تثبيت الدولار لمدة 6 شهور عند سعر مفاجأة.. ومسؤول يكشف السعر الحقيقي للأخضر في مصر. لكن نجيب ساويرس بيحذر المصريين من خدعة الدولار.. فياتري ماذا قال؟ ومن بحدد سعر الدولار في مصر؟
كلنا عارفين ان الدولار بينزل بس في علامة استفهام: النزول ده حقيقي ولا فنكوش؟عشان تجاوب على السؤال ده.. لازم تبقى شايف سعر الدولار بعد فترة، وهل خلاص السوق هيثبت على كده ولا ممكن حاجه تحصل قدام تقلب الاحوال من تاني؟
وهنا بقى فخري الفقي رئيس لجنة الخطة والموازنة في مجلس النواب توقع ان سعر الدولار خلال ال6 شهور الجايين هيبقى عند مستوى 45 جنيه، وشايف ان ده الرقم اللي هيوازي ما بين سعر السوق وسعر البنك.
وبسبب الجدل الكتير حوالين فكرة السعر الحقيقي للدولار وان الجنيه مظلوم معانا لأن قيمته أعلى بكتير من دلوقتي.. الفقي قال ان السعر الحقيقي للأخضر هيظهر في حالة واحدة بس: لما السوق يرجع لطبيعته، وحركة البيع والشراء تشتغل زي الأول.
بس مبدئيا كده وبناء على مؤشرات السوق دلوقتي تقديرات رئيس لجنة الخطة والموازنة بتقول إن السعر العادل للدولار ما بين 35 و 40 جنيه.
كمان لازم تاخد في اعتبارك، إن استئناف المفاوضات مع صندوق النقد والحصول على تمويل إضافي، من أهم العوامل اللي هتحدد سعر الدولار الفترة الجاية.
وبرده رجل الأعمال نجيب ساويرس كان عنده رأي في هبوط الدولار اليومين اللي فاتوا بعد الاعلان رسميا عن صفقة راس الحكمة مع الإمارات..
وحسب الملياردير المصري.. كل الانخفاض اللي بيحصل في سعر الدولار دلوقتي اعتبره محصلش، والكلام اللي بجد هيبدأ لما تدخل أول دفعة من قيمة صفقة رأس مع الموافقة على الاعتمادات المتأخرة.
وصحيح الاتفاق ما بين مصر والامارات هيساعد على استقرار سعر الصرف في مصر لكن في الأول وفي الآخر لما تتكلم عن سعر الدولار تحديدا.. العبرة هتكون بحجم الدولار اللي محتاجه السوق و انت هتقدر توفره بكام.. وساعتها ده هيبقى السعر الحقيقي للدولار في مصر.
عشان كده ضروري تبص على حجم الدولارات اللي هتدخل البلد الفتره الجايه ومواعيد دخولها، وخلينا نبدأ بصفقة راس الحكمة لأنها الأكبر من حيث القيمة..
وحسب رئيس الوزراء.. اتفاقنا مع الامارات انها هتدفع 35 مليار دولار على دفعتين خلال شهرين.
الدفعه الاولى خلال أسبوع بقيمه 15 مليار دولار منهم 10 مليار هتحولهم الامارات لمصر. ومنهم 5 مليار دولار موجودين اصلا ودايع في البنك المركزي والامارات هتتنازل عنها.
أما الدفعه التانيه فهتكون خلال شهرين من الدفعز الأولى، وبرده متقسمه على جزئين: 14مليار دولار تحويل من الخارج، و6 مليار دولار ودائع.
ومن بعد كده ييجي الاتفاق مع صندوق النقد الدولي، اللي احنا بنتفاوض معاه حاليا عشان يزود قيمة القرض، ولغاية دلوقتي الوكالات العالمية بتتكلم عن زيادة قيمته إلى 10 أو 12 مليار دولار، خصوصا لو دخل مع الصندوق اطراف دولية تانية.
ودلوقتي دخل على الخط أخبار جديدة عن صفقة راس جميله المطلة على البحر الاحمر، والمعلومات المتوفره لغايه دلوقتي بتقول ان الصفقه قيمتها 15 مليار دولار وهيتم الاعلان عنها قبل رمضان.
واخيرا بقى لازم تعرف ان الدولار دلوقتي في السوق السودة يتحرك عند مستوى 50 جنيه أعلى أو أقل بجنيه أو اتنين.. فهل شايف انه هيثبت فعلا على 45 جنيه لمدة 6 شهور? ولا انت ايه توقعاتك لسعر الدولار؟
