ضريبة الشهرة تكون كبيرا، وهي تؤثر بشكل كبير على حياة الفنانيين والمشاهيرا، وغالبا ما يتعرضوا لمواقف محرجة في الشوارع مع المعجبين، وفيما يلي في التقرير التالي سنكشف أبرز المواقف المحركة التي تعرض لها الفنانيين.
حد قالك تبقى فنان مشهور ولا حد قالك اعملي ماكياج وأظهر بيه في التلفزيون وإنتي في الحقيقة مش كده.. بس لو هنتكلم عن الجمال يبقى دي حاجة مش بإيدينا مش هينفع نقول حد قالك تبقي جميلة؟.. الفنان من دول عاوز يخرج الشارع يحس كأنه لوحده مثلاً بس ده مبيحصلش يا جماعة ده انتوا ممكن تدخلوا على السوشال ميديا دلوقتي والجمهور يتكلم معاكم وتتواصلوا معاهم عادي.
بس لو حد اتعرض لموقف محرج أهو بيكون ورا شاشة ويمكن من أكاونت ڤيك كمان بس عادي البلوك موجود.. لكن إن المواقف المحرجة دي تبقى عيني عينك في الشارع كده هتعمل إيه بقى بلوك على حياتك مثلاً.. لازم تتقبل وتتعامل عادي بقى ما هي دي ضريبة الشهرة.
الأب وبنته
الفنانة ليلى أحمد زاهر، مرة اتعرضت لموقف محرج وهي مع باباها الفنان أحمد زاهر.. ده كان في مكان عام جوه السينما المعروف عن زاهر إنه بيحترم جمهوره ومبيمنعش حد إنه يتصور معاه وكده أهو من باب الذكرى يا جدع لكن لحد “ليلى” بنته واستوب وقتها اتجمع حواليها معجبين عاوزين يتصوروا معاها وهي مش عارفة تتصرف راح باباها متدخل ومنع الكل عنها لحد ما وصلت لبر الأمان، وقام قايل “هو في إيه هو أنا لازم أمشي بجاردات يعني”.
مش أمورة خالص
دنيا سمير غانم مرة خرجت هي وصاحبتها الأنتيم من الجامعة ودخلوا قعدوا في أمان الله جوه عربيتها وهوب لقيت في وسها معجب أحرجها بطريقة محدش يتوقعها أصله قالها بحماس مش طبيعي كده هو حضرتك دنيا سمير غانم؟ قالتله أيوه..
قالها حضرتك بسم الله ما شاء الله ما شاء الله في التلفزيون أحلى بكتير.
يعني هي في الحقيقة وحشة ويمكن كتر الماكياج هو السبب اللي خلاه يشوفها كده.. ومش ده أول موقف مُحرج تتعرض ليه دنيا دي مرة بردوا كان فيه ولدين ماشين في الشارع لقيتهم بيقولوا مش دي دنيا سمير غانم .. لأ ياعم .. لا هي .. لا مش هي ياعم التانية أمورة.. يعني الراجل الأولاني كان كان شايف صح.
العاقل
في مرة الفنان كريم عبدالعزيز، كان رايح يعزي يسرا في مامتها اللي رحلت من قريب وهو معروف عنه إنه شخصية متواضعة وبيحترم نجوميته يبقى كمان هيحترم المعجبين والصراحة هو كان عاقل جدا لنا اتحط في موقف محرج وهو خارج من العزا .. وقتها طلب منه معجب إنه يتصور معاه بس كريم رفض بشياكة وقام مديله درس في الأخلاق وقاله يابني عيب إحنا في عزا .. ده مش مكان نتصور فيه وسابه ومشي.
مسكتلهاش
طبعًا بمجرد ما تشوف الفنان العالمي عمر الشريف في مكان مش هتسيبه غير لما تاخد معاه صورة أصله صاحب كاريزما وحضور واللي يفّوت فرصة زي دي معهوش حق الصراحة.
وقتها كان العالمي بيحضر مهرجان المسرح العربي واتجمع عليه المصورين والصحفيين عشان ياخدوا معاه لقاء بس هو رفض لكن واحدة من الصحفيين خرجت بره السياق المعروف وأصرت تعمل معاه لقاء ده أحرج عمر الشريف واتعصب وخرج عن شعوره وقام أحرجها هي كمان وقالها إن اللي بتعمله ده قلة أدب لدرجة إنه كان هيكسرلها المايك.
هنروح القسم
الفنانة هنا الزاهد معروف إنها جميلة وحلاوتها زيادة وده اللي خلاها تتحط في موقف محرج وهي ماشية بعربيتها في الشارع ومشي وراها تلاتة بعربية تانية والكلام على جمالها مبطلش وفضلت تتعاكس كتير لحد ما قدرت تهرب منهم ومسكتتش اعتبرت ده قلة ادب وحلفت تجيب حقها وقامت عاملة محضر والموضوع خلص في القسم.
نسيت إنها ممثلة
الفنانة هاجر الشرنوبي بقى كانت حكايتها حكاية مع معجب في الشارع وكانت مرة ماشية في الشارع راح واحد قالها يا شمامة.. وهي استغربت واتحرجت جداً وقعدت تفكر هو قالها ليه كده.. وعي بتكلمنا عن الموقف ده قالت أنا طبيعتي إني بنسى إني ممثلة بس هو الراجل ده يقصد دورها في مسلسل “لمس أكتاف”، لما عملت شخصية “صدفة” ودي كانت مدمنة ممنوعات.
في الأول قالت “مين ده؟ يا نهار أسود ده بيشبه عليا ده ولا إيه؟” .. وفين وفين لما افتكرت إنه يقصد المسلسل أصلها بتسّقط كتير وإن الناس ممكن تعرفها في الشارع عادي وده عاملها مشكلة.
