بكم تشتري كيلو الأرز؟ .. أياً كان ردك فالسعر هذا يعتبر ضعف السعر الذي كان يباع به من فترة ليست كبيرة، وهذا لأن مصر رغم إنها تزرع مساحات تكفي الاستهلاك المحلي لكن واجهت أزمة في توفير سلعة الأرز.
وسواء كان السبب المزارعين أو التجار أو الدولار.. فاحنا هنفاجأكم في تقرير النهاردة خبر هيفرح كل المصريين خليكم معانا وانتوا تعرفوا سعر الرز هينزل امتى و هيوصل لكام ؟
أزمة الرز بدأت معانا في 2022 وكملت معانا لـ2023 ، وده لأنه السنة اللي فاتت ارتفاع سعره بأكتر من الضعف والغريبة إن ده حصل مع انتهاء موسم حصاد الرز واللي المفروض فيه يحصل العكس والسعر يقل!
لكن الناس اتفاجئت إن الرز اختفي في كتير من فروع المتاجر والأسواق الكبيرة في كل المحافظات تقريبا
وبدل ما سعره كان 10 جنيه بس وصل لـ حوالي 22 جنيه للكيلوا.ورغم إن الرز سلعة استراتيجية بتسعى دايما الحكومة إنها توفرها للمصريين بسعر كويس وإنه ميحصلش فيه أي عجز .
لكن شوفنا الرز السنة اللي فاتت ناقص في السوق والموجود كان نوع غريب سموه المصريين بـ الرز الصيني وطعمه طبعا كان غريب وده لأنه مش الرز المصري البلدي اللي كلنا متعودين عليه ومفيش سفره في مصر بتخلى منه.
وقتها الحكومة قالت إن السبب في الأزمة هو إن بعض منتجي وتجار الأرز خزنوه بغرض رفع سعره بعدين، لكن وزارة التموين حطت التسعير على الأكياس عشان تمنع تلاعب الأسعار.
لكن اللي حصل إن التسعيرة اللي حطتها وزارة التموين معجبتش التجار وده اللي خلاهم يسحبوا معظم أكياس الرز بتاعتم من الأسواق، وطبعا ده ساعد إن يكون في أزمة نقص الرز.
بس الحكومة مسكتتش واعتبرت الرز من المنتجات الاستراتيجية وقررت تعاقب أي شخص يخبي الرز عن المواطنين أو يوقف طرحه أو يمنع بيه لأي سبب كان.والقرار ده ألزم كلالتجار اللي كانوا مخبيين الرز إنهم يبدأوا يطرحوا الرز من تاني في الأسواق.
و النهاردة هنقولكم على خبر حلو وهو إن أزمة الرز على وشك الانتهاء خلاص. وده مش كلامنا ده تصريحات قالها رجب شحاتة رئيس شعبة الأرز باتحاد الصناعات واللي قال إنه في أزمة رز محدش يقدر ينكر وجودها، وده لان سعر طن الرز الشعير وصل لـ 15 ألف جنيه فـ أزاي المحلات هتبعه بـ 16 أو 18 جنيه وعند البقال بـ 20 جنيه.
لكن توقع “شحاته” تراجع سعر الرز في شهر مارس الجاي وده لأن وزارة التموين اتحركت وأعلنت عن مناقصة لاستيراد الرز الشعير.
ومش الوزارة بس ده كمان حسب كلامه في شركات في القطاع الخاص بدأت تستورد الرز. وعشان كده مع بداية شهر مارس هنبدأ نشوف كميات كبيرة من الرز في الاسواق، خاصة لو الوزارة خدت قرار بإلغاء التسعير الإجباري للرز واللي هيخلي التجار يطرحوا الكميات اللي عندهم
وبكده أي تاجر خزن الرز الفترة اللي فاتت عشان يحقق مكاسب من الأزمة هيكون خسران وهيضطر يبيع بسعر أقل كمان وده لأن الحكومة معتمدتش عليهم واستوردت من الخارج.
وبيعتبر الرز وجبة طعام رئيسية للمصريين، وواحد من السلع التموينية المهمة اللي بتصرفها الحكومة لحوالي 23 مليون بطاقة تموين ضمن بعض المواد الغذائية المدعومة، زي الزيت والسكر والمكرونة والشاي.
وبتوفر الحكومة الرز للمواطنين في المجمعات الاستهلاكية بـ 10 جنيه ونص بس.
دلوقتي قولولنا بتشتروا الرز بكام ومنين؟.. وإيه رأيكم في الإجراءات اللي عملتها الحكومة الفترة اللي فاتت؟
