الدولار هيوصل ل25 جنيه.. مفاجأة مدوية بخصوص مصير الجنيه خلال الفترة الجاية، والسبب: قرض جديد من صندوق النقد الدولي!
ودا يرجعنا لسنة 2016 لما حصل تعويم للجنيه، ويخلينا نقف ونسأل: ايه علاقة الصندوق بالجنيه المصري؟ وهل فعلا الصندوق طلب خفض قيمته مقابل الدولار؟ طيب على كدا سعر الدولار الفترة الجاية هيبقى كام؟ ومين اللي قال إنه هيوصل ل25 جنيه؟
خليكوا معنا عشان تعرفوا كل التفاصيل
بعد ماسعر الدولار في البنوك كسر حاجز ال19 جنيه، خرجت تحليلات كتيرة في الفترة الأخيرة تنبأت بوصول سعر الدولار الى 20 جنيه مع نهاية السنة، لكن الخبير الاقتصادي على الإدريسي كان ليه تحليل متشائم اكتر.
الإدريسي توقع ان سعر الدرلار ممكن يقفز إلى 23 و 24 أو حتى 25 جنيه، والسبب من وجهة نظره عوامل كتيرة منها اللي ليه علاقة بقوة الدولار عالميا ومنها عوامل مرتبطة بظروف مصر المحلية ومن ضمنها مفاوضات الحكومة مع صندوق النقد الدولي للحصول على قرض جديد..
طيب إيه علاقة صندوق النقد بسعر صرف الدولار أمام الجنيه؟
الصندوق اصدر تقرير من كام يوم، طالب فيه مصر انها تنفذ خطوات حاسمة بخصوص مجموعة أكبر من الإصلاحات المالية والهيكلية
وبحسب تقرير صندوق النقد، فمصر احتمال تكون معرضة للصدمات الخارجية بسبب ارتفاع الديون الحالية، وفي نفس الوقت احتياجها لتمويلات كبيرة.
كمان الصندوق اتكلم عن التغيرات في سعر الصرف الجنيه في الفترة الأخيرة، واتكلم عن خفص المركزي لقيمة الجنيه بأكتر من 20% مقابل الدولار الأميركية، بعد أزمة أوكرانيا.
وعلى حسب الإدريسي، كتير من الاراء والتقارير الإعلامية فسرت حديث الصندوق عن الإصلاحات المالية والهيكلية، بأنه طلب لإعادة تقييم سعر الجنيه أمام الدولار..
ودا ممكن يكون مؤشر لتحرك الحكومة والبنك المركزي لخفض قيمة الجنيه الفترة الجاية
كمان هاني توفيق الخبير الاقتصادي أكد أن تراجع قيمة الجنيه حاليا مالوش علاقة بحجم العرض والطلب على الدولار.
ومن وجهة نظره، فاللي بيحصل دلوقتي هو تحريك للعملة على استحياء.
توفيق وضح إن صندوق النقد الدولي بيطالب دايما بالإفصاح عن القيمة الحقيقية العادلة للعملة المحلية في الأسواق الدولية.
وبناء على كدا فالصندوق بيطلب أن سعر الدولار يكون في مستوى أعلى من المستويات الحالية، ويوصل إلى 21.5 جنيه وحتى 22 جنيه في سبيل الموافقة على القرض.
الخبير الاقتصادي ختم كلامه بأن صندوق النقد بيعتمد على توقعات المؤسسات المالية الدولية المتخصصة، عشان يحدد السعر المناسب للعملة المحلية أمام الدول
طيب هل تم الإعلان عن قيمة قرض الصندوق؟
حتى الآن مافيش اي إعلان رسمي عن قيمة القرض ، لكن وزير المالية محمد معيط نفى صحة التقارير اللي بتقول ان قسمة القرض 15 مليار دولار وأكد ان الرقم أقل من كدا بكتير.
ولو بصينا على رحلة الجنيه خلال السنوات الاخيرة، هنلاقي ان في أكتوبر 2016، السوق السودا كانت مسيطرة تماما على سوق الصرف وعدي سعر الدولار ساعتها 18 جنيه في مقابل 8.88 جنيه في السوق الرسمي.
بعدها في شهر نوفمبر قرر البنك المركزي تعويم الحنيه، وحدد سعر الدولار عند 13 جنيه، لكن الدولار استمر في الارتفاع بالبنوك لغاية ماسجل 20 جنيه.
ولو ركزنا هنلاقي ان التعويم كان ضمن برنامج الإصلاح الاقتصادي، ودا كان تزامنا مع الحصول على قرض من الصندوق بقيمة 12 مليار دولار في شهر نوفمبر برضه، عشان كدا البعض بيربط بين قرض الصندوق وخفض قيمة الجنيه
لكن تدريجيا بدأ سعر الدولار ينزل لغاية ماوصل إلى
15.65 جنيه للدولار في مارس اللي فات، قبل ماالمركزي يقرر خفض قيمة الجنيه بحوالي 17% عشان يسجل الدولار حوالي 18 جنيه.
ومن هنا استمرت الزيادة لغاية وقتنا الحالي.
انت كمان قولوا لنا توقعاتكم لسعر الدولار الايام الجايه وهل فعلا الصندوق ليه دور في القرار ولا دي مجرد توقعات؟ في انتظار تعليقاتكم
