وزير التموين أعلن عن رفع أسعار السلع التموينية، رغم أن الحكومة أعلنت منذ أيام قليلة عن زيادة قيمه دعم السلع التموينية ، فأين تذهب الزيادة الجديدة، وهل يمكن أن تزيد حصة الفلاد لاكثر من 50 جنيه؟ تابعونا لمعرفة التفاصيل:
63 مليون مصري بيصرفوا تموين كل شهر، عشان كده ناس كتير قلقانة من تصريحات وزير التموين على المصيلحي، عن زيادة أسعار السلع التموينية الفترة الجاية وبيسألوا:
هل زيادة أسعار السلع معناها زياده حصة المواطن في الدعم؟ قولا واحدا الاجابه لأ، كل فرد على بطاقة التموين ليه 50 جنيه هيفضلوا زي ما هم لا هيزيدوا ولا هيقلوا، وده اللي أكده وزير التموين لموقع مصرواي.
وطبعا انت دلوقتي بتسال نفسك ازاي؟ مش المفروض الحكومة من كام يوم أعلنت عن زيادة موازنة دعم السلع التموينية في السنة الجديدة؟
ايوة ياسيدي ده اللي حصل فعلا، ووزير المالية قال إن الزيادة هتبقى بنسبة 42% تقريبا عشان يوصل دعم السلع التموينية إلى 127,7 مليار جنيه في السنة الجديدة مقارنة بـ 90 مليار حاليا.
فلو الزياده دي ما نزلتش ليك على بطاقه التموين هتروح فين؟!
سؤال مهم وإجابته كشفها مصدر مطلع بوزارة التموين لموقع جريدة اخبار اليوم، واللي قاله كان مفاجأة:الزيادات في قيمة الدعم، هتتصرف على سداد قيمة فروق الأسعار اللي حصلت في السلع التموينية والقمح بعد ارتفاع أسعارهم عالميا.
وخد بالك: مصر بتستورد 95% من الزيت، وكمان الحكومة رفعت سعر توريد القمح المحلي الموسم ده إلى 1500 جنيه للأردب، ده غير استيراد كميات من الأرز ، لسد احتياجات المواطنين من السلع الأساسية.
وطبعا كل ده زود التكلفة على الحكومة، عشان كده غالبا التموين هتستخدم الزيادة الجديدة عشان تقدر تضخ نفس كميات السلع الأساسية في السوق.
والحقيقة ان وزير التموين حسم الجدل ده كله لما قالها صريحة:حق المواطن في الدعم هو الـ50 جنيه مش الزيت أو السكر أو الأرز، يعني ببساطة انت ليك 50 جنيه دعم عند الحكومة من حقك تاخدهم وتشتري بيهم اللي انت عاوزه حسب احتياجاتك، نقلا عن موقع مصرواي.
وبكده يفضل سؤال مهم: إيه تفاصيل زيادة أسعار السلع التموينية؟حسب الوزير، التموين بتدرس رفع 4 سلع أساسية هي الرز والسكر والزيت والجبنة، فهل فعلا الرز هيبقى ب20 جنيه للكيلو؟
ده هيبقى سعر الرز الهندي اللي استوردته الحكومة وهتنزله في منافذها، لكن لغاية دلوقتي مفيش معلومة مؤكدة عن أسعار الرز المصري الموجودة على بطاقة التموين.
اما بقى لو بتسأل ليه الحكومة هترفع أسعار السلع التموينية في التوقيت ده بالذات؟ فكلمه السر هي سعر التكلفة.
وحسب الوزير الفرق الكبير بين سعر تكلفة وسعر بيع السلع التموينية خلى الناس تطمع فيها وتمنع وصولها للمستحقين، وهو بنفسه سمع اكتر من شكوى إن مافيش زيت ولا رز ولا سكر بيوصل للناس.
عشان كده رفع أسعار السلع التموينية ضروري جدا وهيكون تدريجي على اكتر من مرة، وبكده يضمن إن السلعه هتوصل للي يستحقها.
فهل ده معناه ان وزارة التموين هترفع أسعار السلع التموينية عشان تبقى بنفس سعر السوق أو حتى قريب من مستوياتها وبكده تضمن ان محدش يمنع وصولها للمواطنين؟
الأيام الجايه هتكشف عن اجابة السؤال ده، بس انتم كمان شاركونا بتوقعاتكم وقولوا لنا ايه رايكم: هل شايفين رفع الاسعار حل مناسب طالما هيوفر السلعة وتقدروا تشتروها؟
شاركونا في التعليقات.
