تتخيلوا بعد رفع سعر الفايدة 2% ما السيناريوهات التي سينفذها البنك المركزي الفترة القادمة؟ وما القرارات التي ستاخذها الحكومة لكي تحل أزمة نقص الدولار والتي استمرت معنا من 2022 ، وياترى ما هو مصير الاسعار؟
هو إيه بيحصل مع الجنيه وليه بدأ تاني يتراجع في السوق السودا وهل فعلا انخفض بحوالي 15%؟، وإيه علاقة اللي بيحصل ده بقرار البنك المركزي بزيادة الفايدة 2%؟ ، وليه السعر الرسمي زي ما هو تفتكروا كده التعويم قرب؟
خليكوا معانا في التقرير ده وإحنا نقولكم إيه اللي بيحصل:
كلنا عارفين إن معظم بنوك الاستثمار العالمية راهنت على خفض سعر الجنيه وللأسف اللي حصل يوم الخميس اللي فات هو إن سعر الجنيه اتخفض بحوالي 15% وده طبعا لو قارناه بنفس الفترة في 2022.
طيب ياترى ليه قيمة الجنيه بتقل؟
بص يا سيدي الجنيه بقاله فترة كبيرة بييشهد استقرار في السعر الرسمي في البنوك الحكومية لكن في السوق السودا الكلام متغير خالص وسعر الدولار أزيد بكتير من المعلن عنه في الأسواق الرسمية.
وده لأن الاقتصاد المصري بيواجه ضغوط كبيرة خصوصا نقص السيولة الدولارية، وعشان كده وصل سعر صرف الجنيه في السوق السوداء من 35.5 لـ 36 دولار في السوق السوداء.
وده بعد ما كان بيتداول عند 30.9 جنيه للدولار الواحد في بداية شهر مارس .لكن خليني أقولك إن الرهان على خفض أكبر للجنيه لسه مستمر ، وده لأنه في الأسابيع الأخيرة بنوك عالمية وتقارير محلية، توقعت ارتفاع جديد للدولار لدرجة انه ممكن يوصل إلى 40 جنيه.
وده اللي حصل وشفناه في العقود الآجلة على الجنيه، سعر بيع وشراء الدولار بعد 12 شهر متحدد من دلوقتي بأكتر من 40 جنيه.
وطبعا الاسعار دي قبل إعلان البنك المركزي عن رفع الفايدة بواقع 2%، وده اللي بيأكد إن الجنيه داخل على مرحلة خفض جديدة.
وعشان كده الحكومة المصرية مضطرة الفترة الجاية تحاول تحل أزمة نقص السيولة الدولارية وده عن طريق جذب الاستثمارات الأجنبية المباشرة والتدفقات الخارجية لـ سوق الدين المحلية.
وده طبعا عشان تعوض الجنيه عن اللي حصل السنة اللي فاتت لما خرجت الأموال الساخنة في مصر في شهر مارس 2022 وده كان بالتزامن مع الأزمة الروسية الأوكرانية، واللي خلت المستثمرين يقلقوا على فلوسهم في الدول اللي بيكون اقتصادها ناشىء زي مصر وغيرها كتير .
وقتها للأسف خرج أكتر من 22 مليار دولار من البلد في كام يوم بس.لكن الحكومة مستسلمتش وبدأ تطرح أفكار مختلفة تستهدف بيها دخول الدولارات للبلاد.منها برنامج بيع 32 شركة حكومية بحصيلة مستهدفة هتكن مليارات الدولارات.
ولو انت متعرفش فمصر خفّضت قيمة عملتها 3 مرات في 2022، وده لأن الحكومة كانت بتحاول توصل لسعر مرن للجنيه فـ بدأت في خطوات التعويم وبدأ فعلا سعر الجنيه المصري ينخفض بأكتر من 95% في بداية الأزمة الروسية الأوكرانية في مارس اللي فات وده اللي أكده موقع الشرق بلومبرغ.
طيب حد هيقولي ما مصر أخذت قرض صندوق النقد الدولي إزاي بقى عندها نقص سيولة دولارية ده القرض قيمته 3 مليار دولار هتاخدها مصر خلال 4 سنين .
هقولك يا سيدي بنك مورجان ستانلي العالمي قال إن احتياجات مصر التمويلية بتتخطى السيولة اللي قدرت توفرها سواء من فلوس القرض أو بيع بعض الأصول.
وعشان كده توقع البنك إن الفجوة التمويلية اللي بتعاني منها مصر هتوصل لـ24 مليار دولار في نهاية العام المالي الجاي في 2024.
ده كمان أكد إن الاحتياطات النقدية الأجنبية لمصر بنهاية العام المالي 2024 /2025 هتوصل لـ 38 مليار دولار بس مقابل 34.3 مليار دولار في نهاية فبراير الماضي وده طبعا رقم قليل جدا وكل ده البنك قال إنه بسبب الظروف الاقتصادية العالمية الحالية.
دلوقتي قولولنا رأيكم متوقعين يحصل خفض تاني لسعر الجنيه ولا لأ؟
