إن كنت تريد أن تعف سبب أن شبح التعويم مازال يطاردنا، وكيف أن الحكومة قررت طرح 32 شركة للبيع ولكن لم يتم بيع ولا واحدة حتى الآن؟ اسئلة كتيرة يفكر فيها المصريين والإجابة كشفتها وكالة عالمية فردت كل الورق لكي نعرف ما يحدث، بس رد رئيس الوزرا مفاجأة!
وكاله موديز من اهم وكالات التصنيف الائتماني في العالم، عشان كده لما بتطلع اي تقرير بيسمع سواء هنا او للمستثمرين بره، وللسبب ده مهم أوي نشوف هي قالت إيه، والبداية من برنامج الطروحات الحكومية، طب ازاي؟
من المفترض إن البرنامج ده، هو الحلقة الرئيسية في برنامج الإصلاح الاقتصادي اللي اتفقت مع مصر صندوق النقد الدولي على تنفيذه.
والهدف من عمليات البيع هو سد نقص الدولار، وخصوصا ان الحكومة كانت مخططة لجمع 2 مليار بنهاية (يونيو 2023)، و4.6 مليار دولار تانيين في السنة المالية 2024.لكن زي مانت شايف لسة ده محصلش، طيب ليه؟
اولا: المستثمرين بقت شروطهم أصعب من الأول، وثانيا: فيه توقعات بخفض جديد في قيمة الجنيه، عشان كده المستثمرين مستنيين يشوفوا سعر الجنيه هيستقر على ايه؟
وده ياخدنا للسؤال التاني: ليه التعويم مش راضي يفارقنا؟ببساطة نقص الدولار في البنوك هو السبب، وطبعا مع تأخير عمليات البيع الأزمة بتزيد، وكل ده بيعمل ايه؟بيزود الضغط على الجنيه ويزود فرص انخفاضه من جديد بنسبة 20% تقريبا، وفي المقابل بيقلل قدرة مصر على سداد الديون.
أما بقى لو بتسأل إيه تأثير ده على الأسعار؟فحسب الوكالة انخفاض قيمة الجنيه مرة تانية هيرفع معدلات التضخم ويزود الأسعار وكمان هيرفع تكلفة الاقتراض المحلي.الفكرة كلها إن تعويم الجنيه فرصة لزيادة الاستثمار، لو استغليناه صح، ازاي؟
لأنه حسب محيي حافظ عضو اتحاد الصناعات:
خفض قيمة العملة المحلية أمام الأجنبية يجذب عشرات المستثمرين لانه بيحول فلوسه من الدولار إلى الجنيه المصري وبيدفع تكلفة المشروعات ومصاريف التشغيل من أجور ومرتبات وضرائب ورسوم وغيرها من التكلفة بالجنيه المصري مش الدولار، وده بيزود مكاسبه اكتر نقلا عن موقع اندبندنت عربية.
والخبر اللي يطمنك شوية، هو تصريح رئيس الوزرا في الساعات الأخيرة عن طرح 12 شركة تابعة للقوات المسلحة، بعد ماكانوا شركتين بس: صافي ووطنية.
والاكيد إن الدولة مكملة في برنامج الطروحات، لكن مش معنى كده انها تعلن عن تفاصيل المفاوضات بينها وبين المستثمرين أول بأول.
وأهم حاجة بقى لما رد على اخبار التعويم وقال إن الحكومة والبنك المركزي بيشتغلوا كل يوم مع بعض ومحافظ البنك المركزي بيقعد معايا أسبوعيا أكتر من مرة من غير ما نعلن، لأن وقتها هيتقال إن رئيس الوزراء قاعد مع المحافظ عشان هيبقى في تعويم للجنيه وتغيير لسعر العملة.
واللي أكده ان تغيير سعر العمله بيتم بضوابط محددة، والدوله ملتزمة بسداد كل اللي عليها رغم التقارير الكتير اللي اتكلمت عن صعوبه الوضع الاقتصادي في مصر وشككت في قدرتنا على سداد الديون.
ودلوقتي بقى قوللنا ايه رايكم في رد رئيس الوزراء على كل التقارير اللي بتأكد ان في تعويم قريب للجنيه؟
