تم طرح شهادة ادخار جديدة خلال الساعات القادمة، ولكن بعض الشروط، فإن كان معك أموال وتريد الاستثمار تابعنا لمعرفة أفضل شهادات الاستثمار باعلى عائد من خلال التقرير التالي:
معاك قرشين ومحتار تعمل فيهم ايه؟ عندك حق لأن كل يوم والتاني البنوك بتنزل شهادة ادخار بتفاصيل مختلفة.
وخلال الساعات اللي فاتت نزلت اجدد شهادة، فخليك معانا عشان تعرف ايه شروطها، وايه الفرق بينها وباقي الشهادات في البنوك التانية.
لسة البنوك بتتسابق على طرح شهادات ادخار بفايدة مرتفعة عشان تنافس الشهادات الجديدة اللي نزلها بنكي الأهلي ومصر بعد قرار البنك المركزي برفع الفايدة 2 %.
ودلوقتي المصرف المتحد أعلن عن طرح شهادة النخبة الاستثمارية.. شهادة جديدة متوافقة مع احكام الشريعة بعائد سنوي 19% متغير يصرف من تحت حساب التسوية.
وبحسب بيان البنك، الشهادة مدتها 3 سنوات، والعائد شهري ، والحد الأدنى للشراء 1000 جنيه ومضاعفاتها.
كمان تقدر تاخد تمويل متوافق مع احكام الشريعة بضمان الشهادة، وتقدر تشتري شهادة النخبة من 68 فرع للمصرف المتحد منتشرين على مستوى الجمهورية.
ولو مش عاوز تضرب مشوار للبنك تقدر تشتريها اونلاين من خلال خدمة الموبيل البنكي أو الانترنت البنكي أو موقع المصرف المتحد على النت.
بس دلوقتي في سؤال: إيه الفرق بين شهادة المصرف المتحد وباقي الشهادات الجديدة؟اولا الشهادة متوافقة مع احكام الشريعة الإسلامية، ثانيا لو هنبص على سعر الفايدة، تقدر تقارنها مع 7 شهادات رئيسية
الأولى شهادة بنكي الأهلي ومصر، ودي متوفرة من خلال اختيارين:
الأول فايدة 19% ثابتة طول ال3 سنين بعائد شهري، والتاني عائد شهري برضه بس بفايدة متناقضة بواقع 22% اول سنة و18% تاني سنة، و16% تالت سنة.
وعندك برضه الشهادة التانية وهي شهادة الأوائل من بنك قطر الوطني الأهلي QNB لمدة 3 سنوات وفايدة 19.25% لو العائد سنوي، أو 19.10% لو العائد ربع سنوي، واخيرا 19% للعائد الشهري.بس خلي بالك، الحد الأدنى لشراء الشهادة 500 ألف جنيه.
أما الشهادة التالتة فدي موجودة في بنك القاهرة بفايدة 19.25% للعائد السنوي ، و19% للعائد الشهري، و19.10% للعائد الربع سنوي والحد الادني للشراء 10 آلاف جنيه.
وفي كمان الشهادة الرابعة وهي شهادة الخير من البنك الزراعي المصري، بسعر فايدة 19% لو العائد شهري، و19.5% لو العائد نصف سنوي.
وأخيرا بنك cib أعلن عن 3 شهادات ادخار جديدة بعائد شهري 18% للشهادة برايم وبحد أدنى للشراء 10 آلاف جنيه ومضاعفات 1000 جنيه.
و19% للشهادة بلس، وبحد أدنى للشراء 200 ألف جنيه ومضاعفات الألف جنيه.و20% للشهادة بريميوم وبحد أدنى للشراء مليون جنيه ومضاعفات ألف جنيه.
ودلوقتي قولنا بقى على اي اساس هتختار الشهادة اللي تربط فيها فلوسك؟ وهل شايف العائد اللي بتقدمها البنوك مناسب بمعدل التضخم في مصر.. شاركونا في التعليقات.
