منذ عامين، مصطفى قمر أعلن عن عمل جزء ثاني من حريم كريم، و في الأول كان الكلام إن كل الفنانات ستشارك من أول ياسمين وحتى ريهام عبد الغفور، و كانت المشكلة بالنسبة لهم ، كيف سيعوضوا دور طلعت زكريا بعد ما توفى، لكن فجاة الحوار اختفى .
لكن قبل رمضان ما ينتهي السنة ديه قالوا انهم خلاص هيبدأو تصوير، طيب ازاي و مين اللي هيشارك و هيتعرض امتى .. ده اللي هنعرفه مع بعض دلوقتي .
في أفلام كده بيبقى الحظ خادمها كويس أوي، طبعا مع الممثلين و العناصر الأساسية قصة و اخراج و كل الباكيدج على بعضها صح، فتلاقيه نجحت بشكل كبير، و أما تتعرض على التليفزيون بردو بتنجح، وده ساعات بيخلي المنتجين يفكروا يعملوا منها أجزاء تانية.
ولأن حسبة السينما مختلفة خالص عن الدراما. فمتلاقيش أفلام كتير بتعمل أجزاء تانية، وقليل أوي اللي عملوا و نجحت، علشان كده الجزء التاني ده بيبقى ريسك كبير اكل اللي بيشتغلوا فيه، و خصوصا لو فيلم معلق مع الناس، زي فيلم حريم كريم.
اللي اتعرض من ١٨ سنة، و حقق ايرادات كبيرة جدا، و أما اتعرض على التليفزيون، بردو بيحقق نسبة مشاهدة عالية، وهو بطولة مصطفى قمر، ياسمين عبد العزيز، بسمة، ريهام عبد الغفور، و أبطال تانيين كتير ،بقوا نجوم صف أول دلوقتي .
و اللي كانت قصته باختصار اتنين متجوزين بينفصلوا، و بيحاول الزوج انه يرجع مراته بكل الطرق، و بيرجع يفتكر صحابه البنات اللي كانوا معاه و بيطلب منهم انهم يساعدوه، و بتحصل بقى مواقف كوميدية كتيرة بينهم لحد ما بيتصالحوا ..
الفيلم في حد ذاته قصته ممكن متكونش جديدة، بس ده الحظ الحلو ليه، ومن سنتين لقينا مصطفى قمر بيعلن إن في جزء تاني، و إنه بيتفاوض مع نجوم الجزء الأول علشان يشتركوا معاه، بس كانت دائما السؤال عند الجمهور ازاي هتعوضوا مكان طلعت زكريا، بس الكلام مستمرش عليه كتير، لانهم فجأة قالوا هنأجل الفكرة لحد ما تحصل الاتفاقات .
وكل فترة الناس كانت تسأل ومكنش في إجابة، يإما يقولوا إن الفكرة خلاص مش هتتنفذ، أو لسه مفيش شركة إنتاج وافقت عليه. لحد شهر ديسمبر رجع الكلام تاني على الفيلم، و إنهم رجعوا للتحضيرات تاني، و لسه متحددش وقت بداية التصوير، و في شهر فبراير اللي فات مصطفى قمر قال خلاص هنبدأ تصوير الجزء التاني من حريم كريم، و بقى اسم الفيلم ” أولاد حريم كريم “.
بس الجزء ده مش هيكون فيه ياسمين عبد العزيز و ريهام عبد الغفور، و ده لأن ياسمين قالت انها شايفة إن دورها مش هيكون مؤثر، لكن ريهام اعتذرت لأنها مش بتحب تقدم أجزاء تانية من أي عمل هي قدمته.
لكن بسمة و علا غانم و مصطفى قمر و داليا البحيري و خالد سرحان، موجودين و يعتبر أصلا عودة بعد غياب اكل الفنانين دول، لأنهم بقالهم كتير مش بيعملوا أفلام .
و تركيزهم أكتر على الدراما، ده بعيدا أصلا عن علا غانم واللي كانت موقفة نشاطها الفني لفترة طويلة، سواء بسبب سفرها، أو بعد ما رجعت بسبب مشاكلها.
و علشان يكون في تجديد في القصة، في فنانين دخلوا جديد معاهم زي رنا رئيس و تيام مصطفى قمر و بيومي فؤاد، و تأليف زينب عزيز، و إخراج علي إدريس، و من إنتاج بشرى، وديه خطوة جريئة تتحسب ليها جدا.
و بدأو فعلا من أيام قليلة التصوير فيه، ونجاح الجزء الأول منه، بيحط الجزء التاني في ورطة، لأن الناس لسه في دماغهم الفيلم بكل تفاصيله، و الأغاني اللي فيه، و التحدي الأكبر هو عدم وجود الأبطال الاساسية زي ياسمين عبد العزيز .. و زي بردو الراحل طلعت زكريا، و اللي هو كان السبب الكبير للضحك في الفيلم ، عموما مش هنحكم على الفيلم من قبل ما نشوفه .
