في وسط سباق الشهادات الذي تعلن عنه البنوك هذه الأيام تجد مجموعة في منطقة خاصة بهم، وهذا لأنهم يبحثون عن شهادات ادخار إسلامية بمعنى إن أرباحها تخضع لأحكام الشريعة الإسلامية.
ولو انت من الناس دي وعايز تضمن إنك تحافظ على فلوسك وتستثمرها حسب الشريعة الاسلامية يبقي خليك معانا واحنا نقولك على شهادة جديدة هتديك عائد فـ البنك ده
شهادات الاستثمار الإسلامية بقت من أكتر المنتجات اللي بتطلب من العملاء وده لأنها بتتعامل وفقًا للشريعة الاسلامية في احتساب العائد بتاعها وفي مفاجأة أعلن عنها بنك فيصل الاسلامي المصري.
كشف فيها عن زيادة العائد التراكمي المتغير على شهادات الادخار السباعية نماء واللي وصلت لـ 19.25%
وطبعا اطمن وده لأن الشهادات دي بتخضع في معاملتها لأحكام الشريعة الإسلامية
وبيوصل العائد التراكمي عليها لـ 135% وده عند انتهاء مدة الشهادة بعد 7 سني، وتقدر تشتريها من اول 1000 جنيه ومضاعفاتها
مش بس كده ده كمان البنك قال على موقعه الرسمي إن احتساب العائد على الشهادة بيبدأ من أول شهر من تاريخ إصدارها
وإنه مبيتمش صرف العائد لكن بيتعاد استثمار قيمة الشهادة والعائد اللي اتحقق وهكذا ولحد نهاية أجلها، وده هيفيدك بإنه بيزودلك معدل العائد التراكمي اللي بيتحسب عليها.
وده لأنه حسب اللي أعلنه البنك فـ بيتم توجيه العائد الخاص بـ شهادة نماء الجديدة لـ تمويل عمليات استثمارية طويلة الأجل واللي بتدر عوائد مرتفعة، بيشغلو لك فلوسك يعني!
وده بيخلي أصحاب الشهادات دي عندهم ميزة مختلفه وهي إنهم بيقدروا ياخدو معدل عائد يعتبر أعلى من عوائد الأوعية الادخارية التانيه وده بسبب ثبات واستقرار الموارد المالية للشهادات دي.
طيب هل ده معناه إني لازم استنى 7 سنين عشان أقبض العائد بتاع الشهادة دي؟
لا يا سيدي وده لأن البنك أكد إن صاحب الشهادة يقدر ياخد 50% من العائد المجمع ليها بعد مرور 4 سنين بس، كمان يقدر يسترد قيمة الشهادة وأرباحها بعد مرور سنتين بس من تاريخ الإصدار، حسب جدول الاسترداد المعلن في البنك.
والمفاجأة بقى إن الشهادة دي مسموح يشتريها المصريين وكمان العرب والأجانب بدون حد أقصى سواء كانوا أفرادا أو مؤسسات كمان يجوز إنك تشتريها بأسماء الغير زي القصر.
كمان صاحب الشهادة يقدر يعمل عمليات استثمارية مع البنك بضمان الشهادة دي وبالشروط اللي بيحددها البنك. والمفاجأة إن صاحب الشهادة هيقدر يستفيد من فرصة ذهبية وهي إنه هيقدر يأدي مناسك العمرة.
وده لو فاز في السحب اللي بـ يجريه البنك مرتين في السنة بس بشرط واحد هو إن رصيدة ميقلش عن 5000 جنيه في الحساب.
ولو بتسأل عن أفضل البنوك اللي بتقدم شهادات ادخار إسلامية ؟
فـ بيتنافس بنك فيصل الإسلامي، والبركة، ومصرف أبوظبي الإسلامي – مصر، والمصرف المتحد على طرح شهادات تتوافق مع أحكام الشريعة في احتساب العائد المقدم عليها
ده غير إنه بدأت بعض البنوك التجارية زي بنك مصر والمصرف المتحد، إنها تقدم أوعية ادخار بتتوافق مع الشريعة الإسلامية ده طبعا غير الخدمات الأساسية اللي بتقدمها للعملاء
وده عشان تجذب شريحة معينة من العملاء بتفضل التعامل المصرفي وفق الشريعة.
دلوقتي قولنا رأيك في شهادة بنك فيصل الإسلامي وهل ممكن تفكر تشتريها ؟
