خلال الفترة الماضية ظهرت في البيئة المصرية أنواع كثيرة ونادرة من الفواكه والخضروات التي كانت غريبة علينا من سنين، وبالرغم من شهرتها في مناطق أخرى في العالم إلا إنها غريبة علينا كمصريين وعرب! فما هي شجرة الليمون كافيار، وكيف وصلت مصر، وما هي مميزاتها وهل فعلاَ الكيلو منها بـ 7 آلاف جنيه؟.. تعالوا نعرف التفاصيل في التقرير التالي:
شجرة الليمون الكافيار الأسترالية
أنواع كتيرة من الفواكه والخضروات الغريبة والنادرة بدأت تنزرع في مصر، وبالرغم من إن الأنواع دي من الأشجار معروفة في دول شرق آسيا، إلا إنها بالنسبة للوطن العربي غريبة علينا زي مثلاً “الدراجون فروت والقشطة، والكافيار” وغيرهم.
ورغم أن أول حاجة هتيجي في دماغ الناس لما يسمعوا كلمة «كافيار» إنها نوع من الماكولات البحرية والأسماك، إلا إن في شجرة معروفة أوي إسمها «ليمون كافيار»، وده بسبب الشبه اللي بينها الثمرة بتاعتها من الداخل وبيض السمك اللي هو «الكافيار»، وعلشان كدة هتلاقي تمن النوع ده من الليمون غالي أوي.
التقارير قالت إن سعر الكيلو من اللمون كافيار بيوصل لحوالي 7000 جنيه، ومش غالي بس علشان قيمته الغذائية عالية وبيتم استخدامه من قبل أفخم المطاعم في وجباتها لاء، وإنما غالي لأن زراعته نادرة، وإنتاجية الشجرة بتاعته في الموسم لا مش بتزيد عن 5 كيلو.
وللتعليق على ده المهندس الزراعي المتخصص في زراعة الفواكه النادرة والاستوائية “محمد عطية” في تصريحات صحفية له قال إن شجرة “الليمون كافيار” موطنها الأصلي أستراليا، وسبق له واستوردها من اسراليا من حوالي 5 سنين، وهي من فصيلة الموالح والثمرة بتشبه لحد كبير شجرة “الليمون البلدي” أو الليمون المعتاد، سواء من حيث طعمها أو من “لون القشرة” الخارجية، لكن بتختلف معاها في شكل “الثمرة” من الداخل والخارج.
المهندس محمد عطية مالك مشتل بالشرقية قال كمان إن الشجرة “معمرة” يعني تقدر تعيش لمدة 200 سنة، بعدما تأقلمت مع مناخ مصر، وتربتها الطينية والرملية، يعني بعد كل ده المزارع المصري يقدر يزرع “البذور” بتاعتها لحد ما تنمو شتلات، وبعدها يبدأ يجهزها للزراعة في الأرض الزراعية اللي هي «التربة المستدامة»، وأصغر شتلة منها بتتباع بسعر 200 جنيه، ويمكن للمزاع إنه يكتر منها عن طريق «التطعيم بالعين.
قال كمان المهندس عطية إنه بإمكان أي شخص يزرع «الليمون كافيار» في بيته أو في البلكونة أوفي أرضه الزراعية لأن الليمون كافيار مش بيتحمل ملوحة التربة، والشجرة بتبدأ ترمي بعد 3 سنين من زراعتها وبترمى لصاحبها 5 كليو كافيار.
أخيراً المهندس محمد عطية اكتشف إن الشجرة في مصر وفي بعض الدول العربية بتنتج أكتر من اللي بتنتجه في موطنها الأصلي اللي هو “استراليا” وده بسبب عوامل كتيرة زي البيئة والمناخ والتربة، في حين تشتهر استراليا، ونيوزلندا بزراعتها، ويتمنى كل المصريين يزرعوها علشان سعرها يرخص.
