مفاجأة من بنك قناة السويس لكل العملاء الذين يريدون أن يحافظوا على فلوسهم من خطر التضخم وارتفاع الأسعار، السر في شهادة الادخار الدولارية الخماسية الجديدة التي يقدمها هذه الفترةوالتي ستقدملك أعلى فائدة في السوق ومدد مختلفة للعائد تختار منها الذي يناسب احتياجاتك.
خليك معانا في التقرير ده واحنا نقولك إزاى تقدم عليها و هتديك فايدة كام وهل كل الناس تقدر تشتريها ولا لأ؟، تابعونا:
بعد ما البنك الأهلي وبنك مصر قرروا يوقفوا شهادة الـ25%، الناس فكرت إن السباق كده انتهى خصوصا إن معظم البنوك اللي طرحت شهادات الفترة اللي فاتت وقفتها بعد القرار ده بأيام.
لكن النهاردة بنك قناة السويس أعلن لكل عملائه عن مفاجأة وهي إنه قدملهم مجموعة متنوعة من شهادات الادخار اللي بتتميز بـ العائد الدوري الثابت والمتغير بالجنيه المصري والعملات الأجنبية، وبمدد 3 أو 5 سنين.
أما بقى أهم شهادة في دول هي شهادة الادخار الدولارية اللي بيقدمها بنك قناة السويس وخلي بالك هي بتكون بعائد دوري ثابت لمدة 5 سنين.
طبعا أي حد هيسمع كلمة دولارية هيفكر أنها للأجانب بس لا ياسيدي ده مش صحيح وده لأن بنك قناة السويس بيوافق على إصدار شهادة الادخار الدولارية الخماسية للمصريين والأجانب المقيمين في مصر.
وتقدر تقدم عليها بحد أدنى يبدأ من 100 دولار أمريكي، والمبلغ ده هيخليك تستمتع بسعر عائد دوري ثابت بنسبة 5.15% سنويًا، ودوريات صرف متنوعة ما بين شهرية أو ربع سنوية أو نصف سنوية أو سنوية.
أما بقى المميزات اللي هتقدمهالك شهادات الادخار الدولارية الخماسية اللي بعائد ثابت من بنك قناة السويس فهيا كتير أوي
أول حاجة إن مدة الشهادة بتكون 5 سنين ودي فرصة كويسه للناس اللي حابه تحوش فلوسها وتحقق أرباح على المدى الطويل.
بس خلي بالك الحد الأدنى لربط الشهادة هيكون 100 دولار امريكي.وهتقدم شهادة الادخار الخماسية من بنك قناة السويس عائد دوري ثابت يوصل لـ 5.15% سنويًا.وكمان تقدر تختار دورية صرف العائد إنها تكون شهريًا أو ربع سنويًا أو نصف سنويًا أو سنويًا.
مش بس كده إنت لو فكرت تعمل قرض بضمان الشهادة هتاخد مبلغ بنسبة توصل لـ 85% من قيمة الشهادة، والفايدة على القرض هتزيد حوالي 2% عن العائد المطبق على الشهادة.
وبنك قناة السويس بيبدأ يحسبلك العائد من تاني يوم لتاريخ شراء الشهادة.كمان المفاجأة إنك هتقدر تسترد الشهادة في تاريخ الاستحقاق بكامل قيمتها وبنفس العملة. وهي الدولار.
مش بس كده ده كمان بنك قناة السويس بيسمح بـ استرداد الشهادة بعد 6 شهور من إصدارها وده بيكون لكل الشهادات الموجودة في البنوك.
وتقدر كمان تجدد الشهادة لمدة تانيه خمس سنين حسب رغبتك كـ عميل في تاريخ الاستحقاق ووفقًا للشروط المعلنة.
وخلي بالك اخر رقم اعلنه البنك المركزي عن معدل التضخم في مصر هو 31.2% في نهاية يناير اللي فات، واحتمال يزيد كمان الفترة الجاية لـ 35% .
وعشان كده كل الناس اللي بتلجأ للشهادات دلوقتي هي ناس عندها وعيي بأهمية إنها تحافظ على فلوسها من خطر التضخم والشهادات هتساعدك تعمل ده
وفي الآخر بقى يهمنا نعرف رأيك.. إيه أكتر شهادة شايفها إنها الأفضل في السوق؟، وهل ممكن تقدم على شراء شهادة بنك قناة السويس ولا لا؟
