هل ممكن أن يصل سعر الدولار إلى 30 جنيه الأيام القادمة؟ خاصة بعد ما حدث الفترة الأخيرة وتخطي حاجز الـ27 جنيه، وهو ما تسبب في قلق كبير للمصريين، هذه التوقعات جاءت من مؤسسات تصنيف عالمية توقعت استمرار ارتفاع سعر الدولار خلال الاسابيع القادمة، فهل ممكن يرتفع فعلا ؟، وما تأثير هذا على المصريين؟ هذا ما سنتعرف عليه من خلال التالي:
هو إحنا ليه ليه كل مال الدولار بيزيد والجنيه بيتراجع بنتأثر؟ الحقيقى إن تراجع الجنيه قدام الدولار بالشكل السريع جدا ده عمل حالة من القلق لكل المصريين خاصة إنه خلاص ارتبط في ذهنهم إنه مع ارتفاع الدولار بيكون في ارتفاعات في كل السلع.
في البداية انت لازم تفهم إن مصر عندها نوعين من السلع سلع حرة ودي اللي بيرتبط سعرها بسعر السوق بمعنى إنها بتتأثر بنقص الدولار وارتفاع سعره فـ البنوك.
أما النوع التاني فهو السلع المدعمة وهنا بقى بتتدخل الحكومة بشكل مباشر وتدعمها زي مثلا البنزين وأسعار تذاكر المترو وأسعار سلع التموين زي الزيت والسكر والأرز والخبز، واللي غالبًا الحكومة بتحرك الأسعار دي بشكل محدود كل فترة وتقريبا مش بتقرب ناحية العيش خالص وده لأنه اكتر سلعة بتهم كل المواطنين خاصة محدودي الدخل.
هل الجنيه يستمر في الانخفاض؟
خبراء الاقتصاد قالو إنه متوقع يحصل استقرار في سعر صرف الجنيه مع بداية الربع التاني من 2023، وده لأسباب كتير منها قدرة شهادات الـ25% اللي طرحها البنك الأهلي ومصر على خفض التضخم وسحب السيولة من المواطنين، وده الهدف منه تقليل تحويل المدخرات لدولارت، غير كمان التدفقات الدولارية اللي هتحصل عليها الحكومة من بيع بعض الأصول والسندات غير كمان باقي فلوس قرض صندوق النقد الدولي وكل ده طبعا هيزود حصيلة مصر الدولارية .
وكده الدولار سيقل أم يزيد؟
مؤسسات اقتصاد دولية رفعت توقعاتها الأيام اللي فاتت لسعر الدولار مقابل الجنيه، مثلا بنك اتش اس بي سي، قال في تقرير ليه إنه بيتوقع إن الدولار يوصل لـ 32.5 جنيه في الأيام الجاية، وكان الكلام ده غريب جدًا لأنه من فترة كان متوقع إنه يسجل 26 جنيه بس.
ومع بداية 2023، المصريين كانوا شاهدين على حدوث موجة شديدة من الانخفاضات الحادة في أسعار صرف واللي اتسببت في ارتفاع سعر الدولار لـ 27.15 جنيه.
والتحركات السريعة دي في سعر الصرف بدأت علطول بعد أيام من قرار لجنة السياسة النقدية بالبنك المركزي برفع أسعار الفائدة لتصل 16.25% للإيداع و17.25% للإقراض، وبعد الموافقة النهائية لصندوق النقد الدولي على برنامج قرض جديد لمصر
تفتكروا بقى ممكن نشوف موجة ارتفاعات تانيه لأسعار الدولار خلال الأيام الجاية؟
