انتشرت بعض الاخبار على مواقع التواصل الاجتماعي تفيد بأن من لم يصله،رسالة من وزارة التموين بصرف تموين شهر يناير بطاقته هتتوقف، وطبعا من حق الناس تقلق. لكن المركز الإعلامي لمجلس الوزراء طمئن المصريين ونفي هذا الكلام ،وأكد انه مجرد شائعات، والكل سيصرف التمويل بدون أي مشاكلكله هيصرف التموين من غير اي مشاكل.
طيب إيه الحكاية؟ من شهر تقريبا بدأت وزارة التموين في إرسال رسائل” sms ” على رقم المحمول الخاص بصاحب البطاقة التموينية.
وده في 6 محافظات جديدة ” الشرقية والمنوفية والإسماعيلية وأسوان ، والبحر الأحمر وجنوب سيناء”، ومن قبلهم الأقصر وبورسعيد.
بس من اول يناير وزارة التموين بدأت في تطبيق الرسالة على كل محافظات الجمهورية والرسالة دي بتوضح قيمة الدعم المخصص للأفراد المسجلين على البطاقة، وكمان قيمة الرسوم اللي مفروض صاحب البطاقة يسددها للبقال.
وحسب الحكومة، الرسالة خاصة بتفاصيل عملية صرف المقررات زي أنواع وكميات السلع اللي حصل عليها المستفيد من تاجر التموين ضمن مقرراته التموينية، وبتبعتها الوزارة للناس اللي حدثت رقم الموبايل وملهاش اي علاقة بصرف التموين من عدمه.
في الوقت نفسه ناشدت الحكومة من أصحاب البطاقات التموينية اللي مسجلوش أرقام الموبايل على قاعدة البيانات، بضرورة التسجيل من خلال مكاتب التموين أو المنصات الإلكترونية (دعم مصر – مصر الرقمية).
وده كله لتسهيل التعامل في الدعم المقدم لهم، مع تحديث قواعد بيانات مستفيدي الدعم، والاستفادة بالخدمات التكنولوجية التي تقدمها الوزارة
ولو لسة خايف من الغاء الدعم بسبب قرض مصر من صندوق النقد الدولي ب3 مليار دولار، فالحكومة بتقولك اطمن، صندوق النقد مش عاوز يرفع الدعم عن المصريين.
وكل اللي حصل في الفترة الأخيرة كانت تنقية لمنظومة الدعم، عشان الحكومة تضمن وصوله المستحقين، خصوصا ان عمليات الفحص كشفت بطاقات مكررة، وبطاقات لناس فارقت الحياة اصلا.
وحسب آخر الأرقام المعلنة، مصر فيها 23 مليون بطاقة تموين بيستفيد من خلالهم 64 مليون مواطن كمان في 73 مليون بيستفيدوا من دعم الخبز، لأن في مواطنين بياخدوا عيش بس.
ومؤخرا أطلقت الوزارة معارض اهلا رمضان بتخفيضات في أسعار السلع بتوصل الي 30%، في كل المحافظات.عشان كده طالب مجلس الوزرا المصريين بعدم نشر اي اخبار الا بعد التأكد من صحتها.
وفي حالة وجود أي شكاوى مرتبطة بنقص السلع التموينية الأساسية في المحافظات، تقدر تبلغ عنها من خلال الخط الساخن لجهاز حماية المستهلك (19588).
فهل فعلا قابلتكم اي مشكلة في صرف التموين الفترة اللي فاتت؟ طيب هل الأسعار في معرض اهلا رمضان قربت من أسعار السلع فى التموين؟
