موقف ميار الببلاوي في أزمتها الأخيرة مع وفاء مكي تذكرنا بالفنانة شيرين عبد الوهاب فدائما ما تضع نفسها في مأزق عندما تتحدث وهو ما تفعله ميار الببلاوي أيضا.
المرة دي الورطة كانت مع طليقها لما كشفت تفاصيل جديدة عن علاقته بالقضية اللي اتسجنت بسببها وفاء مكي زي ما هقولكم كده في الفيديو ده .. وبعدين لحقت نفسها وعالجت الموضوع ومش عارفين هي رايحة على فين وعاوزة إيه؟.
متعرفش الصمت
كلنا عارفين إن ميار الببلاوي هي اللي فتحت قضية تعذيب وفاء مكي لخادمتين عندها من 23 سنة واتسجنت بسبب ثبوت القضية عليها وقتها ومن وقت ما ميار فتحت الجرح ده من تاني وأزمتها مع وفاء مكي مش بتخلص تقول هسكت خلاص ومش هتكلم نلاقيها شغالة كل يومين تلاتة ظهور إعلامي او بوست على فيسبوك يقلب الدنيا.
طيب إمتى هتسكت وتنفذ كلامها محدش عارف كل اللي شايفينه إن الموضوع بيزيد وكل يوم في تفاصيل جديدة بتظهر بس اللي اتكشف المرة دي غير كل مرة خالص.
ورقة مضروبة
فاكرين الجواب اللي اتكلمت عنه وفاء مكي وقالت إنه وصلها من ميار الببلاوي بعد ما اتسجنت وإنه كان واجب عليها تروح تقدمه للنيابة.. ميار الببلاوي قالت إيه اللي يضمني إن النيابة تسكت عنها ومتحطهاش في الحبس لأن ده أصلًا جواب مش حقيقي وكان هزار.
تخيلوا الأعمار بتاعة الناس عادي بيتاجروا بيها كده عيني عينك وقتها ميار كان عندها 20 سنة ولسه مخلفة ابنها محمد، واعترفت ميار إن الجواب ده عبارة عن ورقة مضروبة طيب إيه سبب الكلام ده.
ورطة مع طليقها
ميار الببلاوي كتبت بوست على حسابها في فيسبوك من كام ساعة بتشتكي فيه إنها مش عارفة تخلص من أزمتها مع وفاء مكي والكلام عن قضيتها وكل ما تقول هسكت تلاقي كلام بيتقال ضدها ووفاء مش ساكتة.. وهنا اتدخل متابعين وطلبوا منها تسكت خالص والموضوع هينتهي لوحده فقالت إنها كل ما تسكت وفاء واللي معاها مش بيسكتوا وشايفين السبوبة حلوة ومش عاوزينها تخلص.
لكن في واحدة قالتلها المفروض مكنتيش تسكتي بس إنتي خوفتي على ابنك وده حقك بس كان لازم تشوفي حل عشان وفاء بردوا عاوزة تثبت برائتها وده حقها، تقول ميار الببلاوي تقع بلسانها وتقول ورقة التهديد اللي وصلتني مش دليل بتلوموا ليه وأنا كنت عروسة عندها 20 سنة وعندي ابن عاوزني أتطلق وابني يحصل ليه أذى وممكن أتحبس.. وكمان جواب التهديد ده كان لعبة من جوزي عشان أسافر معاه وأنا ارتحت واتأكدت إن الست دي مش بريئة وضميري ارتاح أوي.
هروب من المسؤولية
طبعًا ميار الببلاوي كملت في الحوار بتاعها وده وقالت ده موضوع بيني وبين جوزي عشان أسافر معاه وعرفت إن مفيش تهديد من الأساس وحرام عليا أشيل وزر البنات والرجوع للحق فضيلة.. المتابعة هنا بردوا مسكتتش وقالتلها إنتي قولتي الورقة حقيقية وابعتوها للطب الشرعي أنا سمعت كلامك كويس وإنك عاوزة تخلصي ضميرك وقولتي كمان إن في مسؤول كبير كان عاوز الضرر لوفاء مكي.. وهنا ميار الببلاوي هربت من المسؤولية وحذفت البوست بتاعها ولا كإن حاجة حصلت.
تفتكروا إيه السر اللي مخبياه وميار الببلاوي وهل ربطها الأمور ببعضها كده والكلام عن طليقها أبو ابنها يوطها في حاجة؟.. اكتبولنا آرائكم في الكومنتات.
