في أول تعليق له عن الأخطاء الإخراجية التي وقع فيها المخرج بيتر ميمي، مخرج «كلبش 2»، أصدر بيانًا رد فيه على كل الانتقادات التي وُجهت له.
وكتب بيتر ميمي عبر حسابه الرسمي على عبر حسابه على موقع التواصل الاجتماعي «فيسبوك»، بيان جاء نصه كالتالي:
«أنا عادة مش برد على تعليقات لكن بقرأها وباخدها باهتمام للتطور وفعلا الحمد لله وبفضله التطور موجود من عمل لآخر ومن سنة لأخرى، لكن حبيت أرد على بعض التعليقات لأن فعلا نسبة مشاهدة كلبش أصبحت فوق المتوقع لدرجة أكبر بكتير كمان من رمضان السابق».
وأضاف «ميمي»: «عاكف أبو العز بيتحدث بلهجة صعيدية وأبوه بلهجة بدوية وده باين من أول حلقة متبقاش صعيدي زي اللي خلفتك وهنعرف مين اللي خلفته وليه مش أبوه اللي رباه في الحلقة 15 ومعانا مصحح لهجة بدوي ومصحح لهجة صعيدي للدقة».
وتابع: «ضابط الأمن الوطني ممكن يكون بدقن وشعر طويل عادى جدا وأنا راجعت ده بنفسي قبل التصوير من بعض الضباط وقيادات الداخلية وإحنا بناخد التصاريح للتصوير في أماكن حقيقية وحية مثل سجن طرة ومستشفى الشرطة».
واستطرد: «وضعية مسك الآلي ممكن تكون من الماسورة وأثناء الاشتباك ممكن تكون من الخزنة لسرعة تغيير الخزنة وكان معانا عميد من العمليات الخاصة أثناء تصوير المشاهد ديه والراجل كان بيدي المحاضرة ديه قدامى للضباط مع العلم إن المدرعات والمركبات والجنود والضباط هم حقيقيين من العمليات الخاصة».
وتابع «تراك جيم أوف ثرونس اللي في أول حلقة ده غلطة غير مقصودة لأن إحنا في المونتاج بنحط تراكات عالمية وبعدين بنشيلها في الميكساج ده بيحصل في كل الشغل والحلقة الأولى كان فيها 13 تراك من جيم أوف ثرونس تم تغييرهم بموسيقى المسلسل ونسيو واحد سهوا، وبعتذر على الخطأ غير المقصود برده لأني طلبت تغييرات في الحلقة أكثر من مرة كل شوية بعدل فيها وإحنا عاملين موسيقى للمسلسل مصر كلها عارفاها من السنة اللي فاتت».
واختتم البيان قائلا: «ابن سليم الأنصاري بيرضع كراوية مع أنه المفروض بيرضع ريد بول عادى.. حلقة 8 أنا عدت المشهد لما روجينا قالت (عمر) بدل (حسام) سهوا والمونتير من ضيق الوقت حط الشوت الغلط سهوا».
واستكمل «كلبش 2 بما فيه من أكشن وضخامة إنتاجية هيكون ولا حاجة بالنسبة للمشروع اللي تم تحديده للعام المقبل رمضان 2019 واللي هيكون الأضخم عربيا وبيضم مجموعة من نجوم عالميين من إنتاج شركة سينيرجى إن شاء لله، ادعولنا بقي إحنا بنحاول نطور الصناعة وانتظروا حرب كرموز في مصر والخليج وأوروبا (إيطاليا – ألمانيا – لندن)».
