متى يكسر الدولار في مصر حاجز الـ31 جنيه؟، وهل هذا سيكون بداية التعويم أم لا؟ وهل هذا هو السعر العاجل للجنيه أم الدولار أم أن الحكومة تتحكم في أسعار الصرف؟..تابعونا لمعرفة التفاصيل:
كلام كتير بيتقال عن إن الدولار قريب أوي هيكسر حاجز الـ 31 جنيه في البنوك لكن لو بصينا على الأسعار الرسمية المعلنة من البنك المركزي والبنك الأهلي هنلاقي إنه فعلا الدولار قرب جدا من الـ 31 جنيه .
ومع كل المؤشرات الناس بقت قلقانه من تعويم جديد، والحقيقة في مجموعة من الخبراء أكدوا إن احنا داخلين على انخفاض جديد في قيمة الجنيه،
وده خلى الناس تسأل عن مستقبل الجنيه وإيه اللي ممكن يحصل الأيام الجاية؟
في تصريحات قالها الخبير الاقتصادي رشاد عبدة لـ جريدة المصري اليوم، قال إنه الأكيد الأيام الجاية هتشهد انخفاض لسعر الجنيه مقابل الدولار.
وده هيكون وفقًا لقواعد صندوق النقد الدولي ويقصد هنا روشتة الصندوق اللي مفترض تنفذها الحكومة وأهم نقطة فيها كانت تطبيق سعر صرف مرن للجنيه.
وقال إنه في حالة ضغط الطلب على الدولار في الأسواق هترتفع قيمتة ولما يقل الطلب عليه هتقل قيمته
لكن صندوق النقد ميفرقش معاه الكلام ده والمهم عنده إنه يكون سعر صرف الجنيه مرن ويتحدد بناء على قوة العرض والطلب ف مصر حتى لو الجنيه هينخفض.
قال كمان إن في سياسة من اثنين أو اتجاهين هيمشي فيهم سعر الدولار الفترة القادمة، أولهم إنه يحصل خفض لقيمة الجنيه بشكل تدريجي
بمعنى أنه سعر الدولار يزيد كل يوم بشكل وينخفض حوالي من 60 لـ 70 قرش بطريقة دورية لحد ما يوصل لنهاية السنة للنسبة المطلوبة وهي في حدود الـ 10 % .
أما المدرسة الثانية، أو التوجه التاني فهيكون قرار خفض سعر الجنيه مرة واحدة بالنسبة كاملة».لكن عبدة قال إنه الأكيد إنه في فجوة بين سعر الصرف الرسمي والسعر اللي بيتعلن عنه في الأسواق الموازية، وعشان كده التضخم بيظهر بسبب وجود الفروق دي وبيضطر وقتها البنك المركزي إنه يرفع سعر الفائدة عشان يقلل نسبة التضخم في مصر.
وحسب أخر أسعار أعلن عنها البنك المركزي للدولار مقابل الجنيه.وسجل فيها الدولار 30.83 جنيه للشراء وسعر 3.85 جنيه للبيع.
الغريبة في الموضوع إنه معظم تحليلات البنوك العالمية كانت بتقول إننا هنشوف انخفاض جديد في قيمة الجنيه الفترة الجاية عشان يسجل الدولار ما بين 34 الى 40 جنيه.
عندك مثلا بنك اتش اس بي سي قال في تقرير ليه إنه من المتوقع إن سعر الدولار يسجل في المتوسط 37 جنيه ونص خلال المدى المتوسط.
مش بس كده ده كمان في العقود الآجلة على الجنيه لمدة 12 شهر زاد الدولار عشان يعدي سعره اكتر من 41 جنيه للدولار الواحد.
انتوا بقا شايفين مصير الجنيه رايح على فين وهل فعلا التعويم لازم هيحصل خلال أيام ولا لا ؟
