نشتري ذهب ولا نبيع؟ وما هو الأكثر مكسب الدلار أم الذهب؟ سوف نوضح مت حدث في 2022 لكي تتعرف بنفسك على الافضل لك لكي تحفظ قيمة مالك فتابعونا.
سنه بالتمام والكمال عدت على المصريين بعد قرار طارق عامر في مارس 2022 بأول خفض في قيمه الجنيه بعد سنتين من استقرار سعره امام الدولار.
ومن ساعتها عينك ما تشوف الا النور، شهر ورا شهر والجنيه سعره في النازل اةَتلدولار طبعا في الطالع، ومش هو بس الدهب كمان سجل اسعار جنونيه.
وبلغة الارقام الدولار في 20 مارس 2022 كان 15 جنيه و74 قرس للشراء، بص عليه دلوقتي بقي هتلاقيه معدي ال30 جنيه وداخل على ال31 جنيه.
يعني بنتكلم في ارتفاع سعر الدولار بنسبة كبيرة تعدي 96٪، وياريتها هتقف لغاية هنا، ده في بنوك عالمية متوقعة انخفاض جديد في قيمة الجنيه عشان يسجل الدولار على نهاية مارس حوالي 35 جنيه، زي بنك سوسيتيه جنرال الفرنسي كده.
وحتى في العقود الآجلة، المستثمرين بيشتروا ويبيعوا الدولار على اساس ان سعره بعد 12 شهر هيوصل إلى 40 جنيه لكل دولار.
بص بقى على قيمة الدهب، هتلاقي حالته عكس الجنيه تماما، وطبعا معروف ان المعدن الاصفر هو الملاذ الآمن في أي حتة من العالم عشان تحافظ على قيمة فلوسك خصوصا لو في وقت أزمة.
عشان كده، الصراع بين روسيا واوكرانيا لما بدأ، الدهب خد في وشه ومسألش في حد، انت متخيل ان جرام عيار 21 في 20 مارس 2022 كان سعره 892 جنيه، ودلوقتي سعره معدي ال2000 جنيه.
وصحيح كان في فترات هبوط لسعر الدهب بس عمره ما نزل أبدا عن ال 1000 جنيه، واهو بعد مرور سنة كاملة قيمته زادت بنسبة 130% تقريبا.
والأرقام دي تبينلك حاجه واحدة: الاستثمار في الدهب والدولار كان اختيار كسبان في 2022 بس الدهب كان مكسبه أكبر، فهل ده هيبقى نفس الوضع في 2023؟
بص يا سيدي بنوك عالميه شايفه ان الدهب هيفضل حصان الاستثمار الرابح السنة الحالية ومش بعيد سعر الاوقيه يعدي 3000 دولار، وطبعا ده مرهون بتحركات الفيدرالي الامريكي بخصوص سعر الفايده على الدولار.
والمتوقع إن امريكا هتبدأ تقلل من معدلات رفع الفايده او تثبتها خلال النص التاني من 2023.
وطبعا مننساش الصدمة اللي خدها العالم كله بعد افلاس بنك سيليكون فالي عشان تنتقل عدوى الانهيار لبنوك امريكيه تانيه وتاخد في سكتها بنك كريد سويس اكبر تاني مصرف في سويسرا.
حركة زي دي ما كانتش في الحسبان وزودت من مخاوف المستثمرين وخلتهم قلقانين من الاستثمار في السندات الامريكيه عشان يدوروا على استثمار آمن اكتر فيروحوا لمين؟ الدهب طبعا ما فيش غيره
ودلوقتي بقى ييجي السؤال المهم هل ده وقت مناسب عشان تشتري دهب ولا تبيع؟
الآراء هنا اختلفت: يعني مثلا هاني ابو الفتوح الخبير الاقتصادي قاللك الفتره دي فتره صعود ومحدش بيشتري الدهب وسعر في الطالع، يبقى الافضل تستنى شويه سعره ينزل وتشتريه.
لكن شعبة الدهب بتقول اشتروا وما تقلقوش، الدهب طول عمره استثمار آمن، والاكيد هنا ان الدهب استثمار متوسط وطويل الاجل يعني عشان تكسب منه محتاج تصبر عليه سنه واتنين وتلاتة، وفي الآخر القرار ليك.
