أحمد سعد عايش قصة حب جديدة.. تعرف عليها في الساحل الشمالي وهي السبب في خراب بيته وانفصاله عن مراته وأم بناته مصممة الأزياء علياء بسيوني.. هذا هو الكلام المتداول بشكل كبير على السوشال ميديا بعد ما أعلنت علياء انفصالها عن جوزها بعد جواز استمر سنتين.
إزاي أحمد سعد اتعرف على حبه الجديد في الساحل!د؟ وإيه حكاية إن في بينهم قصة حب جديدة وإنها السبب في شقلبة حياته وانفصاله عن زوجته علياء بسيوني؟ مين البنت الجديدة اللي يعرفها سعد؟ وإيه علاقتها بالوسط الفني؟.. خليكوا معايا في الفيديو ده هقولكم تفاصيل القصة كلها.
أحمد سعد اليومين دول حياته الفنية ملعلعة كلها نشاط وشغل عالي ونجاح مكسر الدنيا.. الكل شاهد على النجاح الكبير ده وفي كمان ناس ربطت بين نجاحه وبين استقراره الأسري بس تعالى أما أقولك بقى إن الاستقرار في الشغل خلاه يعيش قصة حب جديدة والاستقرار يتهز والبيت يخرب.. عاوزين تعرفوا كملوا معايا الفيديو للآخر.
نشاط فني واسع
الساحل الشمالي كان اختيار مطربين كتير الصيف ده عشان يحققوا نجاح كبير وطبعاً عشان حركة السياحة اشتغلت هناك واللي بيصيفوا كتير في أكتر من حفلة في اليوم وأحمد سعد كان بين المطربين دول زيه زي نجوم كتير ونجاحه يمكن كان بسرعة الصاروخ لدرجة إنه عدى فنانين كتير.. وحفلاته مكانتش في الساحل بس دي كانت في السعودية وتونس وغيرها.. وده كان طبيعي يأثر على بيته وأسرته وعلياء الفترة دي كانت مستحملة ومش بتتكلم كتير لكن لحد ما يكون في واحدة تانية يبقى الحكاية لازم يكون ليها وقفة.. علياء كانت مستحملة وجاية على نفسها لحد ما أحمد سعد خد قرار إنه يخرب بيته بنفسه وده عشان في حب جديد.
قصة الحب
أحمد سعد عايش قصة حب في الساحل وحياته كلها عبارة عن شغل وسهر وبيقعد في الساحل أكتر ما بيقعد في بيته مع مراته وبناته.. والسهرات في ناس شافوها وكانت مستمرة بشكل شبه يومي لدرجة إنه اتخانق مع مراته علياء بسيوني مرة في التليفون بسبب إنه مش أد مسؤولية وجود بيت وأسرة في حياته وقتها حياته بدأت تتغير أكتر والوضع فضل يتصعب لحد ما انتهى النهاية اللي مكانش حد يتوقعها.
والعهدة على موقع العاصمة الإخباري اللي قال إن سعد هو اللي كان راسم الطريق ده مش حد غيره.. وإن الحب الجديد دي فتاة لبنانية يونانية ولما مراته علياء بسيوني عرفت العلاقة دي اتخانقت معاه ولما حاول يداري الموضوع صوته كان عالي وحصل الانفصال.
صاحبة قصة الحب الجديدة
المعلومات دي انتشرت بين الجمهور من قبل ما يتم الإعلان عن انفصال علياء بسيوني عن أحمد سعد وفي جمهور كان رافض يصدق القصة لي اتقال إنها ممثلة لبنانية من أصول يونانية.. وإن أول حرف من اسمها (ت) والتاني (ع).. في كتير من جمهور أحمد سعد مندهش بشكل كبير وده علشان الموضوع كله غير متوقع بالمرة بس أهو حصل.. ويقال إن الفنانة دي ليها علاقة بالوسط الفني وأصحابها كتير وكمان في شلة بيتجمعوا فيها وبيكون موجود معاهم أحمد سعد.
انفصال أحمد سعد
علياء بسيوني كانت فاكرة إن الست اللي ضحت في العلاقة هتتقدر بس ملقتش تقدير وأعلنت انفصالها عن أحمد سعد وقالت إنها كافحت لوحدها وجاهدت عشان تكمل في علاقتها مع سعد ودبس أحمد اداها أكبر مقلب في العلاقة دي.. هي كانت فاهمة إن ليها قيمة أصل يعني واحدة عمالة تبني وتضحي وتتنازل عشان العلاقة تستمر هتستنى تقدير بس هو خلى العلاقة دي في الآخر ولا تسوى.. وقالت في رسالة أخيرة ليه ربنا معايا أنا وبناتي في اللي جاي وينتقم منك ويديلك على قد كل حاجة حصلت.
اللي محدش يعرفه بقى إن أحمد سعد وعلياء بسيوني كان فيه بينهم وبين بعض مشاكل وعدم تفاهم في حاجات كتير وأحمد مكانش بيشيل المسؤولية في حاجات كتير وجه على بيته على حساب شغله وحفلاته وسهراته.. والانفصال ده كان هيحصل من فترة بس الأمور وقتها عدت.
تفتكروا أحمد سعد ممكن يعلن عن قصة الحب الجديدة دي وتتحول لجواز رسمي وتبقى رقم 5 في حياته ولا هنتقاجئ بحاجات تانية؟ اكتبولي آرائكم في التعليقات.
