أسرار من حياة الفنانة مونيا الزوجة الرابعة في عائلة الحاج متولي

حياتها مليئة تفاصيل كثيرة وصلت 53 سنة ومختفية من سنين ولا أحد فاكر لها شئ غير دورها في مسلسل الحاج متولي.. هذا الدور الذي أخذت فيه السوكسيه من ماجدة زكي وسمية الخشاب وغادة عبدالرازق.

اكتشفها الملحن بليغ حمدي ودخلت الفن على إيديه بعد ما كان معجب بغناها.. لأ وكمان هو اللي اختار لها اسمها الفني هي اسمها أصلا إيمان راح قالها إيمان إيه وبتاع إنتي من النهاردة اسمك مونيا وبقت من ساعتها كده.. الحياة ودتها وجابتها وشافت من الرجالة مرار طافح.. إيه اللي حصل مع مونيا وإيه حكايتها مع الرجالة وإزاي قبلت تكون زوجة تانية وحكايات تانية كتير هتتفاجئوا بيها زي حبيبها اللي سابته واتجوزت وكانت مستعدة ترجعله ويتجوزوا.. يلا بينا أقولكم كل حاجة في التقرير التالي:

تمثيل بالواسطة

مونيا قالت في مقابلة تلفزيونية ليها إن ها اتعرفت على الموسيقار الراحل بليغ حمدي في أحد الأفراح في اسكندرية ولما عرفت إنه موجود طلعت تجري تسلم عليه وترحب بيه وقابلها كويس جداً وهي غنت أغنية لعبدالحليم حافظ وعجبت بليغ حمدي وحصل موضوع اختيار اسم مونيا ليها ده.. مع الوقت كانت مونيا بتدرس في معهد الموسيقى العربية شافها منتج بدأ يتبنى موهبتها وكلام حلو وهدايا وشغل يعني غرقها ومخلهاش محتاجة حاجة .. يوم في التاني يعدوا لحد ما اتجوزوا والحياة جميلة لحد ما قدر يخليها تاخد دور حلو في مسلسل “عائلة الحاج متولي”.

بالأمر المباشر

كان ممكن مونيا متاخدش دورها في عائلة الحاج متولي خالص لولا الواسطة لأن أصلا نور الشريف مكانش هاضمها ولا كان متوقع إنها تقدم دور حلو بس جوزها المنتج ممدوح يوسف قدر يفرضها بالأمر المباشر على نور الشريف فالنجم اتحرج بس أول ما عملت بروفة شغل اقتنع بيها وكمان اتفردلها مساحة في الدور بتاعها كمان. وبقى المسلسل ده هو اللي محفور في تاريخها.. وطبعاً هي نجحت جداً في الدور ده وكمان الشر اللي كان بينط من عنيها بقى هو اللي الجمهور فاكره ليها.

زوجة تانية

ألفت الدور اللي اتشهرت بيه مونيا الزوجة الرابعة للحاج متولي، في للمسلسل قدر يعكس ملامح قصتها في الواقع يعني فيه شوية من حياتها الشخصية أصل هي قبلت تكون زوجة تانية.. آه والله عادي أصلها شايفة إن موضوع الزوجة التانية ليها حقوق زي كل الزوجات لكن نظرة المجتمع والحكم بيكون هو اللي مش صح ولو رجع بيها الزمن مش هتندم هي راضية بنصيبها وقرارها هو قرارها والحل عند المجتمع..

بتقول مونيا أنا جربت.. واتفاجئت إن في زوجة تانية في جوازتي التانية واتصدمت فعلًا عشان مكانش عندي علم ولما قولت خلاص عشان في طفل وفي عشرة والكلام ده أصل عرفت كمان إنها كانت حامل واتبعتلها الصورة بتاعة البيبي على الواتس بس الغريبة بقى إن الزوجة التانية كانت رافضة وجودها وخلت جوزها يطلقها والكلام ده حصل على الواتساب بسبب كده.فين حبيبها؟
مونيا كان ليها قصة حب في حياتها بس هي سابته واتجوزت غيره ورغم كده ندمت خالص على الخطوة دي وهي بتتمنى ترجع لحب حياتها اللي وقف جنبها كتير قبل جوازها ولو ولادي وافقوا أتجوزه أنا هوافق أصل مش قادرة أقول كان بيعمل عشاني إيه، ده كان بيخاف عليا جداً ولما بعمل حفلة يبقى عنده استعداد يأمني أنا وعيلتي وأهلي.

“نفسي اتطمن عليك وأعرف عنك أخبار كويسة.. يارب تكون عايش وأتمنى أسمع صوتك وتبعتلي إيميل زي ما كنت بتبعتلي وانت موجود في قلبي.. ولو مشيت من الدنيا هقولك ربنا يرحمك لأنك وقفت جانب مونيا كتير أوي وأنت حافظت عليا.

طيب عارفين بقى هو فين حبيبها دلوقتي؟.. قابلنا مونيا وقالتلنا إن حبيبها للأسف رحل وبقى غايب عن دنيتنا.. وقالت كمان إن اللي بلغها بالخبر ده ابنها.. وحالياً مونيا عملت ماجستير ودكتوراة وموجودة في أكاديمية الفنون وبتعمل مسرح غنائي واستعراضات.. وظهورها في مقابلة تلفزيونية من كام يوم كان بعد اختفاء 20 سنة.