هل ممكن تتخلى عن الحجابمن أجل أن تحققي حلمك في الشهرة والفلوس؟ هذا ما فعلته الفنانة أسماء جلال التي بدأت موديل لملابس المحجبات ولكن فجأة خلعت الحجاب وتحولت للفن.
بس ياتري خلعت الحجاب إزاي؟ وهل ده من حقها؟ وياتري مين هو الممثل اللي أتجوزته؟.. كل ده هتعرفوه معانا في الفيديو ده .
كلنا شوفنا الفنانة الشابة أسماء جلال واللي على الرغم من أنها صغيرة إلا أن علاقتها بالميديا والإعلام كانت من بدري، لأنها أصلا خريجة كلية إعلام وبدأت حياتها وكانت محجبة وفي 2016 اشتغلت موديل لملابس المحجبات.
أسماء قدرت تحقق نجاح كبير في المجال ده واشتغلت مع برندات كتير لملابس المحجبات، اشهرهم براند مليكة، و صاحبة براند مليكة هي رضوي جلال اللي اتشهرت على السوشيال ميديا لانها متهمه في قضية نصب على الناس وهربت برا مصر.
لكن أثناء وهي شغالة في المجال ده اتعرفت على المخرج بيتر ميمي سنة 2017 ، و رشحها لدور في مسلسل “الأب الروحي”.. وطبعا الدور بيكون عايزها أنها تقلع الحجاب وهنا كانت المفارقة يا ترى هتعمل إيه.
أسماء مفكرتش كتير وقررت أنها تخلع الحجاب عشان تقدر تحقق حلمها في مجال التمثيل وتبقى فنانة مشهورة.. وبالفعل عملت الدور في الأب الروحي وكان الانطلاقة ليها وبعدين بدأت تشارك في المسلسلات بأدوار صغيرة زي “ظل الرئيس” و”نسر الصعيد”.
وعشان هي جميلة ووشها مألوف بدأت الأدوار تكتر والطلب عليها زاد ، وبدأت تشارك في أدوار أكبر لحد ما خدت دور البطلة ، وهو كان سبب الأنطلاقه الحقيقية في مسيرتها الفنية “مسلسل حكايات بنات الجزء الرابع” ، وبعدها عملت مسلسل “خلي بالك من زيزي” ومسلسل “الهرشة السابعة” مع أمينة خليل اللي اتعرض في رمضان 2023 .
وبالرغم من أن أهلها رفضوا دخولها المجال الفني إلا انها صممت وقالت هدخل يعني هدخل وبالفعل خلعت الحجاب و دخلت المجال وبقت تلبس الشفاف والمفتوح، وظهرت بملابس جريئة.
الغريبة أن بعض الناس شايفين أن عندها حق تعمل كده.. وطالما هي بتعمل حاجة بحريتها محددش له حاجة عندها.. سواء تخلع الحجاب أو تلبس ملابس مكشوفة.. وطالما هي شايفة أن ده الصح يبقى مش من حق حد يتدخل في حياتها.. في الوقت اللي في ناس كتيرة بتقول أنه غلط وكانت لازم تلتزم بالحجاب.
أسماء جلال الفترة الأخيرة ظهرت عليها أخبار كتيرة بارتباطها بالفنان أمير المصري واللي الكل قال إن أسماء جلال بتعيش قصة حب معاه وناوية تتجوزه، لحد ما طلع امير المصري خلال لقائه في برنامج “مساء dmc” وقال: “مفيش حاجة من الكلام ده، والسوشيال ميديا بيحبوا يكتشفوا حاجات جديدة وأنا مش الوحيد اللي حصل معايا كده”.
وقال كمان: “حتى الآن لسه ملقتش شريكة حياتي، ولما رجعت مصر قررت احقق أهدافي في الشغل ، وبفضل العقل على القلب في المسائل العاطفية، لأن العقل بيحافظ على الحب والاحترام، وده أهم شيء في العلاقات مش همي أوي الشكل، المهم تكون بتخلي بالها من نفسها، وجدعة وبتحب نفس الحاجات اللي أنا بحبها “.
دي كده حكاية الممثلة أسماء جلال.. شاركونا رأيكم في التعليقات وقولولنا هل قرارها في خلع الحجاب غلط؟ وهل ممكن تصلح غلطها في يوم وترجع للحجاب تاني؟ ولا هي عندها حق؟
