المصور والبلوجر حسام أنتيكا يسجل رقم قياسي في سرعة اختيار شريكة حياته، وسرعة التخلص منها أيضا، 3 خطوبات منهم جوازتين، ولا تستمر واحدة منهم، لذلك فإن أغنيته المفضلة “ليه يا قلبي كل يوم بتحب واحدة.. ولسه مش لاقي اللي عاوزه في أي واحدة؟”
كلام كتير طلع في الساعات اللي فاتت عن انفصال البلوجر يارا بهنساوي عن المصور المشهور على السوشيال ميديا حسام أنتيكا.. في ايه اتجوزوا.. وفي ايه انفصلوا محدش عارف.. بس الحقيقة غير كد
حسام ويارا أصلا فاجئوا الناس كلها من حوالي شهر إنهم اتخطبوا.. بعد ما عملها البروبوسال اللذيذ في النيل.. واتصوروا الفيديو اللي جاب لايك وشير قااااد كده.. وهي أصلا كانت لابسة الخاتم قبل كده في فيديو ليها على انستجرام من قبلها بفترة.
بس احنا شربناهم بمزاجنا والناس قالوا إنهم حلوين أوي مع بعض وربنا يبارك لهم.. وهوبا خلال أيام كانوا محضرين للجواز.. وكاتبين الكتاب.. وعاملين فرح بسيط .. جنينة وشوية كراسي وحتتين جاتوه وسندوتش بسطرمة.. واتشعت على كده
يارا أصلا على قد ماهي لذيذة والجمهور على السوشيال ميديا بيحب فيديوهاتها بس مجنونة.. أو مسيكبة زي ما قالت على نفسها في الكلمة اللي قالتها في الفرح قدام حسام والمعازيم كلهم.. تخيلي كده تبقى حماتك واقفة.. وتقولي شكرا إنكوا مستحملين دماغي وأفكاري المسيكبة.. ويا حسام: مراتك مكنوناااااااااااا.
من أول ما قال حسام أنتيكا إنه هيتجوز يارا.. والناس كلها عمالة تفتكر صحيفة سوابقه مع الجواز والارتباط.. بينقيهم كلهم شبه بعض.. كل واحدة أصغر وأحلى من التانية أه.. بس كلهم شبه حبيبته الأولى.. اللي أصلا اتعرف واتشهر بسببها
قصة حب حسام أنتيكا الأولى اللي شكله لسه لحد النهارده مش قادر يتخطاها.. هي سلمى الكباريتي أو “سنجوب” اللي كانوا مرتبطين حوالي 7 سنين.. وكانوا قصة كفاح كبيرة جدا لغاية ما قدروا يتجوزوا.. شهد عليها مجتمع السوشيال ميديا كله
وفجأة بعد صور الفرح والحب الكبير الأول والأخير.. أعلنوا انفصالهم.. والخبر كان صدمة كبيرة لكل الناس اللي بتحبهم وفرشت معاهم شقتهم حتة حتة.. وعاشوا معاهم تفاصيل المعاناة لحد ما ينتصر الحب.. بس كل ده انتهى في لحظة وعملوا بلوكات وهي كتر خيرها عملت move on أسرع من أي حد
بعدها بفترة ارتبط حسام بواحدة تانية خالص وهي الإعلامية هند مدحت فاروق.. وكانت قراية فاتحة كده سريعة.. بس مكملتش.
ورغم إنها شبه سلمى ويارا.. إلا إن الخطوبة مكملتش ورجع سينجل تاني.. وكل ده وهو لسه عنده 25 سنة وربنا يستر والجوازة اللي مكملتش 10 أيام دي تكمل على خير.
