عمرة إجازة نصف السنة،طبعا ناس كثيرة مهتمة تعرف تكلفة برامج العمرة للموسم الحالي وأسعار تذاكر الطيران خاصة بعد ارتفاع أسعار الدولار الأيام الماضية، والذي فاجئنا وتخطى سعره حاجز الـ27 جنيه، وهذا طبعًا أثر على شركات الخطوط الجوية المصرية وتسبب في رفع أسعار تذاكر طيران العمرة.
ولو ناوي تعمل عمرة السنة دي يبقي الخبر ده يهمك وهو إن شركة مصر للطيران أعلنت عن أسعارها جديدة لتذاكر الطيران، وده بعد ما زاد الإقبال بشدة على حجز التذاكر بسبب إجازة نص السنة واللي بيستناها كتير عشان يقدر يسافر يعمل العمرة، تابع حلقتنا النهاردة واعرف تفاصيل الأسعار الجديدة وطرق الحجز إزاي تحجز أفضل رحلة بالنسبالك؟
في خبر يهم كتير من المصريين أعلنت شركة مصرللطيران عن الأسعار الجديدة لتذاكر طيران موسم العمرة الجاي واللي هتكون خلال الفترة من 14 يناير ولحد يوم 7 فبراير، وقالت إن الموسم ده بيشهد اقبال كبير خاصة بعد انتهاء أزمة انتشار فيروس كورونا اللي حرمت وقتها ناس كتير من السفر للمملكة.
مصادر في شركات السياحة قالت إن الأسعار الزيادة الجديدة في أسعار تذاكر الطيران زادت بحوالي 5 آلاف جنيه، وشافوا إن الزيادة دى هتأثر أعداد المعتمرين المصريين الراغبين في أداء العمرة الفترة دي.
ولو بتسأل عن الأسعار الجديدة، فشركة مصر للطيران بعتت خطاب جديد لكل شركات السياحة المصرية وعدلت الأسعار القديمة، والجديدة كانت بتتراوح من 8560 جنيه لـ 12990 جنيها وده طبعا باختلاف معاد الرجوع.
فمثلا حددت الشركة سعر تذاكر خط (القاهرة – جدة – القاهرة)، وبقى بيتراوح من 8560 جنيها إلى 8860 جنيها، كمان حسب كلام شركة مصر للطيران اتغير سعر تذكرة خط السفر (القاهرة – جدة / المدينة المنورة – القاهرة) وبقي بيتراوح من 8860 جنبها لـ 9160 جنيها.
والشركة كمان أعلنت تحديد سعر التذاكر لخطي (القاهرة – المدينة المنورة / جدة – القاهرة) و(القاهرة – المدينة – القاهرة) بسعر يتراوح من 9060 جنيها إلى 9460 جنيها.
طب ليه الأسعار زادت؟
لو انت مش عارف فـ البنك المركزي المصري أصدر قرارًا مؤخرًا برفع سعر الفائدة 3%، وإلغاء الاعتمادات المستندية بشكل كامل والقرار ده ساعد الحكومة في إنها تحجم المضاربات على العملة الخضراء، بهدف الوصول لسعر عادل للجنيه أمام الدولار.
وكل الإجراءات اللي أخدتها الدولة المصرية خلال الفترة اللي فاتت ساهمت بشكل كبير في توفير العملة الصعبة في السوق المصرية..
لكن طبعا انعكست قرارات البنك المركزي المصري على أسعار العملات مقابل الجنيه، على سبيل المثال منها ارتفاع سعر الدولار الأمريكي،و سعر الدينار الكويتي، غير كمان زيادة سعر الريال السعودي وطبعًا كل الزيادات دي أثرت على أسعار العمرة بعد زيادة الريال مقابل الجنيه.
قولنا رأيك في أسعار تذاكر السفر الجديدة، وهل فعلا هتأثر على أعداد المسافرين لأداء العمرة ؟
