الصيف بدأ ومعه بدأت حفلات الساحل التي طبقة معينة في المجتمع، ومعظمهم يظهر بالمويوهات، لكن الغريبة أن هذه الحفلات معظمها يكون لمطربين المهرجاناتويطلبوهم بالاسم وهذا ما حدث في حفل حمو بيكا الذي أقيم على حمام سباحة، فما كواليس هذا الحفل؟ تابعونا لمعرفة التفاصيل:
الناس بقت مستغربة اللي بيحصل في الساحل يعني مش كفاية ارتفاع الأسعار اللي المشاهير والكبار في البلد بيشتكوا منه زي إزازة المية المعدنية! لأ ده الحفلات كمان بقت غريبة خالص بتتعمل على حمام السباحة وبيغني فيها مطربين المهرجانات.. والأغرب بقى من كل ده لما الناس تشوف الفيديوهات منتشرة والكل لابس مايوهات وبيرقص وعايش حياته عادي.. طبعاً أسعار الحفلات دي غالية جداً وبيحضرها الكبار بس.
ملتزم بالطقوس
طبعاً واحد زي حمو بيكا لما يروح يعمل حفلة في الساحل لازم يكون ملتزم بالطقوس إياها.. يعني تشوفه لابس التي شيرت والبرامودة والكوتشي وشوية الإكسسوارات بتوعه وواقف على المسرح يغني إنتي معلمة.. طبعاً المسرح صغير بس اللي حواليه عليه علامات استفهام كبيرة خالص.. اللي واقفين يحضروا الحفلة رجالة كبار وكلهم قالعين من فوق ولابسين المايوه وبس والرقص شغال والحياة إيزي ع الآخر.
التيك توك بقى هو المكان اللي الناس بتنشر فيه الفيديوهات الخاصة بيهم وبنلاقي الكبار في الحفلات دي بيرقصوا ويغنوا ومقضينها على الآخر من غير ما أي حد يضايقهم.. لكن الجمهور في مواقع التواصل مش بيتقبل الوضع ده وعلطول بيكون في هجوم على الناس اللي بتحضر الحفلات دي عشان بيعتبروها مش من عاداتنا وتقاليدنا خالص.
للكبار فقط!
الحفلات دي بقت للكبار وبس.. والكبار هنا يعني الناس الشباب الكبار وكمان الكبار اللي معاهم فلوس عشان هي بتكون حفلات على راحتهم خالص يعني كإنهم قاعدين في حمام السباحة بتاع فيللهم مثلًا.. بس الفرق بقى إنهم بيكونوا في حمام السباحة وبيسمعوا الأغاني لايف والمطرب بيغني قدامهم ومفيش مانع ياخدوا بريك كده ويطلعوا يقفوا قدام المسرح ويغنوا مع المطرب ويرقصوا كمان.. ومفيش مانع يعملوا كل حاجة عاوزينها في الحفلة دي لبسهم زي ما هما عاوزين ورقصهم على راحتهم وبيتجمع فيها الصحاب مع بعض وأهو شوية ينزلوا يعوموا وشوية يغنوا ويعيشوا حياتهم وهي دي المتعة بالنسبة لناس كتير بتروح الساحل.
خلينا نقول كمان إن في شواطئ موجودة في الساحل بقت مخصصة لسيدات المجتمع ومكتوب عليها كده إنها للسيدات وبس ودي بيتعمل فيها حفلات بيحضرها الستات وبس وبيكونوا على راحتهم زي ما شوفنا الحفلة اللي عملها حسن شاكوش في العيد وعملت قلبان والكل اتكلم عنها.. كمان في شواطئ في الساحل مخصصة للرجالة وبس وبردوا بيتعمل فيها حفلات مخصصة ليهم زي ما شوفنا في حفلة حمو بيكا.. ده غير الشواطئ بقى اللي خصصوها للعائلات وكل واحد يلاقي راحته.
