هيقطع على رأس الساعة لمدة ساعة، هذا ما قالته شركة الكهرباء في اخر بيان لها اصدرته من ساعات، ونجيب ساويرس كعادته لم يصمت وخرج يتكلم عما حدث لكن ياترى وزارة الكهربا ماذا تقصد في هذا البيان؟ وإما قصة ال 10 دقايق خطر جدا ؟
ازمة الكهربا لسه مستمرة وسببت مشاكل كتير لملايين الناس خصوصا وسط ارتفاع درجات الحرارة الكبير اللي احنا فيه، وده طبعا خلاهم يقدموا شكاوي كتير لوزارة الكهربا والمسئولين لكن لحد دلوقتي الازمة متحلتش.
بس وزارة الكهربا مسكتتش وطلعت اكتر من بيان بخصوص الازمة دي وكان اخر بيان ليها من ساعات، قالت فيه للمواطنين، أنه هيتم الالتزام بتطبيق نظام تخفيف الأحمال طبقًا للقدرات المطلوبة.
عشان كده هنبدء برنامج جديد هيتم فيه فصل الكهربا بمدة زمنية 10 دقائق قبل رأس الساعة و10 دقائق بعدها، ومدة الفصل دي مش هتزيد عن ساعة واحدة من وقت فصل التيار.
و طلبت الشركة من المواطنين عدم استخدام المصاعد في الوقت ده، ومن المفترض انه خلاص تم تنفيذ المواعيد دي يوم السبت.
بس هو معناه إيه الكلام ده؟
بص يا سيدي،المدير التنفيذي لجهاز تنظيم الكهرباء الأسبق حافظ سلماوي، شرح في برنامج كلمة اخيرة تفاصيل بيان شركة الكهرباء بخصوص مواعيد انقطاعها.
وقال أن الكلام ده معناه إن قطع التيار الكهربي هيكون مع رأس الساعة أو قبلها أو بعدها بـ10 دقائق، ولو محصلش قطع خلال المدة دي، فده معناه ان النور مش هيقطع الساعة دي.
وقال يعني على سبيل المثال، القطع المفروض يكون الساعة 10 بالضبط أو قبلها بـ 10 دقايق أو بعدها بـ10 دقايق، لو محصلش قطع الفترة دي، فده معناه إن مفيش قطع هيحصل خلال الساعة دي، طالما الساعة عدت 10:10 إنت في أمان ويبقى المنطقة خلاص مش هيتقطع عنها النور.
اما بقى عن طلب الشركة في عدم استخدام المصاعد هنا قال الفكرة أنهم يقصدوا محدش يستخدم حاجة زي الأسانسير عشان لو التيار الكهربي انقطع ده هيسبب مشكلة ليك عشان هيحجزك لحد ما النور يجي ، عشان كده الاحسن ان يكون في جدول بالأماكن الأكثر احتمال بقطع التيار الكهربي عنها.
اما ايمن حمزة المتحدث الرسمي لوزارة الكهربا فسر البيان ده في برنامج الحكاية مع عمرو اديب وقال بالنسبة للنظام اللي أعلنته الشركة القابضة للكهرباء معناه ان لو التيار ما قطعش الساعة 11:50 يبقى هيقطع 12:50″.
وعموما هو طمن المواطنين واعلن عن ميعاد حل الازمة وقال انه هيتم حلها في نص الاسبوع يعني كلها ايام ومحدش هيشتكي من الكهربا تاني.
وعلى فكرة ازمة الكهربا خلت الكل يتكلم لانها صابت الكل حتى أغنى اغنياء مصر زي رجل الاعمال نجيب ساويرس، واللي كعادته علق على الازمة دي بسخرية من خلال تدوينة ليه على تويتر.
وقال لما اتوفى أديسون مخترع الكهرباء سنة 1931 تم إطفاء جميع كهرباء العالم لمدة دقيقة تكريمًا له لكن مصر ولبنان لسه لحد دلوقتي بيكرموا الرجل ده كل يوم.
ودلوقتي قولنا الكهربا بتقطع عندك ولا لا؟
