المصري فـ في السنة اللي فات البنك طبع 2 مليار جنيه من العملة الجديدة فئة الـ10 جنيهات
البنك طرحها في السوق مع حلول عيد الأضحى، واللي وقتها عملت ضجة كبيرة وناس كتير كانت معجبة بتصميمها وشكلها خصوصا إنها كانت مميزة في شكلها وتصميمها وده لأنها كانت مصنوعة من مادة البوليمير.
وقتها كمان البنك المركزي عمل تعديلات على ماكينات الصراف الآلي المنتشرة في مختلف جميع أنحاء الجمهورية وده عشان تقبل عمليات السحب والإيداع للعملة البلاستيكية الجديدة.
وحسب كلام المصدر فقال إن البنك المركزي المصري حدد تصميم العملة البلاستيكية فئة الـ 20 جنيها الجديدة، وكمان قال إنه بدأ في طباعتها خلال الفترة اللي فاتت، وده عشان يتم طرحها داخل الأسواق المحلية الفترة الجاية.
أما بقى لو بتسأل عن شكل وتصميم الـ20 جنيها البلاستيكية الجديدة، فـ المصدر قال إنه هيتم الإعلان عنه قريب وده بالإضافة لـ تحديد معاد طرحها الفترة الجاية من قبل محافظ البنك المركزي حسن عبد الله.
وفي شهر إبريل اللي فات انتشر كلام على السوشيال ميديا عن اصدار البنك المركزي 500 جنيه قريب وقالوا إنها هتكون بعد عيد الفطر المبارك
والصورة اللي كانت متداولة في الفترة دي كان مكتوب عليها اسم العاصمة الإدارية الجديدة، واسم البنك المركزي أعلى وأسفل العملة
وقتها طلع مصدر مسؤول في البنك المركزي، نفى أي إتجاه أو دراسة لإصدار ورقة جديدة بقيمة 500 جنيه في السوق المصري، وأكد إن أعلى قيمة متداولة هي من فئة 200 جنيه.
كمان قال إن كل الكلام المنشور على السوشيال ميديا مش حقيقي ده حتي شكل التصميم المتداول مختلف تماما عن التصميمات اللي البنك المركزي ماشي عليها.
ولو انتوا مش عارفين فـ البنك المركزي بيطبع، 6 أنواع من فئات البنكنوت المصري بفئات 5 جنيهات، 10 جنيهات، 20 جنيهًا، 50 جنيهًا، 100 جنيهًا، 200 جنيهًا.
وعن أسباب طرح الحكومة المصرية للعملات البلاستيكية الجديدة أكد الدكتور أحمد سعيد، الخبير الاقتصادي وأستاذ القانون التجاري بالجامعة البريطانية، في تصريحات لـ موقع سكاي نيوز أن النقود البلاستيكية بتتميز بعدد من الصفات المهمة واللي هتخلي فكرة طرحها بالأسواق المالية ممتازة
منها إنها مقاومة للتلف وصعبة في عمليات التزوير وعشان كده عمرها الافتراضي بيكون أطول.
