إن كنت تتخيل أن أسعار الكشري في مصر أصبحت مرتبفعة فأنت مخطئ بالتأكيد، ولا تعرف شئ عن أسعاره خارج مصر والتي تخطت مئات الجنيهات.
وده لأن واحد من أشهر محلات الكشري في مصر قرر أنه يفتح فرع في لندن، لكن الصدمة جت لما أعلن عن قايمة أسعاره اللي كتير مصدقش أنها تمن طبق كشري
بس يا ترا مين المحل ده؟ والناس علقت وقالت إيه على أسعاره؟ وأسعاره دي كام؟ ومين المحل التاني اللي قرر أنه يفتح فرع جديد في لندن؟
مين فينا مش بيعشق الكشري الأكلة المفضلة عند الكل المصريين و اللي ميختلفش عليها أتنين، بس مهما كان عشقك للكشري أنت ممكن تاكل طبق كشري تمنه أكتر من 500 جنيه يعني بتمن كيلو ونص لحمة تقريبا.
أيوة في طبق كشري تمنه أكتر من 500 جنيه، وكمان اللي بيعمله أشهر محلات الكشري في مصر، بس يا ترا إيه حكاية طبق الكشري ده ومين المحل اللي بيقدمه؟
بص يا سيدي، من فترة رواد مواقع التواصل الإجتماعي تداوله بعض المنشورات بأن كشري التحرير أخيرًا فتح أول فرع ليه في لندن وتحديدًا في شارع العرب
بس الصدمة بقى في أسعاره اللي وصلت لأرقام خيالية، يعني مثلا علبة الكشري الكبيرة تمنها 14 جنيه ونص إستراليني يعني 560 جنيه مصري، أما العلبة الأصغر فهي سعرها 12 جنيه إستراليني، يعني حوالي 466 جنيه مصري
أما سعر العلبة الوسط فهو 9 إستراليني ونص بالمصري كده هتساوي 370 جنيه، أما العلبة الصغيرة فهي سعرها 7 جنيه إسترليني يعني 275جنيه مصري
ده حتى كيس الدقة أو الشطة بجنيه وربع إستراليني يعني 46 جنيه مصري، أما بقى كيس الصلصة والتقلية و العدس فسعرهم بـ 2.40 جنيه إستراليني يعني 95 جنيه مصري
الأسعار دي صدمت ناس كتير أوي من رواد السوشيال ميديا وقالوا أن الأسعار مبالغ فيها جدا، ومنهم اللي قال أن سعر طبق الكشري الكبير تمنه أغلى بكتير من وجبة كباب في محل تركي أو وجبة شاورما وبيبسي من محل سوري اللي تمنهم مش بيتعدى 10 جنيه إستراليني
أما على الناحية التانية كتير من المصريين وغير المصريين كمان في لندن رحبوا بوجود المحل هناك وبدءوا ينزلوا إستوريهات ومنشورات خلال أكلهم للكشري في المطعم
ومكنش كشري التحرير بس هو اللي خد خطوة لإفتتاح فروعه بره مصر، ده كمان أبو طارق أشهر محلات مصر في الكشري خد الخطوة دي من سنين لما فتح أكتر من فرع ليه في السعودية وبعد كده فتح فرع تاني في دبي
الخطوة دي ناس كتير من المغتربين المصريين فرحوا بيها جدا ورحبوا بيها، عشان كده قرروا يمدوا فروعهم بره بشكل اكبر ويكون ليهم فرع في لندن
وده اللي أعلنه طارق زكي إبن مالك محلات أبو طارق، لجريدة الوطن خلال السنين اللي فاتت، لما قال إن خطة سلسلة محلات أبو طارق مش هتشمل المنطقة العربية بس، أحنا بنخطط لإفتتاح فرع تاني في لندن بعد فرع دبي
ودلوقتي قولنا رأيك في أسعار طبق الكشري بره مصر؟
