الاقتصاد الأقوى في العالم والمصدر الوحيد للدولار ولكن، أمريكا دلوقتي في ورطة بسبب خطر التخلف عن سداد الديون، ايوة زي ماسمعت أمريكا عندها مشكلة في الديون.
فياتري ايه اللي يحصل هناك وهل ده في صالحنا ولا ضدنا؟ هتتفاجئ لما تعرف حجم استثمارات الدول العربية في الديون الأمريكية ومنهم مصر.
في البداية لازم تعرف ان أمريكا فيها حزبين رئيسيين عكس بعض: الأول الديمقراطي وده منه بايدن رئيس أمريكا، والتاني الحزب الجمهوري وده صاحب الاغلبية في الكونجرس زي البرلمان عندنا كده.
نرجع بقى لأزمة الديون، هتلاقي حاجه في امريكا اسمها سقف الديون بمعنى ان الحكومه مسموح لها بالاقتراض لكن بشرط:
حجم القروض ما يعديش رقم معين والرقم ده حاليا يساوي 31.4 تريليون دولار. بس المشكله ان إدارة بايدن شايفة ان الرقم ده مش كفايه ومحتاجه فلوس اكتر عشان تسدد الفواتير اللي عليها ومستحقات الدائنين واجور الموظفين، بمعنى اوضح عاوزه تاخد قروض جديدة عشان تسدد اللي عليها وده يتطلب منها إيه؟
تروح للكونجرس وتقول له ارفع لي سقف الديون عن 31 تريليون دولار عشان اقدر اخد قروض جديدة. وطبعا الكونجرس مش موافق وشايف ان سياسات بايدن الغلط هي اللي وصلتهم للمرحله دي.
ووزارة الخزانة الامريكية قالت ان البلد هتدخل على كارثه لو موفتش بالديون اللي عليها؟ طيب ده تأثيره ايه على باقي العالم؟
صندوق النقد الدولي حذر من الأزمة وقال انه هيكون في تداعيات خطيرة للغاية لو أمريكا اتخلفت عن السداد، وده مش بس على أمريكا ولكن على العالم.
لماذا؟
ببساطة أمريكا هي أول اقتصاد في العالم، وطبيعي الدول التانية تتأثر لو حصل فيها مشكلة، كمان لو دورت على حجم الثقة الموجود في سندات الخزانة اللي بتطلعها الدول عشان تستلف بيها هتلاقي سندات الخزانة الأمريكية هي الأكتر ثقة وأمان بالنسبة للمستثمرين على مدار السنين اللي فاتت فلما يفقدوا الثقة فيها، ده معناه انخفاض قيمتها وصعوبة حصول، المقترضين على الفوايد، وكمان انهيار سوق الأوراق المالية في العالم كله.
من هم أبرز المستثمرين في سندات الخزانة الأمريكية؟
حسب موقع مباشر، اليابان في المركز الأول وبعدها الصين وبريطانيا، وعربيا تيجي السعودية في المركز الاول ب111.7 مليار دولار ومن بعدها الإمارات والعراق والكويت.
أما استثمار مصر في سندات الخزانة الأميركية سجل حوالي 1.127 مليار دولار، في يناير 2023، حسب موقع العربية
هل أمريكا فعلا ممكن تتخلف عن سداد ديونها؟
في الحقيقة دي مش اول مرة الإدارة الأمريكية تطلب من الكونجرس رفع سقف الديون، وفي كل مرة بتحصل خناقة بس في الاخر الكونجرس بيوافق، وتم رفع سقف الديون 25 مرة على مدار 40 سنة، حسب موقع أرقام
لكن المرة دي الأزمة أصعب شوية والخبرا مختلفين، وحتى اللي شايف إن الكونجرس هيوافق بيأكد ان أزمة ديون أمريكا بتهدد العالم في اي وقت، لكن الوصول لمرحلة الافلاس مستبعد يحصل.
انتوا بقي رايكم إيه؟
