سنة جديدة بدأت نتمنى أن لا تكون مثل السنة التي كانت قبلها، وخاصة فيما يخص أسعار السلع، وخاصة أن شهر رمضان اقترب، فهل الحكومة مستعدة لعام 2023؟ وما خطتها لكي نجد السلع الأساسية مثل السكر والزيت بسعر مناسب؟
من ساعة ما حسن عبد الله محافظ البنك المركزي أعلن إلغاء العمل بنظام الاعتمادات المستندية والحكومة وعدت بالإفراج واحنا كمصريين عيننا على حاجتين: الدولار والأسعار، هيحصل فيهم ايه؟
اهو مصطفى مدبولي رئيس الوزرا راح بنفسه مينا اسكندرية عشان يتابع عملية الإفراج عن البضايع المحجوزة وقال انه من اول ديسمبر لغاية دلوقتي الحكومة أفرجت عن سلع ب7 مليار دولار، وده جزء من 14 مليار دولار قيمة إجمالية لكل السلع في مواني مصر.
يعني كده المفروض مع الوقت حجة نقص السلع فى السوق تنتهي والأسعار تنزل، خصوصا ان الحكومة خدت إجراءات تانية عشان تظبط السوق.
يعني سبق وادت التجار مهلة اسبوعين عشان يكتبوا الأسعار على اي سلعة ببيعها، ومع دخول السنة الحديدة مدبولي أكد إن المهلة انتهت واتحاد الغرف التجارية بيتابع حركة السوق كل يوم عشان يبلغ الحكومة بأسعار السلع الأساسية.
وبناء عليه، الكل دلوقتي ملزم يعلن عن الأسعار بتاعته ولو خالف الأسعار اللي بيقولها الاتحاد هيلاقي الحكومة واقفة في وشه، بس ده ميمنعش ان رئيس الوزار ليه طلب عند المصريين وعاوزهم يساعدوه.
والحكاية ومافيها ان مفيش شارع في مصر تقريبا مفيهوش سوبر ماركت أو حتى كشك يعني بنتكلم عن مئات الالاف من المنافذ وصعب على الحكومة توصل لكل المناطق، عشان كده لو لقيت أي تاجر بيبيع بأسعار مبالغ فيها كلم حماية المستهلك، شكاوى الوزرا، المهم تبلغ عنه.
وعشان يطمن الناس اكتر، مدبولي أكد إن الحكومة عندها خطة مع البنك المركزي لتوفير الدولارات اللي محتاجها للإفراج عن كل البضايع اللي المصانع محتاجاها طول 2023، وحركة الصناعة في مصر هترجع تشتغل تاني بنسبة 100%.
كمان في خطة لسداد المؤخرات الخاصة باستيراد البضائع مع البنك المركزي، ودايما في تواصل مع البنوك لحل مشاكل الاستيراد.
ولو قلقانين من الأسعار في رمضان، الحكومة بتقول انها مستعدة لتوفير كل السلع لبعد رمضان، ودلوقتي في 200 شادر على مستوى المحافظات مع المنافذ لعرض البضائع بأسعار مخفضة وتم الاتفاق مع السلاسل الكبرى لعرض السلع المخفضة دي.
ضيف على كده كمان، معارض اهلا رمضان واللي هتقدم السلع الأساسية زي الزيت والسكر والرز بخصومات بتوصل الي 35% وكل محافظة هيبقى فيها 5 معارض على الاقل، وفي محافظات تانية هيوصل عدد المعارض فيها إلى 20 و30 معرض حسب الكثافة السكانية لكل محافظة.
انتوا بقي قوللنا شايفين إيه السعر المناسب لسلع أساسية زي الزيت والسكر وغيره، وعشان تشتروا اللي يكفيكم طول الشهر بتدفعوا كام؟
