الكل يريد أن يعرف ما تفكر به الحكومة نحو القادم وما خطتها من أجل مواجهة ارتفاع الأسعار؟ إن كنت تريد الإجابة على هذه التساؤلات عليك بالنظر إلى الأرقام وتحديدا ارقام الموازنه الجديدة، والتي على اساسها الدوله تحدد طريقة الإنفاق، تابعونا في التقرير التالي سنكشف العديد من الأرقام التي تهم كل مواطن:
السنه العاديه بتبدأ من يناير لديسمبر، بس الحكومة معتمدة على حاجة اسمها السنة المالية، ودي بتبدأ من 1 يوليو لغايه 30 يونيو السنه اللي بعدها.
يعني السنه المالية الجديدة هتبدأ من 1 يوليو 2023 لغايه 30 يونيو 2024.طيب ده يهمنا في ايه؟
الحكومه ياسيدي قبل كل سنه مالية جديدة بتقدم تقرير لمجلس النواب، بتوضح فيه إيرادات البلد وهتتصرف في ايه وكمان حجم الديون اللي عليها ونسبه العجز اللي عندنا.
والتقرير ده بقى لما بيتوافق عليه بيبقى اسمه ال موازنه.وهنا بقى يجي السؤال التاني: الحكومه ناوية على ايه في السنة الجديدة؟
بص يا سيدي مصروفات البلد المتوقعة في السنة الجديدة 3 تريليون جنيه، لكن الايرادات 2.1 تريليون جنيه يعني بنتكلم في عجز حوالي تريليون جنيه.
نصيب الدعم من ال3 التريليون
127.7 مليار جنيه لدعم السلع التموينية، و 14.1 مليار جنيه للتأمين الصحي والأدوية وعلاج غير القادرين على نفقة الدولة
وكمان عندك 10.2 مليار جنيه لدعم الإسكان الاجتماعى و28 مليار جنيه لدعم وتنمية الصادرات.
ده غير 3.5 مليار جنيه لتوصيل الغاز الطبيعى للمنازل، و119.4 مليار جنيه لدعم المواد البترولية، و31 مليار جنيه لتمويل برامج «الضمان الاجتماعي وتكافل وكرامة، ولاصحاب المعاشات ، في 202 مليار جنيه مساهمات لصناديق المعاشات.
وإجمالا كده، وزير الماليه محمد معيط قال ان الحكومه هترفع موازنه الدعم والحمايه الاجتماعيه زي معاش تكافل وكرامه وغيره من 358,4 مليار جنيه إلى 529.7 مليار جنيه.
يعني زيادة حوالي 48,8%، وده للتخفيف عن المواطنين في ظل ارتفاع التضخم في العالم كله.فهل معنى كده، إن حصتك في التموين هتزيد عن 50 جنيه مثلا؟
لغايه دلوقتي وزير التمرين الدكتور علي مصيلحي اكد ان حصه الفرد هي 50 جنيه ثابتة مش هتتغير لا بالزياده ولا بالنقصان.
سبب زيادة سعر السلع التموينية
ابراهيم عشماوي مساعد اول وزير التموين رد على السؤال ده، وقال إن أسعار السلع الاستراتيجية زي الزيت والقمح والحبوب ارتفعت بسبب ارتفاع الأسعار العالمية، وكمان مصروفات الشحن والتأمين.
وطبعا ده زود التكلفه على الحكومة فكان لازم تصحح الاسعار علشان تقدر تكمل في استيراد المنتجات دي وتضمن وجودها في السوق.
كمان وزاره الماليه قالت انه رفع سعر السولار بسبب زياده الاسعار عالميا برضه وكمان ارتفاع سعر الدولار امام الجنيه.
ودلوقتي قولوا لنا بقى ايه رايكم في تعامل الحكومة مع ارتفاع الأسعار؟ وهل زيادة الدعم في السنة الجديدة هتخفف من الازمة؟ شاركونا في التعليقات.
