بعد زيادة أسعار السلع التموينية ، الكثير منا يسأل عن إن كان هذا هو القرار الأخير، أم سيتبعة قرارات أخرى؟ وما مصير الـ 100 جنيه قيمة الدعم الاستثنائي الذي تصرفة التموين؟ تابعونا لمعرفة التفاصيل الكاملة:
مصريين بالملايين لسة مصرفوش تموين شهر مايو ومستنين يفهموا إيه اللي هيحصل بعد زيادة أسعار السلع التموينية، عشان كده خلينا نبدأ بأول سؤال: هل قيمة الدعم هتتغير سواء بالزيادة أو النقصان؟
الاجابة لأ، ووزير التموين أكد ان حصة المواطن من الدعم 50 جنيه بس، يشتري بيهم اللي محتاجه، طيب إيه حكاية ال100 جنيه الدعم الزيادة؟
بص ياسيدي الوزارة من السنة اللي فاتت بتصرف دعم استثنائي على بطاقات التموين للأسر الأولى بالرعاية.
وحسب الحصر اللي عملته الحكومة في حوالي 35 مليون مواطن مستفيدين من الدعم الاستثنائي واللي متقسم إلى 3 شرائح هي: 100 جنيه للبطاقة اللي عليها أسرة واحدة، و200 جنيه للبطاقة اللي عليها اسرتين أو تلاتة، و300 جنيه للبطاقة اللي عليها اكتر من 3 أسر…
وهنا في سؤال مهم، الحكومة هتتصرف ازاي مع الدعم الاستثنائي: هل ممكن تلغيه مع قرارات الزيادة ولا بالعكس هتمده لفترة أطول؟
حسب كلام الوزير، الدعم الاستثنائي ده آخره نهاية يونيو الجاي بس، وده نقلا عن مصرواي.يعني بكل بساطة، قيمة الدعم على بطاقاتك هي هي متغيرتش على الأقل لغاية نهاية يونيو الجاي، وساعتها هنتأكد وزارة التموين الدعم الاستثنائي ولا لأ.
ودلوقتي بقى في سؤال تاني: البطاقة الواحدة تجيب كام إزازة زيت وكام كيلو سكر أو رز؟
طبعا دلوقتي الأسعار زادت بقيمة تبدأ من ربع جنيه لغاية 9 جنيه، فعندك مثلا السكر: سعره أصبح 12.60 جنيه للكيلو بدلا من 10 جنيه ونص.
وإزازة الزيت 800 مل سعرها زاد 5 جنيه وهتشتريه بـ 30 جنيه بدلا من 25 جنيه.كمان كيلو الرز سعره ارتفع الى 12 جنيه و60 قرش بدلا من 10 جنيه ونص.
بس اكتر سلعة سعرها زاد هي العدس، النص كيلو كان ب12 جنيه، ودلوقتي سعره 21 جنيه، يعني زاد 9 جنيه.
وحسب موقع اليوم السابع، النظام القديم وقبل زيادة الأسعار نصيب الفرد من السلع التموينية، لغاية شهر أبريل كان كالتالي:
صرف 2 كيلو سكر للفرد في البطاقات بحد أقصى 8 كيلو للبطاقة.إزازة زيت للفرد بحد أقصى 4 ازايز زيت للبطاقة.مع صرف كيلو واحد أرز حتى 3 أفراد علي البطاقة، ولو في أكتر من 3 أفراد يبقى ليهم 2 كيلو رز.
سبب زيادة أسعار السلع التموينية
ببساطه شديده لان التكلفه زادت على الحكومه مع ارتفاع اسعار السلع الاساسيه زي الحبوب والقمح عالميا.وفي نفس الوقت وزير التموين قال ان فيه شكاوي كتير وصلت له بأن الناس بتروح تصرف التموين متلاقيش زيت ولا سكر ولا رز وده بيحصل ليه؟
لأن في فرق كبير بين سعر السلع في التموين وسعر السلعه برة في السوق العادي، عشان كده في ناس بتستغل سلع التموين لصالحها وتمنعها عن المواطنين اللي يستحقوها بجد. ويبيعوها هما بسعر عالي ويكسبوا فيها.
وما متقلقوش. مساعد وزير التموين ابراهيم عشماوي قال ان قرارات الزيادات دي كانت تصحيحيه وعمرها ما هتوصل لسعر السلع في السوق الحر.
فقوللنا بقى لو صرفتوا تموين شهر مايو أو تعرفوا حد استلمه فعلا، هل البقالين غيروا في الكمية اللي بيصرفوها للمواطنين؟
