كل عام وانت بخير، شهر رمضان على الأبواب ولكن المشكلة في ياكيش رمضان وارتفاع اسعارة بنسبة 60% فهل سنشتري مثل كل عام ان سيكون مقتصر على الاغنياء فقط هذا العام، تابعونا لمعرفة اهم التفاصيل من خلال التقرير التالي:
هتبص يمين شمال هتلاقي الدولار في وشك، حتى في شوية البلح والذبيب اللي كنت بتشتريهم كل سنة في رمضان. هو ده اللي قاله مجدي توفيق نائب رئيس شعبة العطارة، لما كشف عن ارتفاع أسعار الياميش بنسبة تتراوح بين 30 و60% والسبب في كده ايه؟
مصر بتستورد 100% من الياميش من تركيا وغيرها من الدول، ومع ارتفاع الدولار وكسره حاجز ال30 جنيه طبعا الأسعار هتزيد.
ضيف على كده كمان إن الكميات المستوردة السنة دي أقل من السنين اللي فاتت، وطبعا ده هيقلل المعروض في السوق وفي المقابل برضه الأسعار هتزيد.
وبالفعل بدأت محلات العطارة في عرض الياميش للبيع، بس الشعبة بتتوقع تراجع حجم المبيعات للأسباب اللي وضحناها.
أسعار الياميش
وحاليا أسعار الياميش كالتالي:
كيلو البندق واللوز إلى بين 250 و260 جنيه مقابل 200 و220 جنيه السنة اللي فاتت.
وسعر كيلو القراصية ارتفع إلى 230 جنيه مقابل 140 جنيه، والمشمية ب380 جنيه مقابل 220 جنيه.
وسعر كيلو الزبيب المستورد ب 120 جنيه مقابل 90 جنيه.
أما أسعار كيلو البلح بين 20 جنيهًا و100 جنيه، بحسب النوع.
ومع الأسعار دي، شعبة العطارة شايفة ان اللي كان بيشتروا 3 كيلو من صنف واحد دلوقتي هيشتري كيلو، كيلو ونص بالكتير.
كمان أحمد شيحة عضو شعبة المستوردين بالاتحاد العام للغرف التجارية، توقع زيادة أسعار ياميش رمضان بعد ارتفاع سعر الدولار بحوالي الضعف، وبنسبة %50 مقارنة بالسنة اللي فاتت.
وضيف على كده كمان وجود غرامات أرضيات على بعض البضايع، وده كله هيرفع أسعار المنتجات في النهاية زي ماقال.وحسب كلامه في زيادة حوالي %80 بأسعار الفستق عشان يتحرك سعره من 400 إلى 700 و800 جنيه للكيلو، وكمان الكاجو.
وخلال الاسابيع الأخيرة ظهرت شائعات بنية الحكومة بفرض تعريفية جمركية جديدة على السلع الكمالية مع أزمة الدولار الحالية، ومن ضمن السلع دي ياميش رمضان باعتباره سلعة ترفيهية غير أساسية.
بس الحكومة نفت الكلام ده كله وأكدت انه مفيش اي تعريفات جمركية جديدة، خصوصا ان إجراء أي تعديلات فى التعريفة الجمركية ميتمش إلا بصدور قرار جمهوري وموافقة مجلس النواب، وده محصلش.
وفي نفس الوقت راهنت الحكومة على وعي الشعب اللي هيقف قدام اي شائعة عاوزة تقضي على استقرار مصر وتسبب الفوضى فيها.
انتوا بقى قوللنا الياميش نزل في المحلات اللي في منطقتكم ولا لسة؟ ولو نزل الأسعار كام؟ وزادت قد إيه عن السنة اللي فاتت؟ فعلا 50 و60%؟ طيب هتشتروا السنة دي ولا يدوب الميزانية تغطي السلع الأساسية؟
