عيد اللحمة! هذا هو الاسم الذي اختاره المصريين لعيد الأضحى من سنين، وخصوصا انه موسم الاستهلاك فيه يزيد، لكن هل هذا سيكون الوضع في عيد الأضحى 2023؟
دلوقتي في أسعار خيالية لكيلو اللحمة وكل شوية الأسعار بتزيد فهل فعلا سعر الكيلو هيوصل إلى 350 جنيه؟طيب ليه؟! وإيه دور الحكومة في الازمة؟ وهل معقول اصحاب المحلات مش عاجبهم الأسعار وكمان عاوزين يقفلوها؟
في الشهور الأخيرة أسعار اللحمة بتزيد كل شوية، والمشكلة ان الزيادة لسة مستمرة، ده اللي قاله محمد وهبة رئيس شعبة القصابين، لما توقع وصول سعر الكيلو إلى 350 جنيه على عيد الأضحى المبارك واللي يعتبر موسم بيزيد فيها استهلاك اللحمة عن باقي الشهور، نقلا عن موقع جريدة الشروق.
وركع وقال: سعر اللحمة هيزيد لكن كام دي حاجة بتاعة ربنا.. يمكن ربنا يبعت لنا خير والأسعار متزيدش.. لازم نتعشم في ربنا ومناخدش كل حاجة بسلبية
سبب زيادة أسعار اللحوم
محمد وهبة قال إن مصر دولة غير منتجة للحوم ومعتمدة على الاستيراد من بره، وطبعا مع الظروف الحالية تكلفة الاستيراد بتزيد فالأسعار بتزيد.
وحسب كلامه، اللحوم الموجودة متكفيش استهلاك واحتياج المواطنين، ومتوسط سعر الكيلو حاليا يتراوح بين 250 جنيها و300 جنيه.
بس المفاجأة بقى إن الأسعار دي مش عاجبة أصحاب المحلات، طب ازاي؟
هيثم عبدالباسط نائب رئيس شعبة القصابين بالغرفة التجارية بالقاهرة، قال إن الأسعار غير مُرضية لأصحاب المحلات لأنها مش مناسبة لتكلفة الإنتاج..
لدرجة إن في محلات اضطرت تقفل، وفي ناس اقترحت ان الدولة تطلع قرار بغلق إلزامي لمدة شهرين لغاية مايحصل استقرار في سوق اللحوم.
رأي الحكومة في الأزمة؟
الدكتور إبراهيم عشماوي، مساعد أول وزير التموين، قال إن ارتفاع أسعار اللحوم سببه زيادة أسعارالأعلاف، ودلوقتي البيع بأسعار متفاوتة عند المحلات العادية من 280 جنيه إلى 290 جنيه، وفي السوبر ماركت بحوالي 400 جنيه، وفي نوعيات معينة وصلت إلى 500 جنيه.
دور الدولة
عشماوي قال إن الدولة دورها التدخل في السوق عشان تحافظ على حق الشريحة الأكبر من الناس، وفي إجراءات بدأت تاخدها زي البحث عن مصادر جديدة للحوم المستوردة زي الصومال وتشاد، وقريب هيتم تداول سلع في البورصة ومنها الاعلاف، وده هيكون ليه أثر في انخفاض الأسعار.
أما بقى لو بتدور على مكان تشتري اللحمة منه بسعر أرخص شوية من باقي السوق فعليك وعلى منافذ وزارة الزراعة لأنها بتقدم اللحمة بتخفيضات 30% عن المحلات العادية.
وحاليا سعر اللحوم البلدي الطازجة في منافذ وزارة الزراعة تتراوح من 190 إلى 240 جنيه للكيلو، وأسعار اللحوم المجمدة بتبدأ من 100 لـ 120 جنيه، حسب محمد القرش معاون وزير الزراعة واستصلاح الأراضي، في كلامه لموقع مصرواي.
ودلوقتي بقى شاركونا في التعليقات وقوللنا أسعار اللحمة في منطقتكم وصلت لكام؟ وهل فعلا أصحاب المحلات بيشتكوا هما كمان ولا المشكلة عند المواطن بس؟ واخيرا بقى جربتوا اللحمة من منافذ وزارة الزراعة ولا لسة؟
