أسعار السلع ارتفعت خلال الفترة الأخيرة بشكل كبير جدا وده خلى ناس كتير تشتكي من ارتفاع الأسعار وبتفضل تسأل هي الأسعار هتفضل كده لأمتى؟
ويعني إيه معدلات التضخم اللي بنسمعها عنها دايما؟ ومعدل التضخم هيفضل يرتفع ولا ممكن ينخفض الفترة الجاية؟ وإيه سبب ارتفاع معدلات التضخم؟
معدلات التضخم خلال الشهور الأخيرة ارتفعت بشكل كبير جدا وده لأسباب كتيرة منها أزمة روسيا وأوكرانيا اللي أدت لنقص العملة اللي سببت في ارتفاع كبير لأسعار السلع.
لكن بحسب تقرير باسم “نمو الاقتصاد المصري يتعرض للعديد من الضغوط وسط استمرار ضعف الجنيه” الصادر عن بنك الكويت الوطني توقع إن معدل التضخم في مصر هيتراجع خلال الشهور الجاية وهيوصل لـ 29% و 31%
لكن بشرط إن ميحصلش أي تغيرات سياسية كبيرة في البلد وده لإنه البنك ربط توقعاته دي بشكل كبير بإجراءات الحكومة
وقال إن لو الحكومة قررت إنها تلتزم بسعر صرف مرن ده هيرفع معدلات التضخم تاني خلال السنه دي ده قال كمان إن ممكن العام المالي اللي جاي 2023 و 2024 معدلات التضخم تتراجع لـ 22% و 24%
وممكن يستمر الانخفاض ده لغاية 8% خلال العام المالي 2024 و 2025 وده برضو بشرط إن مفيش أي تغيرات سياسية تحصل في البلد
بس خد بالك تراجع معدلات التضخم مش معناه ان الأسعار ترخص، بس السؤال هنا هو يعني إيه تضخم؟
أنا أقولك بحسب بي بي سي ارتفاع معدل التضخم يعني زيادة أسعار السلع والخدمات الأساسية زي الأكل والبنزين والمواصلات و الملابس وده اللي بيأدي لرفع تكلفة المعيشة.
وبحسب مصراوي معدلات التضخم في مصر ارتفعت خلال الشهور الأخيرة وتجاوزت مستوى الـ 30% وده بسبب خفض سعر الجنيه قدام الدولار أخر 14 شهر، ده بالإضافة لارتفاع عدد من أسعار السلع الأساسية عالميا واللي انعكست على السوق المحلي.
بس لأول مرة من 10 شهور معدلات التضخم تبدأ تنخفض على مستوى الجمهوري في شهر إبريل واللي وصلت لـ 31.5% بعد ما كانت 33.9% في شهر مارس وده حسب بيانات الجهاز المركزي للتعبئة والإحصاء،أما على مستوى المدن فهو انخفض خلال شهر إبريل بمعدل 30.6% مقابل 32.7% خلال مارس.
وعلى فكرة تحرير سعر الصرف بعد ما الدولة وقفته في 2020 و 2021 ده أدى لارتفاع الدولار بقيمة 96% وبقي بـ 30 جنيه بدل من 15 جنيه السنة اللي فاتت وده كان السبب الرئيسي في ارتفاع معدلات التضخم
اللي وصلت لرقم محدش كان يتوقعه في شهر فبراير اللي فات وده لإن معدل التضخم ارتفاع لأكتر من 40% وده أعلى مستوى سجلته مصر من سنين حسب سكاي نيوز.
بس خد بالك، تراجع معدل التضخم مش معناه بالضرورة انخفاض الأسعار، لكن معناه ان الأسعار بتزيد بمعدلات أقل، يعني مثلا لو كانت السلعة بتزيد 10 جنيه في الشهر، ممكن تزيد 5 جنيه بس.
ودلوقتي بقى شاركونا بتوقعاتكم للأسعار وقوللنا إيه رأيكم: هيحصل استقرار في السوق؟ ولا الأسعار هتكمل جنون خصوصا لو حصل تخفيض جديد في قيمة الجنيه؟
