لن يتم طرح شهادة 20% قريبا، مفاجأة أعلنها رئيس البنك الأهلي وخالف فيها كل التوقعات، لكن هنا بيظهر السؤال المهم: لماذا؟ هل كان من المفروض ان ينزلوا شهادات بعائد أكبر بعد رفع البنك المركزي للفايدة 3%؟ أم ان الموقف مختلف هذه المرة؟
بعد رفع البنك المركزي لسعر الفايدة 3% في اجتماعه الأخير، وأصبح سعر الفائدة في البنك المركزي بعد الزيادة 16.25% على الإيداع و17.25% على الإقراض.
ولو بصيت على قرارات رفع الفايدة على مدار 2022 ، هتلاقي ان في الغالب كل رفع للفايدة بيقابله طرح شهادات ادخار جديدة بعائد أعلى، حتى لو كانت بشروط استثنائية زي شهادة ال18% اللي اتوقفت بعد شهور من الطرح، ومن بعدها جت شهادات ال14%، لغاية ماوصلنا دلوقتي إلى الشهادات بفايدة 17.25٪
وبناء على الخطوات دي ومع ارتفاع معدل التضخم الأساسي في مصر لأكتر من 21% في نوفمبر, توقع كتير من الخبراء إن البنوك ينزلوا شهادات بفايدة 20% ويمكن اكتر، وخصوصا بنكي الأهلي ومصر باعتبارهم الذراع الحكومية لتنفيذ سياسة البنك المركزي.
وده عشان يخلوا الناس تحط فلوسها في البنوك بدل ماتشتري بيها سلع وبكده يقل الطلب في السوق وتقل معاه الأسعار واخيرا ينخفض معدل التضخم.
لكن واضح ان البنوك بتحسبها بطريقة تانية، وده ظهر اوي لما أعلن هشام عكاشة رئيس مجلس إدارة البنك الأهلي إن مفيش أي نية لطرح شهادات بفايدة أعلى في وقت قريب
وحسب كلامه، الفايدة المطبقة على الودائع بتكون دايما أقل من الإقراض، ولكن الشهادات المطروحة حاليا عليها عائد كويس بيقل أو يوازي أسعار الفائدة على الإقراض، وبكده مفيش أي داعي لإصدار شهادات جديدة.
يعني دلوقتي الشهادة البلاتينية موجودة في لبنك الاهلي بفائدة سنوية 16% بدورية شهرية لصرف العائد، و16.25% سنويا بدورية صرف عائد ربع سنوية، و16.5% سنويا بدورية صرف عائد نصف سنوية، و17.25% بدورية صرف سنوية، وهو السعر المساوي لسعر الإقراض في البنك المركزي
نفس الشهادة موجودة في بنك مصر تحت اسم شهادة القمة، وفي بنك القاهرة تحت اسم بريمو جولد، اما لو بتدور على عائد أعلى شوية عندك المصرف المتحد.
المصرف المتحد بيقدم شهادة ثلاثية بعوائد مختلفة حسب دورية الصرف برضه، يعني هيبقى 16.25% لدورية صرف العائد الشهرية، و16.5% لدورية صرف العائد ربع السنوية، و17% لدورية صرف العائد السنوية.
أما بقى لو استنيت لنهاية مدة الشهادة عشان تقبض العائد يعني بعد 3 سنين، ساعتها الفايدة على شهادة المصرف المتحد هترتفع إلى 18% سنويا.
وخد بالك فيه فعلا شهادات سعر الفايدة عليها زاد بس دي الشهادات بعائد متغير والمرتبطة بسعر الكوريدور في البنك المركزي.
الشهادات دي سعر الفايدة عليها بيتحرك حسب سعر الفايدة في البنك المركزي سواء بالزيادة أو بالانخفاض إنما الشهادات بعائد ثابت محصلش فيها أي تغيير.
.
وده اللي أكده محمد الاتربي رئيس بنك مصر، لما قال إن طرح شهادات بفائدة 20٪ قرار مش سهل، لأنه هيزود التكلفة على البنوك وفي الحالة دي هيبقى قدامها حل واحد: زيادة الفايدة على القروض بأكتر من 20%.
انتوا بقى لو محوشين مبلغ على جنب هتعملوا إيه؟ هتربطوا بفلوسكم شهادات على العائد الحالي، ولا هتدوروا على سكة تانية زي الدهب مثلا؟
