45 جنيه؟ 50 جنيه؟، أم 70 جنيه للعلبة! المهم ان مزاد السجائر بدأ ومن يدفع أكثر يحصل على علبة سجائر، لكن المفاجأة الأخرى هو ارتفاع أسعار السجائر الأجنبي بشكل رسمي، فهل تساوت الأسعار مع السوق السوداء وهل الدور على السجائر المحلية؟
إعلان مهم من أكبر مسؤول في الشركة، فتعالوا نشوف مسلسل السجاير رايح بينا على فين؟في الساعات الأخيرة ، شركة فيليب موريس أعلنت زيادة رسمية بقيمة تترواح من 3 إلى 5 جنيه في العلبة الواحدة لأشهر أصناف السجاير الاجنبية في مصر.
ودلوقتي ارتفع سعر عبوة ميريت Merit بجميع أنواعها لتصل إلى 64 جنيه، وسجل سعر عبوة مارلبورو Marlboro بجميع أنواعها 59 جنيه،.
وكمان ارتفع سعر عبوة مارلبورو كرافتد بجميع أنواعها لتصل إلى 49 جنيه، وأخيرا وصل سعر عبوة ال أند ام L&M بجميع أنواعها إلى 42 جنيه.
فهل معنى كده ان الدور على السجاير المصري؟
بص يا سيدي هاني أمان الرئيس التنفيذي لشركه الشرقيه للدخان المنتج الاول الذكيه في مصر، أكد إن أسعار شركته ثابتة من مارس اللي فات وما حصلش فيها اي تغيير وهي 24 جنيه للعلبه الواحده اللي فيها وده ينطبق على سجاير كليوباترا وسوبر وغيرهل من السجاير الشعبية، وده حسب كلامه لبرنامج يحدث في مصر.
بس هنا لازم تاخد بالك من نقطه معينة، وهي كلام ابراهيم امبابي رئيس شعبه الدخان خلال الاسابيع اللي فاتت، واللي اكد ان الحكومه بتدرس تعديل الضريبة على السجاير والقرار لو اتنفذ سعر العلبة هيزيد من 2 ل 3 جنيه حد أقصى.
ونرجع تاني لهاني ميلاد اللي اتكلم عن ظاهره غريبة جدا في السوق المصري بتحصل بقى لها خمس سنين.
واللي بيحصل ان التجار في شهر يونيو من كل سنة يتوقعوا زياده الضريبه ومعاها رفع اسعار السجاير، فبالتالي بيفضلوا تخزينها لغايه إعلان الاسعار الجديدة.
وده اللي بيعمل نقص في حجم السجاير المعروضة بالسوق، و حسب كلامه ده بيحصل كل سنه بس دلوقتي الزيادة غير مبرره ومرتفعة جدا عن الواقع.
وطبيعي لما تسمع الأسباب دي كلها، تسأل طيب ده ذنب مين؟.
هاني امان، قال ان شعبه الدخان مش مسؤوله عن الزيادة، وابراهيم امبابي رئيس شعبه الدخان بيقول ان الحكومه ليها يد في الموضوع لأنها اتأخرت في اعلان قرار التعديل الضريبي وده شجع التجار على إنهم يخزنوا كميات اكبر فيعطشوا السوق
وحسب تصريحاته مع عمرو اديب كل ما الوقت بيعدي كل ما الأزمة بتزيد خصوصا ان في موزعين للسجاير بيلعبوا في السوق، ودلوقتي بقى في حيتان كبار للسجاير، ومشغلين تحتهم سمك صغير، وأغلب الفرق بين السعر الرسمي وسعر السوق السودة بيروح لجيب الكبار.
طيب هو سعر السجاير في السوق السودة بقى كام دلوقتي؟
بص ياسيدي حسب شعبة الدخان علبة الكليوباترا 45 جنيه وداخلة على 50 جنيه كمان، وأسعار سجاير إل إم أحمر وصلت لحوالي 70 جنيه في السوق ، حسب اخبار اليوم، وده حتى أعلى من سعرها الرسمي بعد الزيادة الجديدة وهو 42 جنيه.
واخيرا لو هندور على الحل، فالرئيس التنفيذي لشركة الشرقية للدخان، كشف عن مجموعة إجراءات جديدة هتاخدها الشركة عشان تضمن توفير السجاير في كل مكان وتقضي على عملية التخزين على قد ماتقدر.
فقولولنا أسعار السجاير وصلت عندكم لكام؟ وهل فعلا بدأت تشتري سجاير فرط زي ناقي ناس بتقول على السوشيال ميديا؟ وشايفين إيه المطلوب من الحكومة لحل الأزمة؟
