بعد إخلاء سبيل رجل الأعمال صفوان ثابت وأبنه والبورصة في حالة غير طبيعية،وذلك لأن سهم جهينة للصناعات الغذائية كان اليوم ضمن قائمة الأسهم الأكثر ارتفاعا وحقق قفزات جنونية بعد مرور ساعات فقط من الإفراج عنه.
طيب تفتكروا ليه إدارة البورصة وقفت التداول على سهم جهينه النهاردة، وإيه مصير الشركة بعد خروج “صفوان ثابت”، تعالوا نعرف الإجابة في التقرير التالي:
بعد الإعلان عن الإفراج عن صفوان ثابت ونجله سيف، ناس كتير كانت بتسأل يا ترى إيه تأثير خبر اخلاء صفوان سبيل ثابت وابنه على أسهم شركة جهينة في البورصة؟
وحصل زي ما الناس كانت متوقعت و النهاردة حقق سهم جهينة في التعاملات الصباحية للبورصة قفزة كبيرة بأكتر من 13% وده اللي خلى السهم يوصل مستويات قرب الـ 10 جنيهات وسط تداولات نشطة اقتربت من 13 مليون جنيه بعد التعامل على 1.3 مليون سهم.
وقدر سهم جهينة للصناعات الغذائية يدخل بسرعة جدا قائمة الأسهم الأكثر ارتفاع وبسبب الارتفاعات دي ، حققت مؤشرات البورصة ارتفاع جماعي في منتصف التعاملات واللي كانت مدعومة من مشتريات الأفراد العرب والمؤسسات المحلية.
وده اللي خلى البورصة المصرية توقف التداولات مؤقتا على أسهم بعض الشركات ومن بينها شركة جهينة للصناعات الغذائية، وده بسبب تجاوز أسهم الشركات دي نسبة التحرك المسموح بيها.
ولكن بختام التعاملات قلص سهم جهينة مكاسبه وانخفض لـ 7.01% وأغلق عند 9.46 جنيه.و كانت أكدت مريم صفوان ثابت إخلاء سبيل والدها صفوان ثابت، وشقيقها سيف، بعد حبسهما لنحو عامين.
و في يناير 2021 قرر مجلس إدارة شركة جهينه للصناعات الغذائية قبول استقالة صفوان ثابت من عضوية مجلس الإدارة وتعيين أحمد الوكيل عضو بمجلس الإدارة.
ومع ذلك قدرت الشركة تحقق صافي أرباح مجمعة بقيمة 474.08 مليون جنيه خلال التسعة أشهر المنتهية في سبتمبر اللي فات، مقابل 490.19 مليون جنيه خلال نفس الفترة من 2021،
وارتفعت مبيعات الشركة خلال من يناير لـ سبتمبر 2022 إلى 8.16 مليار جنيه، مقابل 6.52 مليار جنيه خلال نفس الفترة من العام الماضي.
طيب تفتكروا إيه حقيقة تأثر الشركة بأزمة الدولار؟اللي حصل إنه من حوالي شهر اتقدمت شركة جهينة للصناعات الغذائية، والمقيدة في البورصة المصرية، باستغاثة إلى الدكتور مصطفى مدبولي رئيس مجلس الوزراء.
وقالت الشركة إن عمليات الانتاج بتاعتها اتأثرت بسبب أزمة الدولار وتباطؤ البنوك في توفير الدولار اللازم لتلبية احتياجاتها الاستيرادية من عوامل الإنتاج
وقالت في المذكرة إن أزمة نقص الدولار هتأثر على توقف عمليات استلام وإنتاج وتوزيع الألبان، وأكدت إنها بتشعر بالخوف من استمرار الوضع ده واللي ممكن يوصلها لوقف الإنتاج وعدم إمكانية استلام كسبات الألبان اليومية من المزارع ومراكز التجميع، وعدم تلبية احتياجات السوق المحلي، وده اللي ممكن يعرض السوق لنقص في توفير منتجات الألبان
قولولنا شايفين مستقبل الشركة إزاي بعد خروج صفوان ثابت؟
