كل فترة والثانية البنك المركزي يصدر قرارات لكي يمتص أزمة نقص العملة الموجودة في البلد، وكان اخر هذه القرارات هو طرح البنك الأهلي وبنك مصر أكبر البنوك في مصر شهادات دولارية وطبعا الشهادات دي هدخل حصيلة دولارية للبنوك
بس السؤال هنا: هل ممكن الشهادات دي تقضي على السوق السودا؟ وياترى ايه ميزة الشهادات دي عن غيرها عشان تجذب العملا؟ وسعر الدولار في السوق السودا وصل لكام دلوقتي؟
البنك الاهلي وبنك مصر اعلنوا من ايام عن طرح شهادات دولارية جديدة وده عشان توجه العملة للاستثمار مدخراتهم من العملة الأجنبية في شهادات تحافظ على فلوسهم وتزودها كمان
ومن ناحية تانية برضو الشهادات دي هتوفر الدولار في البنوك في الوقت الحالي وممكن تحل ازمة نقص العملة الموجودة في البلد، فياترى هل ده معناه انها ممكن تقضي على السوق السودا؟
بص يا سيدي، حسب تصريحات محمد عبد العال الخبير المصرفي لموقع مصراوي،إن الشهادات الدولارية الجديدة تعتبر حل سحري لزيادة موارد النقد الأجنبي وبالتالي هتساهم في حل أزمة نقص العملات الأجنبية اللي بتعاني منها مصر وكمان هتخفف من تأثير السوق السودا على الدولار في مصر
ده قال كمان إن الشهادات دي فيها مزايا للعملاء هتزود الإقبال على شرائها وده لأنها بتقدم عائد دولاري يعتبر اعلى عائد على مستوي العالم، ده غير انهم ممكن ياخدوا قروض بضمانها بالجنيه المصري بأقل سعر فايدة
وقال كمان إن العائد المرتفع بتاعها هيساهم في تجفيف منابع السوق السودا وهيرجع المدخرات من العملة إلى مواردها الرئيسية في البنوك كمان هتساعد انها ترجع تحويلات المصريين العاملين بالخارج إلى معدلاتها السابقة بعد ما ترجعت آخر 6 شهور.
وده نفس الكلام اللي قاله محمد رجائي رئيس شركة كايرو للصرافة لمصراوي، إن طرح الشهادات الدولارية بعائد مجزي في أكبر بنكين على مستوى الجهاز المصرفي يعتبر فرصة لحائزين الدولارات بالتخلي عن اكتناز العملة في بيوتهم واستثمارها في البنوك، خصوصا أن وجودها في البيوت ملوش قيمة بدون عائد
وطبعا خروج الدولارات من البيوت ووضعها في البنوك ده هيحد بشكل كبير من السوق السودا وهتقلل منابعها، كمان هتشجع المصريين العاملين بالخارج على زيادة تحويلاتهم لاستثمارها فيها خصوصا مع سهولة إجراءات فتح الحسابات وشرا الشهادات
ولما سألنا شريف الدمرداش الخبير الاقتصادي عن تاثير الشهادات دي على السوق السودا؟
قالنا إن الشهادات دي لو نجحت وجمعت حصيلة شرا كبيرة هتساهم بشكل كبير على تخفيف السوق السودا ولكن مش هتقضي عليها بشكل كامل وده لأننا بنستورد 80% من استهلاكنا.
وقال كمان إن نجاح الشهادة هيتوقف على نظرة المصريين بالخارج عن المناخ جوا مصر يعني لو شايف ان الاستثمار آمن دلوقتي اكيد هيستثمر فلوسه في الشهادات دي لان العائد بتاعها مغري، اما بقى لو شايف إن لسه مناخ الاستثمار متوتر فهيخاف يغامر بفلوسه.
بس سعر الدولار في السوق السودا وصل لكام دلوقتي؟
حسب مصادر في الشركات الصرافة لموقع مصراوي، إن سعر الدولار في السوق السودا استقر بعد طرح الشهادات الدولارية، ودلوقتي سعر الدولار وصل بين 38 و38.5 جنيه
وخد بالك ان يحيى ابو الفتوح نائب رئيس البنك الاهلي، قال إن في أكتر من 4 مليار دولار موجودين بره البنوك، والشهادات الدولارية الجديدة هتشجع المصريين على إيداع الدولار الى معاهم في البنوك.
وعشان يطمن الناس أكتر، قال في برنامج على مسئوليتي مع احمد موسى ان أي حد معاه دولار يقدر يشتري الشهادات الجديدة ومحدش هيقوله من أين لك هذا.
واللي قاله بالظبط : حتى لو معاك مليار دولار روح البنك حالا واشتري الشهادة والبنك مش هيسألك عن المصدر، وده القرار اللي أشاد بيه احمد موسى
ودلوقتي قولتا شايف الشهادات الدولارية هتقصي على السوق السودا ولا لا؟
