قبل ساعات من اجتماع البنك المركزي… السوق السوداء تقف على قدم وليس هذا فقط فإن سعر الدولار ينخفض خلال الأيام القادمة.
فهل ده ليه علاقة بانخفاص أسعار الدهب؟ واصلا الدولار في السوق كان بكام ووصل لكام؟ وهل التراجع ده مستمر ولا مؤقت والدولار هيعاود الصعود من تاني؟
ساعات ولجنة السياسة النقدية بالبنك المركزي هتجتمع عشان يحددوا سعر الفايدة، واللي اكيد ناس كتير منتظرين قرارتها اللي هتأثر بشكل كبير على حالة السوق المصري، وخصوصا مع اختلاف التوقعات بخصوص تثبيت سعر الفايدة أو رفعها والأهم من كده هيحصل تعويم للجنيه ولا لأ
تعال بقى بص على السوق السودة، هتلاقي الحذر الشديد هو العنوان، وحسب رؤساء في شركات الصرافة، بعد الإعلان عن إعفاء واردات الدهب من الجمارك حصل حاجتين في السوق حسب موقع مصرواي:
1 : تراجع أسعار الدهب و2: تراجع أسعار الدولار بنسبة طفيفة في السوق السودة، وده بعد ماكان سعر البيع والشراء يترواح من 38 إلى 40 جنيه.
واللي اكدته شركات الصرافة، إن في حالة هدوء وترقب مسيطرة على تعاملات بيع وشراء الدولار في السوق السودة قبل ساعات من اجتماع لجنة السياسة النقدية.
علاقة قرار اعفاء ورادات الدهب من الجمارك بتراجع الدولار
رئيس شركة صرافة قال إن قرار الحكومة بإعفاء واردات الدهب من الجمارك، قلل الطلب على الدولار من السوق السودة، واللي كان في إقبال على شرائه الفترة اللي فاتت.
سعر الدولار
بحسب موقع العربية اللي قال ان سعر الدولار في السوق السودا وصل لمرحلة الانهيار وده لأن سعره نزل من 42 جنيه لأقل من 38 جنيه في تعاملات الساعات الأخيرة.
أما بالنسبة للسوق الرسمي وسعر الدولار في البنوك فهو كان مستقر ووصل ل 30 جنيه و 85 قرش.ولو فاكر ان سبب تراجع الدولار هو انهيار الذهب بس تبقى غلطان طب ازاي؟
حسب موقع العربية، في ناس ربطت بين تراجع الدولار والتقدم اللي حصل في برنامج الطروحات الحكومية، لأن الدولة اعلنت عن إتمام صفقتين بيع خلال الأيام الأخيرة وهي شركة بكين، وبيع 10% من شركة المصرية للاتصالات.
وطبعا ده هيدخل دولار للبلد، عشان كده في ناس اعتبرت اللي حصل مؤشر ان ازمة نقص الدولار في السوق بدأت تتحل.
ومش بس الحكومة اللي بتتحرك عشان تحل أزمة الدولار، ده التجار كمان عملوا حملات لمقاطعة السوق السودا
منهم رابطة تجار السيارات تحت شعار ” ادعم الجنيه عملة بلدك”، واللي طلبت من المستوردين والوكلاء يوقفوا شراء الدولار من السوق السودة لمدة شهر.
وفي نفس الوقت، شعبة المحاجر أعلنت انها هتوقف استيراد الجرانيت والرخام من بره لمدة شهر وده لوقف الطلب على الدولار.
ودلوقتي قولنا رايك شايف ان الدولار سعره هينزل زي الدهب و لا لا؟
