ما هي السبائك البلدي وما سر انتشارها هذه الفترة في سوق الصاغة ولماذا حذرت شعبة الذهب منها؟؟ ، وهل لو اشتريت هذه السبيكة ستخسر فلوسك ؟، تابعنا لمعرفة التفاصيل:
الحلقة دى مهمة لكل عشاق المعدن الأصفر وده عشان تتجنبوا غش التجار وتعرفوا تشتروا السبائك بالمواصفات المظبوطة واللي تضمنلكم استثمار آمن مفيهوش أي خسارة
شعبة الدهب والمجوهرات بالاتحاد العام للغرف التجارية وجهت تحذير عاجل جدا للمواطنين من إنهم يشتروا السبائك البلدي واللي منتشرة دلوقتي في أسواق الدهب.
ومش بس كده، دي كمان أكدت إنه منتشر بيعها أكتر على مواقع التواصل الاجتماعي!
وهنا بقا نسأل أهم سؤال في حلقتنا النهاردة هو يعني إيه مصطلح السبائك البلدي؟
هقولك بص يا سيدي دي سبائك انتشرت في أسواق الدهب الفترة الأخيرة ودي سبايك غير اللي متعارف عليها زمان لأنها بتكون مش مدموغة ومش مطابقة للمواصفات المتعارف عليها.
وعشان كده شعبة الدهب والمجوهرات باتحاد الغرف التجارية حذرت المواطنين منها خصوصا وأنه بيتم شراءها أكتر على مواقع التواصل الاجتماعي وده بيضيع حقك كمواطن
والشعبة كمان أكدت إنه بيع السبائك البلدي يعتبر مش قانوني، كمان قالت إنها مش بتكون محدده العيار يعني انت بتشتري سبيكة دهب مش متأكد من العيار بتاعها وكمان مش عليها دمغة
ده غير كمان إن وزنها مش بيكون دقيق والارقام اللي بتكون مكتوبة عليها مش بتكون موثقة رسميا وده بيخليها غير صالحة للاستخدام
وطبعا ده مختلف تماما عن السبيكة العادية المتعارف عليها واللي بتكون محدده بعيار معين ووزن معين ومختومة ومدموغة
ونصحت شعبة الدهب المواطنين إنهم يبعدوا تماما عن السبائك البلدي دي أو أي سبيكة تكون مش مضمونة أو قانونية ومتكونش مطابقة للمعايير والمواصفات المتعارف عليها
طيب إزاي ممكن تتجنب الغش التجاري في السبائك الدهبية ؟
بص ياسيدي شعبة الدهب أكدت إن في شركات كتيرة معروفة في سوق الصاغة عندها القدرة على إنتاج السبائك الذهبية واللي بتكون مطابقة للمواصفات وبتخضع للمراقبة
وقالت إن المواصفات الصحيحة في السبائك الدهبية إنها بتكون عليها دمغة أصلية من مصلحة الدمغة
مش بس كده دي كمان بيكون عليها ختم المصنع المنتج ليها وبتكون متغلفة كويس
عشان كده خلي بالك لو قررت تشترى سبيكة لازم تاخد من المحل فاتورة موثقة وتتأكد من الختم اللي عليها، ومتشتريش أي دهب مش عليه الأختام والدمغة بتاعته .
ولو بتسأل عن أسعار سبائك الدهب بعد انتهاء موسم إجازة عيد الفطر المبارك فـ للأسف الأسعار ولعت نار
وده بعد ماسجل عيار 24 حوالي 3.086 جنيه
وعندك بقا سعر السبيكة الدهب وزن 2.5 جرام سجل 7258 جنيه
أما سعر سبيكة الدهب وزن 5 جرام فسجل 14570 جنيهوالسبيكة وزن 10 جرامات سجلت 29140 جنيه
أما السبيكة الدهب وزن 20 جرام فسجلت 58280 جنيه
كمان سعر أونصة الدهب وزن 31.1 جرام وصلت 90625 جنيه
وسعر سبيكة الذهب وزن 50 جرام سجلت 145700 جنيه
وأخيرا سعر سبيكة الدهب وزن 100 جرام سجل 291400 جنيه
دلوقتي قولنا هل بتفضل تشتري الدهب من سوق الصاغة ولا ممكن تخاطر وتشتري من على مواقع التواصل الاجتماعي؟ ويا تري سمعت عن السبائك البلدي دي قبل كده ؟
