التعويم الكامل للجنيه سيحدث قبل 16 ديسمبر! مفاجأة البطل فيها صندوق النقد الدولي، فهل هذا الأمر حقيقي، ولماذا في هذا الموعد بالتحديد؟ وما هو مصير الاجتماع الاستثنائي للبنك المركزي الذي يتحدث عنه الجميع وما سببه؟ كل هذا سنتعرف عليه من خلال التقرير التالي:
خلاص الخبر اللي كنا مستنينه حصل، ودلوقتي صندوق النقد حد تاريخ 16 ديسمبر عشان يناقش الموافقه النهائيه على القرض اللي مصر مقدمة عليه.
وكانت مصر اتفقت مع الصندوق على مجموعة تمويلات بقيمه اجماليه 9 مليار دولار، منهم ثلاثه مليار من صندوق نقد نفسه، وملياردولار من صندوق الاستدامه التابع له، وخمسة مليار من مجموعة من شركاء الدوليين والاقليميين.
ولما ناخذ الموافقة النهائية، هنقدر نصرف اول شريحه من القرض بقيمة 750 مليون دولار، ودا يتناسب مع تصريحات وزير الماليه محمد معيط واللي توقع فيها استلام الشريحة الأولى خلال الشهر ده.
وطبعا انت دلوقت بتسال ليه قلنا ان التعويم قبل 16 ديسمبر؟
بص يا سيدي كتير من الخبرا والمصادر بيتوقعوا ان البنك المركزي يعمل اجتماع استثنائي قبل الحصول على موافقه صندوق النقد عشان يعلن عن مجموعه قرارات مصرية اهمها التعويم الكامل للجنيه. طيب ليه؟
المصادر بتقول ان صندوق النقد الدولي بيطالب مصر بمرونه اكبر في سعر الصرف، ودي معناها بلغه الشارع بتاعتنا ان البنك المركزي يرفع ايده عن دعم الجنيه قصاد الدولار، وطبعا ده لو حصل قيمه الجنيه هتقل.
هتقول لي طيب ما البنك المركزي في اكتوبر اللي فات اعلن اعتماد سعر صرف مرن الجنيه، هاقولك حصل، بس الصندوق بقى شايف ان القرار ما تنفذش بالكامل، والجنيه متقيم بأعلى من سعره.
ووجهه نظره دي مبنيه على ان حجم الطلب على الدولار في البنوك مش حقيقي، لان في قيود على الاستيراد، لو اتشالت الطلب على الدولار هيزيد وسعره برضه هيزيد. .
وبشكل عام دعم العمله عشان تبقى موجوده في السوق باعلى من سعرها الحقيقي زي ماكان بيحصل مع الجنيه طول السنين اللي فاتت، بيكلف البنك المركزي مبالغ دولاريه من الاحتياط النقدى.
وطبعا الصندوق عاوز يرفع الضغط عن البنك المركزي عشان يضمن اننا نقدر نسدد الالتزامات اللي علينا ويدينا القرض.
في نفس الوقت في مؤسسات مالية توقعت انخفاض جديد لقيمة الجنيه امام الدولار، عشان يوصل سعر العملة الأمريكية إلى 28 جنيه، ومش بعيد يسجل 30 جنيه حسب تحليل محمد عبد العال الخبير المصرفي .
وبرضه، عز الدين حسانين الخبير المصرفي، اللي اتكلم عن ضرورة تحريك سعر الدولار في البنوك عشان نلغي الفرق بين السعر الرسمي والسعر الموازي ويوصل الدولار لقيمته الحقيقية أمام الجنيه.
خصوصا بقى ان البنك المركزي محتاج مابين 20 إلى 30 مليار دولار عسلن يعطي احتياجات السوق لغاية نص 2023.
وحسب كلامه، صندوق النقد الدولي ممكن يأجل الموافقة على القرض لغاية مايتأكد تماما من قدرة الحكومة على توفير المبلغ دا.
فهل ده بياكد ان التعويم الكامل للجنيه ممكن يحصل قبل اجتماع صندوق النقد في 16 ديسمبر؟ ولا البنك المركزي ليه رأي تاني؟
ده اللي هتكشفه الساعات الجايه، فتابعونا اول باول عشان تعرفوا اخر التطورات، وكمان قولولنا توقعاتكم سعر الدولار ممكن يوصل لكام؟
