كل سنة يفاجئنا عمرو دياب بموضة جديدة ويعمل حركة من حركاته ، مرة في اللبس ومرة في الشعر والاستايل ، ومن زمان وهو يسيطر على حركة الموضة في مصر وكل ما يقوم به يقلده الشباب فيه.
الهضبة عايش حياته ومنطلق ومش فارق معاه السن ، فاهم الحياة صح وبيعمل اللي هو عايزه ، وبيبسط نفسه بس ومش بيهتم لاي انتقادات ، ويمكن ده السر اللي بيخلي عمرو دياب شكله دايما اصغر من سنه وكل الناس بتحسده وكل ما بيمر بيه العمر هو بيتحداه وبيعمل حاجة تصغره عشر سنين.
اليومين دول الهضبة طالعلنا بموضة كدا غريبة شويتين ، طبعا كلكو خدتوا بالكم منها ، بعد ماظهر في اخر حفلة عملها في الساحل وهو مربي شنبه ودقنه بشكل غريب ، الصراحة مش عارفين هو نسي يحلق ومكنش عنده وقت ، ولا هو سايبهم عن قصد بس فعلا الشكل غريب ومش متعودين على الهضبة كدا .. يارب متطلعش موضة.
ومن كام اسبوع كان كل مايظهر نلاقيه لابس نضارة كدا ليل ونهار ، وقولنا ده عمرو دياب كبر بقى ونظره ضعف ولبس نضارة نظر زي كل الناس ، لكن بعدها خلعها ومبقاش يظهر بيها تاني مش عارفين كانت موضة ولبسها شوية وخلاص ولا كانت نظر فعلا ، ماهو عمورة برضه يعمل اللي هو عايزه.
التغيير باين اوي في استايلات عمرو دياب ، وكل ما بيكبر كل مابيختار لبس معين يظهر بيه ، ولو ركزت معاه في الفترة الاخيرة هتلاقي بيختار شوية قمصان كدا رايقة من ماركات مختلفة ، وبقى بيحب اللون الابيض بزيادة وبيطقمه كله مع الشوز كمان.
حتى لما عمل حفل ضخم عشان يفتتح فندق لوكاندة مشروعه الجديد ، ملبسش فورمال ولاحتى بليزر ، ده لبس طقم كله ابيض في ابيض ، وقميص مخرم وحاجة في منتهى الكاجوال المصروف عليه ، وكمان في اخر حفلة في الساحل كان لابس برضه طقم كله ابيض في ابيض.
كمان مؤخرا الهضبة بقى يلبس اكسسوارات غريبة ، هو معروف ان معظم الرجالة بتحب تلبس سلسلة ودي موضة قديمة من زمان ، لكن عمرو كل فترة يظهرلنا بعقد غريب خاصة في اخر حفلة ، كانت فاتح القميص ولابس عقدين وعامل تاتو جديد مع الشنب بقى اللي مربيه فالناس استغربت شكله مؤخرا.
ومع ذلك ناس كتير بتقول ان عمرو دياب كبر وفعلا باين عليه مهما حاول يداري ، الا ان السن ليه احكام برضه ومهما عمل هيجي عليه وقت وخلاص مش هيقدر يعمل حاجة قدام العمر اللي بيجري ، ومش هيبقى اللبس والاستايل هو اللي هيصغره ، لكنه مازال محتفظ بليقاته لانه بيلعب رياضة باستمرار ومش بيعدي يوم الا ما يدخل الجيم.
عمرو دياب مر بمراحل كتير في موضوع اللبس والموضة ده من ايام البلوفر المشهور بتاع تملي معاك وكمان الايس كاب اللي جيل كامل لبسه بعديه.
وزمان في التسعينات كان عمرو دياب نشر برضه موضة الجاكيت الجلد المطرز ، والحزام اللي مليان كباسين كتير طبعا كلكم فاكرينه واكيد كان عندكم منه.
ومرت السنين واستمر عمرو دياب في السيطرة على الموضة برضه ، ولما بدأ يعمل تاتوهات على جسمه ، انتشرت برضه بين النجوم والشباب اللي قلدوه.
عمرو دياب دلوقتي عنده 61 سنة ، واللي زيه في السن ده مش بيكون شكلهم كدا خالص ، طبعا فلوس بقى واكل صحي ورياضة وحاجات كتير بيعملها الناس اللي معاهم فلوس كتير عشان يقدروا يحافظوا على شبابهم اطول فترة ممكنة.
لدرجة ان الاعلامي عمرو أديب مرة طلع على الهوا وفضل يحسد الهضبة وعرض فيديو ليه وهو بيلعب رياضة وكان ماشاءالله ولاكأنه عنده عشرين سنة وناس كتير هاجمت عمرو اديب بس طريقته في الكلام على الهضبة واعتبروها انها اوفر ومينفعش يعمل كدا على الهوا
شاركنا برأيك ،، هل عمرو دياب بدأ يبان عليه الكبر فعلاً ولا شايفينه لسة محافظ على شبابه ؟
