لسة محتار تشتري شهادة العائد الشهري بفايدة 22.5% ولا شهادة بفايدة ال25؟ الأكيد انك لازم تاخد قرارك في أسرع وقت قبل وقف طرح الشهادة. لذلك فإننا سوف نوضح كيف تحقق أكبر استفادة من شهادة الـ 22.5 %.
عشان كده في الفيديو هنقولك ازاي تكسب اكتر من شهادة ال22.5% رغم ان العائد عليها أقل، فخليك معانا للآخر.
خلينا نفترض ان معاك 100 ألف جنيه، لو حطيتهم في الشهادة بفايدة 22.5% هيطلعلك مكسب في السنة كلها 22 ألف و500 جنيه، وفي الشهر الواحد الواحد هتاخد 1875 جنيه.
أما بقى لو حطيت نفس المبلغ في شهادة ال25% هتاخد في نهاية السنة 25 ألف جنيه.وهنا بقى الناس بتحتار: هل الافضل العائد الشهري خصوصا ان معدلات التضخم بتزيد كل شهر عن اللي قبله والفلوس قيمتها بتقل فالافضل تستفيد بيها أول بأول؟ ولا تصبر وتاخد المكسب في الاخر ويبقى معاك مبلغ على بعضه؟
الخبير المصرفي، ماجد فهمي، طرح حل للمشكلة دي وقال انك ممكن تربط شهادات الـ 22.5% وبعدين تستغل العائد الشهري لتحقيق مكاسب إضافية.
يعني بدل ماتاخد الفلوس كل شهر وتصرفها على احتياجاتك الشخصية، الأفضل أنك تدخله في استثمار تاني زي شراء الذهب أو أذون الخزانة وغيرها من الأدوات اللي سهل تسييلها وبيعها في وقت الحاجة.
وبما ان الدهب سعره عالي دلوقتي وكمان في توقعات عالمية بزيادة سعره الفترة الجاية مع تخفيف الفيدرالي الأمريكي لسعر الفايدة.
تقدر تجمع عائد كل 3 شهور مثلا وتشتري جرامات دهب، وعلى نهاية السنة هيبقى المبلغ الأصلي لسة معاك، وكمان اشتريت دهب.
وفي الحالة دي هتلاقي مكسبك أكبر من شهادة الـ22.5 % أمبر كم شراء شهادة ال25% بعائد سنوي، وتبقى ضربت عصفورين بحجر واحد..
وفي نهاية كلامه أكد الخبير المصرفي ان مفيش عائد أفضل من التاني طالما المدخر أو المستثمر بيفكر بطريقة صح تضمنله أفضل استغلال لرأس ماله، وطالما الأموال بيتم تشغيلها في السوق والتجارة» هتحقق عائد مضمون.
والسؤال دلوقتي هل وقف الشهادات بفايدة 25٪ أو 22.5% هيحصل قريب ولا في احتمالية لمد فترة طرحها؟
آخر تصريحات لمحمد الاتربي رئيس بنك مصر أكد فيها ان الشهادات دي هيتم وقفها في غضون ايام وبحد أقصى في نهاية يناير، ولغاية دلوقتي لسة مفيش جديد
وحسب كلامه، الشهادت الجديدة خلاص حققت هدفها بعد الوصول إلى حصيلة بقيمة 335 مليار جنيه في أول 15 يوما من طرحها بالبنكين الحكوميين، منها 215 مليار جنيه في البنك الأهلي و120 مليار جنيه في بنك مصر.
وخد بالك، لو شهادات ال25% وقفت، البنوك التانية هتوقف طرح الشهادات بعائد مرتفع هي كمان حسب توقعات رئيس بنك مصر.
ودلوقتي بقى عاوزين نعرف رايك انت: هل الأفضل تشتري شهادة بفايدة 22.5% ولا بفايدة 25%? ولو شايف إن في استثمار تاني افضل من وجهة نظرك قولنا عليه.
